Author: SM Network

ଭୁବନେଶ୍ୱର: ଓଡ଼ିଶା ମାଧ୍ୟମିକ ସ୍କୁଲ ଶିକ୍ଷକ ସଂଘ(ଓଷ୍ଟା)ର ଆହ୍ୱାନରେ ଚାଲିଥିବା ଅହୋରାତ୍ର ଗଣଧାରଣା ସପ୍ତମ ଦିବସରେ ଉପନୀତ ହୋଇଛି। ସାତଦିନ ହେଲା ଖରା ବର୍ଷା ଶୀତ କାକରକୁ ଖାତିର ନକରି ଶିକ୍ଷକ, ଶିକ୍ଷୟିତ୍ରୀ ଓ ଶିକ୍ଷା କର୍ମଚାରୀ ରାଜଧାନୀର ରାଜଦାଣ୍ଡରେ ଖୋଲା ଆକାଶ ତଳେ ବସି ରହିଛନ୍ତି। ସରକାରଙ୍କ ପକ୍ଷରୁ ନେତୃତ୍ୱ ମାନଙ୍କ ସହିତ କୌଣସି ଆଲୋଚନା ହେବାର ସମ୍ଭାବନା ସୃଷ୍ଟି ହୋଇ ନାହିଁ। ସରକାରଙ୍କ ଏତାଦୃଶ ନୀରବତାକୁ ଓଡ଼ିଶା ମାଧ୍ୟମିକ ସ୍କୁଲ ଶିକ୍ଷକ ସଂଘ(ଓଷ୍ଟା)ର ସାଧାରଣ ସଂପାଦକ ରଞ୍ଜନ କୁମାର ଦାଶ ନାପସନ୍ଦ କରିବା ସହିତ ତୁରନ୍ତ ସରକାର ହସ୍ତକ୍ଷେପ କରି ଉକ୍ତ ସମସ୍ୟାର ସମାଧାନ କରିବାକୁ ଦାବି କରିଛନ୍ତି।

ସଂଗଠନର ପ୍ରମୁଖ ଦାବୀ ଗୁଡ଼ିକ ମଧ୍ୟରେ ପଚିଶ ବର୍ଷ ହେଲା ଅନୁଦାନ ଯୋଗ୍ୟ ବିଦ୍ୟାଳୟକୁ ଅନୁଦାନ ନାହିଁ, ସେମାନଙ୍କ ପାଇଁ ତୁରନ୍ତ ଅନୁଦାନର ବ୍ୟବସ୍ଥା କରିବା, ଅବସର ପରେ ବଞ୍ଚିବା ପାଇଁ ପେନସନ୍ ଓ ଅବସରକାଳୀନ ସୁବିଧା ପ୍ରଦାନ କରିବା, ଯେଉଁସବୁ ବିଦ୍ୟାଳୟକୁ ସପ୍ତମ ବେତନରୁ ବଞ୍ଚିତ କରି ରଖାଯାଇଛି ସେମାନଙ୍କ ପାଇଁ ଏହା ଯଥାଶିଘ୍ର ଲାଗୁ କରିବା, ସବୁ ବିଦ୍ୟାଳୟକୁ ସରକାରୀ ଘୋଷଣା କରିବା, ଚୁକ୍ତିଭିତ୍ତିକ ଶିକ୍ଷକଙ୍କୁ ନିଯୁକ୍ତି ଦିନଠାରୁ ବରିଷ୍ଠତା ପ୍ରଦାନ କରିବା, ଅବସର ବୟସ ସୀମା ୬୨ ବର୍ଷକୁ ବୃଦ୍ଧି ସହିତ ନୂତନ ପେନସନ୍ ଯୋଜନା ପ୍ରତ୍ୟାହାର କରି ପୁରୁଣା ପେନସନ୍ ଯୋଜନା ଲାଗୁ କରିବା, ଖାଲିପଡ଼ିଥିବା ଶିକ୍ଷକ ପଦବୀ ତୁରନ୍ତ ପୂରଣ କରିବା ଇତ୍ୟାଦି।

ଓଷ୍ଟା ତରଫରୁ କୁହାଯାଇଛି ଯେ, ମାନ୍ୟବର ମୁଖ୍ୟମନ୍ତ୍ରୀ ଜଣେ ଅପ୍ରତୀଦ୍ୱନ୍ଦି ନେତା ହୋଇ ଯେମିତି ରେକର୍ଡ କରିଛନ୍ତି ସେମିତି ପଚିଶ ତିରିଶ ବର୍ଷ ଧରି ଶିକ୍ଷକଙ୍କୁ ଅନୁଦାନ ଓ ଚାକିରି ସର୍ତ୍ତାବଳୀ ସହ ଅବସରକାଳୀନ ସୁବିଧା ନ ଦେଇ ଆଉ ଏକ ଇତିହାସ ସୃଷ୍ଟି କରିଛନ୍ତି। ଭାରତବର୍ଷରେ ଏମିତି କୌଣସି ରାଜ୍ୟ ନାହିଁ ଯେଉଁଠାରେ ଶିକ୍ଷକମାନେ ଅବସର ନେବାପରେ ସେମାନଙ୍କ ପାଇଁ କୌଣସି ପେନ୍‌ସନ୍‌ର ବ୍ୟବସ୍ଥା ନାହିଁ। ଅବସର ପରେ ଶିକ୍ଷକ କର୍ମଚାରିଟି ଔଷଧ ଟିକେ ପାଇଁ ପରିଣତ ବୟସରେ ମୂଲ ଲାଗି, ପାନ କିମ୍ବା ଚା ଦୋକାନ ଇତ୍ୟାଦି କରି ଜୀବିକା ନିର୍ବାହର ପନ୍ଥା ଆପଣାଇବା ଅତ୍ୟନ୍ତ ସମ୍ବେଦନଶୀଳ ବିଷୟ। ବିନା ଶିକ୍ଷକରେ ବିଦ୍ୟାଳୟ ବନ୍ଦ ହେବା କଥା ଆଉ କେଉଁଠି ନାହିଁ, କେବଳ ଆମ ରାଜ୍ୟରେ ଅଛି।  ଶିକ୍ଷକ ଅବସର ନେଇଗଲେ ନୂଆ ଶିକ୍ଷକ ଦିଆଯାଏ ନାହିଁ। ଜଣେ ଶିକ୍ଷକ ଥିବା ଯାଏ ବିଦ୍ୟାଳୟ ଚାଲେ। ଶେଷତମ ଶିକ୍ଷକ ଅବସର ନେଇଗଲେ ଆପଣାଛାଏଁ ବିଦ୍ୟାଳୟ ବନ୍ଦ ହୋଇଯାଏ। ଏଭଳି ବ୍ୟବସ୍ଥା କେଉଁଠି ଅଛି ବୋଲି ସଂଘର ସଭାପତି ଅକ୍ଷୟ କୁମାର ମିଶ୍ର ପ୍ରଶ୍ନ କରିଛନ୍ତି।

ଓଷ୍ଟାଦ୍ୱାରା ଆହୂତ ଏହି ଗଣଧାରଣା ଏକ ସପ୍ତାହ ଅତିକ୍ରମ କରିବାକୁ ଯାଉଛି, ଅଥଚ ସରକାରଙ୍କ ପକ୍ଷରୁ ଓଷ୍ଟାର ନେତୃତ୍ୱମାନଙ୍କୁ ଡାକି ଆଲୋଚନା ପାଇଁ କୌଣସି ପଦକ୍ଷେପ ଗ୍ରହଣ କରାଯାଇ ନାହିଁ। ସରକାର ତୁରନ୍ତ ଆଲୋଚନା ମାଧ୍ୟମରେ ସମସ୍ୟା ସମାଧାନର ବାଟ ବାହାର କରନ୍ତୁ ବୋଲି ରାଜ୍ୟ ଓଷ୍ଟାର ସଭାପତି ଅକ୍ଷୟ କୁମାର ମିଶ୍ର, କାର୍ଯ୍ୟକାରୀ ସଭାପତି ନୀଳମଣି ପୁରୋହିତ, ସାଧାରଣ ସଂପାଦକ ରଞ୍ଜନ କୁମାର ଦାଶ, ଯୁଗ୍ମ ସାଧାରଣ ସଂପାଦକ ବ୍ରଜକିଶୋର ବିଶ୍ୱାଳ, କୋଷାଧ୍ୟକ୍ଷ ଅଶୋକ କୁମାର ମହାପାତ୍ର, ଶିକ୍ଷାପ୍ରଦୀପ ସଂପାଦକ ଶଙ୍କର କୁମାର ସୁବୁଦ୍ଧି ପ୍ରମୁଖ ସରକାରଙ୍କ ନିକଟରେ ଦୃଢ଼ ଦାବୀ ଉପସ୍ଥାପନ କରିଛନ୍ତି।

ଭୁବନେଶ୍ଵର: ଓଡିଶା ଗ୍ରାମ୍ୟ କୃଷି କର୍ମଚାରୀ ସଂଘର କ୍ୟାଡର ପୁନର୍ଗଠନ, ଗ୍ରେଡ ପେ ଆଦି ଦାବିକୁ ନେଇ କାର୍ଯ୍ୟ ବନ୍ଦ ଆନ୍ଦୋଳନର ଆରମ୍ଭରେ ଅତ୍ୟନ୍ତ ବିନମ୍ରତାର ସହ ଜଣାଉ ଅଛୁ ଯେ, ଦୀର୍ଘ ୫୦ ବର୍ଷରୁ ଊର୍ଦ୍ଧ୍ଵ ସମୟ ଧରି କୃଷି ବିଭାଗର ମୂଳ ମେରୁଦଣ୍ଡ ଭାବରେ କାମ କରୁଥିବା ଓଡିଶା ଗ୍ରାମ୍ୟ କୃଷି କର୍ମଚାରୀମାନଙ୍କର ମୁଖ୍ୟ ଦାବି କ୍ୟାଡର ପୁନର୍ଗଠନ, ଗ୍ରେଡ ପେ ଆଦି ଅନ୍ୟାନ୍ୟ ଦାବୀର ବିଚାର କରାଗଲା ନାହିଁ। ଦୀର୍ଘ ଏକ ବର୍ଷ ଧରି ସଂଘ ପକ୍ଷରୁ ଶତାଧିକ ପତ୍ର ମାଧ୍ୟମରେ ଅନୁନୟ ବିନୟ କରାଯାଇ ଆସୁଥିଲେ ମଧ୍ୟ କର୍ତ୍ତୁପକ୍ଷ ଏ ଦିଗରେ ସଂପୂର୍ଣ୍ଣ ଉଦାସୀନ ରହି ଆସୁଛନ୍ତି। ଏପରିକି ଆଲୋଚନା ମାଧ୍ୟମରେ ସଂଘ ପକ୍ଷରୁ ଆଗତ କ୍ୟାଡର ପୁନର୍ଗଠନ ପ୍ରସ୍ତାବ ଉପରେ ସାମାନ୍ୟ ଆଲୋଚନା କରି ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଗଲା ନାହିଁ। ଏପରିକି ଆନ୍ତମନ୍ତ୍ରୀ ମଣ୍ଡଳ କମିଟିକୁ କ୍ୟାଡର ପୁନର୍ଗଠନ ପ୍ରସ୍ତାବ ର ସବିଶେଷ ତଥ୍ୟ ପ୍ରଦାନ କରାଗଲା ନାହିଁ।

ଆଉ ମାତ୍ର ଅଳ୍ପ ଦିନ ବ୍ୟବଧାନରେ ସାଧାରଣ ନିର୍ବାଚନ ଓ ଏଥିପାଇଁ ଆଦର୍ଶ ଆଚରଣ ବିଧି ମୁଖ୍ୟ ନିର୍ବାଚନ ଆୟୁକ୍ତଙ୍କ ଦ୍ଵାରା ଜାରିହେବ। ଦୀର୍ଘ ଏକ ବର୍ଷ ଧରି ଏ ଦିଗରେ ସାମାନ୍ୟ ପଦକ୍ଷେପ ଗ୍ରହଣ କରାନଯାଇ ଆମଭଳି ସ୍ୱଳ୍ପ ଦରମାରେ ଦିନରାତି ଅକ୍ଲାନ୍ତ ପରିଶ୍ରମ କରୁଥିବା ଗ୍ରାମ୍ୟ କୃଷି କର୍ମଚାରୀଙ୍କ ପ୍ରତି ବିଭାଗୀୟ ହେୟଜ୍ଞାନ , ଅବହେଳା ତଥା ନିଷ୍ଠୁରତା କୁ କୃଷି କର୍ମଚାରୀ ମାନେ ଅଧିକ ଦିନ ବରଦାସ୍ତ କରିବାକୁ ଉଚିତ ମାନେ କରୁ ନାହାନ୍ତି।

ଏଣୁ ବାଧ୍ୟ ହୋଇ ନିଜ ପେଟ ପାଟଣା ଓ ଭବିଷ୍ୟତ ର ସୁରକ୍ଷା ଦୃଷ୍ଟିରୁ ସାରା ରାଜ୍ୟର ସମସ୍ତ ଗ୍ରାମ୍ୟ କୃଷି କର୍ମଚାରୀ ଫେବୃୟାରୀ ୮ ତାରିଖ ଠାରୁ ୧୨ ତାରିଖ ପର୍ଯ୍ୟନ୍ତ ବ୍ୟକ୍ତିଗତ ମୋବାଇଲକୁ କୌଣସି ସରକାରୀ ସେବା ନିମନ୍ତେ ଆମେ ବ୍ୟବହାର କରି ନାହୁଁ ଓ ଅଧିକାରୀଙ୍କ ଦ୍ଵାରା ଗଠିତ ଗ୍ରୁପ / ଆପ ରୁ ଓହରି ଆସିଛୁ। ଏହା ସତ୍ତ୍ୱେ କର୍ତ୍ତୁପକ୍ଷ ତଥାପି ଆମ ଦାବି ପୁରଣରେ ଉଦାସୀନ ରହିଛନ୍ତି। ତେଣୁ ଆସନ୍ତା ୧୩ ତାରିଖରୁ ୧୯ ତାରିଖ ପର୍ଯ୍ୟନ୍ତ ସମ୍ପୃକ୍ତ ଜିଲ୍ଲାର ଗ୍ରାମ୍ୟ କୃଷି କର୍ମଚାରୀ ଜିଲ୍ଲା ମୁଖ୍ୟ କୃଷି ଅଧିକାରୀଙ୍କ ସରକାରୀ ଦପ୍ତର ସମ୍ମୁଖରେ ସାମୁହିକ ଶାନ୍ତି ପୂର୍ଣ୍ଣ ଧାରଣା ଦିଆଯିବ।

ଏହା ସତ୍ତ୍ୱେ କର୍ତ୍ତୁପକ୍ଷ ତଥାପି ଆମ ଦାବି ପୁରଣରେ ଯଦି ଉଦାସୀନ ରହନ୍ତି, ତେବେ ଆସନ୍ତା ୨୦ ତାରିଖ ଠାରୁ ଦାବି ପୂରଣ ପର୍ଯ୍ୟନ୍ତ କୃଷି ଭବନ, ଭୁବନେଶ୍ଵର ଠାରେ ଶାନ୍ତି ପୂର୍ଣ୍ଣ ଭାବେ ଅନିର୍ଦ୍ଧିଷ୍ଠ କାଳ ପର୍ଯ୍ୟନ୍ତ ଧାରଣାରେ ବସିରହିବୁ।

ଏହି କାର୍ଯ୍ୟକ୍ରମ ପାଇଁ ଯଦି କୃଷି ଓ କୃଷକଙ୍କ ସ୍ଵାର୍ଥରେ ହାନି ଘଟେ ସେଥିପାଇଁ ବିଭାଗ ବା ସରକାର ଦାୟୀ ରହିବେ। କୃଷି ବିଭାଗର ଏହି ଅବହେଳିତ କର୍ମଚାରୀଙ୍କ ପ୍ରତି ନ୍ୟାୟ ପ୍ରଦାନ ନିମନ୍ତେ ସଦୟ ଦୃଷ୍ଠି ଦେବା ସହ ଆମର ବାଞ୍ଛିତ ଓ ପ୍ରତିଖିତ ନ୍ୟାୟୋଚିତ ଦାବି ପୂରଣ ନିମନ୍ତେ କର୍ତ୍ତୁପକ୍ଷ ବଳିଷ୍ଠ ଓ ତତ୍କାଳୀନ କାର୍ଯ୍ୟନୁଷ୍ଠାନ ଗ୍ରହଣ କରିବେ ବୋଲି ଓଡିଶା ଗ୍ରାମ୍ୟ କୃଷି କର୍ମଚାରୀ ସଂଘ ଆଶା ପ୍ରକଟ କରିଛି।

ରେଢାଖୋଲ: ସୃଜନଶୀଳତାର ବିକଳ୍ପ ନାହିଁ। ଯନ୍ତ୍ରଣାରୁ ସୃଷ୍ଟି ହୋଇଥିବା ସାହିତ୍ୟ କାଳଜୟୀ ହୋଇଥାଏ। ଏହା ସମସ୍ତ କଷ୍ଟ ପ୍ରକଟିତ କରିବାକୁ ସାମର୍ଥ୍ୟ ହୋଇଥାଏ। ସାହିତ୍ୟ ହେଉଛି ଆତ୍ମଚିନ୍ତନ ଓ ଆତ୍ମବନ୍ଧନକୁ ସଂଯୋଗ କରୁଥିବା ଏକ ସେତୁ। ସାହିତ୍ୟକୁ ଗତିଶୀଳତା କରିବା ଦିଗରେ ସାହିତ୍ୟ ଉତ୍ସବ ଏକ ନିର୍ଣ୍ଣାୟକ ଭୂମିକା ଗ୍ରହଣ କରିଥାଏ ବୋଲି ସୁଚିତ୍ରା ପତ୍ରିକାର ପଞ୍ଚମ ସ୍ବନକ୍ଷତ୍ର ଉତ୍ସବ ଅବସରରେ ଅତିଥିମାନେ ମତବ୍ୟକ୍ତ କରିଛନ୍ତି।

ନାକଟିଦେଉଳ ବ୍ଲକ୍ ସଭା ଗ୍ରୁହରେ ଅନୁଷ୍ଠିତ ସୁଚିତ୍ରା ର ପଞ୍ଚମ ସ୍ବନକ୍ଷତ୍ର ଉତ୍ସବର ପ୍ରଥମ ପର୍ଯ୍ୟାୟରେ ରାଜ୍ୟସ୍ତରୀୟ କବିତା ପାଠୋତ୍ସବ ସଭାପତି ରଘୁନାଥ ପ୍ରଧାନଙ୍କ ସଭାପତିତ୍ବରେ ଅନୁଷ୍ଠିତ ହୋଇଥିଲା। ସମ୍ମାନୀତ ଅତିଥି ଭାବରେ କବି ମାନିନୀ ମିଶ୍ର, କବି ଅଧ୍ୟାପକ ବିପିନ୍ ମହାନନ୍ଦ ପିନାକୀ ମିଶ୍ର , ରାହାସ ନାଏକ ଯୋଗଦେଇଥିବା ବେଳେ ସଂଯୋଜକ ଭାବରେ ,ଅଧ୍ୟାପକ ଶେଷଦେବ ବିଶ୍ବାଳ , ଆକାଶ ସାହୁ , ଗୀତାରାଣୀ ସାହୁ, ଆକାଶ ଦାସ୍ ପ୍ରମୁଖ ଯୋଗଦେଇଥିଲେ। ରାଜ୍ୟର ବିଭିନ୍ନ ପ୍ରାନ୍ତରୁ ୯୫ କବି କବୟତ୍ରୀ କବିତା ପାଠ କରିଥିଲେ।

ଦ୍ବିତୀୟ ପର୍ଯ୍ୟାୟରେ ଅନୁଷ୍ଠିତ ଆଲୋଚନାଚକ୍ରରେ ସଭାପତିତ୍ବ କରିଥିଲେ ଦିପେନ୍ କୁମାର ପଟ୍ଟନାୟକ ,ମୁଖ୍ୟଅତିଥି ଭାବରେ ଡଃ ତପସ୍ବିନୀ ଗୁରୁ , ମୁଖ୍ୟବକ୍ତା ଡଃ ମନୋଜ କୁମାର ପଣ୍ଡା , ବିଶେଷ ଅତିଥି ଭାବରେ ସମ୍ବାଦ ସମ୍ବଲପୁର ସଂସ୍କରଣର ସମ୍ପାଦନା ବିଭାଗର ମୁଖ୍ୟ କବି ଲକ୍ଷ୍ମୀନାରାୟଣ ହୋତା , ଚଳଚ୍ଚିତ୍ର କଳା ନିର୍ଦ୍ଦେଶକ କଳିଙ୍ଗ କେଶରୀ ନାୟକ ପ୍ରମୁଖ ଯୋଗଦେଇ ସାହିତ୍ୟ ବଂଚିଲେ ଦେଶ ବଂଚିବ , ସାହିତ୍ୟ ବିନା ମଣିଷ ବଂଚି ପାରିବ ନାହିଁ ବୋଲି ମତବ୍ୟକ୍ତ କରିଥିଲେ। ସୁଚିତ୍ରାର ବିଭିନ୍ନ ବିଭାଗ ପାଇଁ ଲେଖକମାନଙ୍କୁ ସମ୍ମାନୀତ କରାଯାଇଥିଲା। ସୁଚିତ୍ରା ସ୍ମ୍ୁତି ସମ୍ମାନ କବି ମମତା ପଟ୍ଟନାୟକ (ଭୁବନେଶ୍ବର), ଶିଶୁ ସାହିତ୍ୟ ପାଇଁ ପ୍ରଶାନ୍ତ କୁମାର ମଙ୍ଗରାଜ, (ପୁରୀ), କବିତା ପାଇଁ ପିନାକୀ ମିଶ୍ର ,କବି ପୀତାମ୍ବର ବିଶ୍ବାଳ ସ୍ର୍ମୁତି ସମ୍ମାନ ପାଇଁ ହରିହର ସାହୁ , ଯୁବ ପ୍ରତିଭା ସମ୍ମାନ କୁଳମଣି ମେହେର , ପ୍ରଚ୍ଚ୍ଛଦପଟ୍ଟ ପାଇଁ ପ୍ରଗତି ବଳଙ୍କୁ ଉତ୍ତରୀୟ ଓ ମାନପତ୍ର ଦେଇ ସମ୍ମାନୀତ କରାଯାଇଥିଲା।

ସରସ୍ବତୀ ଶିଶୁ ମନ୍ଦିର, ଜଗନ୍ନାଥପ୍ରସାଦର ଛାତ୍ରଛାତ୍ରୀମାନେ ପ୍ରାରମ୍ଭିକ ସଂଗୀତ ଗାନ କରିବା ସହ ବିଜାଗଜ ଉଚ୍ଚପ୍ରାଥମିକ ବିଦ୍ୟାଳୟର ଛାତ୍ରୀମାନେ ସ୍ବାଗତ ନ୍ରୁତ ପରିବେଶଣ କରିଥିଲେ। ସଂଗ୍ରାମ କେଶରୀ ପୃଷ୍ଟି କାର୍ଯ୍ୟକ୍ରମ ପରିଚାଳନା କରିଥିବା ବେଳେ ସଂପାଦକ କନ୍ଦର୍ପ ବେହେରା ସଂପାଦକୀୟ ବକ୍ତବ୍ୟ ଓ ଅତିଥି ପରିଚୟ ପ୍ରଦାନ କରିଥିଲେ। ପ୍ରଦୀପ କୁମାର ବିଶ୍ବାଳ, ସୁଶାନ୍ତ ସାହୁ, ଶିକ୍ଷକ ପରମେଶ୍ବର ପ୍ରଧାନ, ଅଚ୍ୟୁତାନନ୍ଦ ବିଶ୍ବାଳ ପ୍ରମୁଖ ସହଯୋଗ କରିଥିଲେ। ଅଧ୍ୟାପିକା ପୁଷ୍ପାଞଳୀ ରାବଣା ଧନ୍ୟବାଦ ଅର୍ପଣ କରିଥିଲେ।

ଭୁବନେଶ୍ୱର: ଓଡ଼ିଶା ମାଧ୍ୟମିକ ସ୍କୁଲ ଶିକ୍ଷକ ସଂଘ (ଓଷ୍ଟା)ର ଆହ୍ୱାନରେ ଚାଲିଥିବା ଅହୋରାତ୍ର ଗଣଧାରଣା ଷଷ୍ଠ ଦିବସରେ ଉପନୀତ ହୋଇଛି। ଶୀତ କାକରକୁ ଖାତିର ନକରି ସମଗ୍ର ଓଡ଼ିଶାରୁ ଅନେକ ଶିକ୍ଷକ, ଶିକ୍ଷୟିତ୍ରୀ ଓ ଶିକ୍ଷା କର୍ମଚାରୀ ରାଜଧାନୀର ରାଜଦାଣ୍ଡରେ ଅହୋରାତ୍ର ଧାରଣରେ ବସି ରହିଛନ୍ତି। ସଂଗଠନର ପ୍ରମୁଖ ଦାବି ଗୁଡ଼ିକ ମଧ୍ୟରେ ପଚିଶ ବର୍ଷ ହେଲା ଅନୁଦାନ ଯୋଗ୍ୟ ବିଦ୍ୟାଳୟକୁ ଅନୁଦାନ ନାହିଁ, ସେମାନଙ୍କ ପାଇଁ ତୁରନ୍ତ ଅନୁଦାନର ବ୍ୟବସ୍ଥା କରିବା, ଅବସର ପରେ ବଞ୍ଚିବା ପାଇଁ ପେନସନ୍ ଓ ଅବସରକାଳୀନ ସୁବିଧା ପ୍ରଦାନ କରିବା, ଯେଉଁସବୁ ଯୋଗ୍ୟ ବିଦ୍ୟାଳୟକୁ ସପ୍ତମ ବେତନରୁ ବଞ୍ଚିତ କରି ରଖାଯାଇଛି ସେମାନଙ୍କ ପାଇଁ ଏହା ଯଥାଶିଘ୍ର ଲାଗୁ କରିବା, ସବୁ ବିଦ୍ୟାଳୟକୁ ସରକାରୀ ଘୋଷଣା କରିବା, ଚୁକ୍ତିଭିତ୍ତିକ ଶିକ୍ଷକଙ୍କୁ ନିଯୁକ୍ତି ଦିନଠାରୁ ବରିଷ୍ଠତା ପ୍ରଦାନ କରିବା, ଅବସର ବୟସ ସୀମା ୬୨ ବର୍ଷକୁ ବୃଦ୍ଧି ସହିତ ନୂତନ ପେନସନ୍ ଯୋଜନା ପ୍ରତ୍ୟାହାର କରି ପୁରୁଣା ପେନସନ୍ ଯୋଜନା ଲାଗୁ କରିବା, ଖାଲିପଡ଼ିଥିବା ଶିକ୍ଷକ ପଦବୀ ତୁରନ୍ତ ପୂରଣ କରିବା ଇତ୍ୟାଦି।

ଓଷ୍ଟାର ସାଧାରଣ ସଂପାଦକ ରଞ୍ଜନ କୁମାର ଦାଶ କହିଛନ୍ତି- ସରକାର ଶିକ୍ଷକମାନଙ୍କୁ ସମସ୍ୟା ଭିତରେ ବୁଡ଼ାଇ ରଖି ଶିକ୍ଷାବ୍ୟବସ୍ଥାକୁ ସଜାଡ଼ିବାର ସ୍ୱପ୍ନ ଯଦି ଦେଖୁଥାନ୍ତି ତେବେ ତାହା ଦିବା ସ୍ୱପ୍ନରେ ପରିଣତ ହେବ। ଶିକ୍ଷକଙ୍କୁ ମାନସିକ ଯନ୍ତ୍ରଣା ଦେଇ ଗୁଣାତ୍ମକ ଶିକ୍ଷାର ସ୍ଲୋଗାନ୍ ଦେବା ରାଜ୍ୟବାସୀଙ୍କ ପାଇଁ ଛଳନା ଓ ପ୍ରତାରଣା ଛଡ଼ା ଆଉ କିଛି ନୁହେଁ। ଅହୋରାତ୍ର ଧାରଣା ଆଜି ଷଷ୍ଠ ଦିନରେ ପହଞ୍ଚିଲାଣି, ହଜାର ହଜାର ଶିକ୍ଷକ, ଶିକ୍ଷୟିତ୍ରୀ ଓ ଶିକ୍ଷାକର୍ମଚାରୀ ଘରଦ୍ୱାର ଛାଡ଼ି ଅତ୍ୟନ୍ତ ଦୟନୀୟ ଅବସ୍ଥାରେ ରାଜରାସ୍ତାରେ ପଡ଼ି ରହିଛନ୍ତି। ସରକାର ଆନ୍ଦୋଳନସ୍ଥଳକୁ ଆସୁ ନାହାନ୍ତି କି ଆଲୋଚନା କରୁ ନାହାନ୍ତି। ଆମ ରାଜ୍ୟର ଶାସନ ବ୍ୟବସ୍ଥା ରାଜତନ୍ତ୍ରର ଶାସନ ବ୍ୟବସ୍ଥାଠାରୁ ମଧ୍ୟ ବଳି ଗଲାଣି। ସରକାର ଡାକି ଆଲୋଚନା କରିବେ କି କରିବେ ନାହିଁ, ଦାବି ପୂରଣ କରିବେ କି ନାହିଁ ଏହିସବୁ ସରକାରଙ୍କ ଉପରେ ନିର୍ଭର କରେ। ବିଦ୍ୟାଳୟ ଗୁଡ଼ିକ ସବୁ ବନ୍ଦ ହୋଇ ଯାଉ, ରାଜ୍ୟର ୭୦ ଭାଗରୁ ଊର୍ଦ୍ଧ୍ୱ ଛାତ୍ରଛାତ୍ରୀ ଯେଉଁମାନେ ଏହିସବୁ ବିଦ୍ୟାଳୟରେ ପଢ଼ୁଛନ୍ତି ସେମାନଙ୍କର ପାଠପଢ଼ା ଠପ୍ ହୋଇଯାଉ ବୋଧହୁଏ ସରକାରଙ୍କର ଏହା ଏକାନ୍ତ ଇଚ୍ଛା। ତେଣୁ ଆମେ ନାଚାର। ସରକାରଙ୍କର ଶିକ୍ଷା ଓ ଶିକ୍ଷକମାରଣ ନୀତି ବିରୁଦ୍ଧରେ ପ୍ରଚାର ଅଭିଯାନ ଚାଲିବ।

ସରକାର ତୁରନ୍ତ ଏହି ସମସ୍ତ ନ୍ୟାୟୋଚିତ ଦାବିକୁ ମାନିନେବା ଉଚିତ। ସରକାର ରାଜ୍ୟର ମାଧ୍ୟମିକ ବିଦ୍ୟାଳୟ ମାନଙ୍କର ଭିତ୍ତିଭୂମିର ବିକାଶ କରିଛନ୍ତି। କେବଳ ଭିତ୍ତିଭୂମିର ବିକାଶ କରିଦେଇ ଶିକ୍ଷକମାନଙ୍କୁ ନାନା ସମସ୍ୟାରେ ଉବୁଟୁବୁ କରି ଯଦି ରାଜ୍ୟରେ ଶିକ୍ଷାର ଗୁଣାତ୍ମକ ମାନ ବୃଦ୍ଧି କରିବା ପାଇଁ ଚାହୁଁଥାନ୍ତି ତାହା ଅବାସ୍ତବ। ରାଜ୍ୟର ମାନ୍ୟବର ମୁଖ୍ୟମନ୍ତ୍ରୀ ବିଭିନ୍ନ ବର୍ଗର ଶିକ୍ଷକ ମାନଙ୍କ ମଧ୍ୟରେ ଥିବା ସମସ୍ୟାକୁ ଆନ୍ତରିକତାର ସହ ସମାଧାନ କରନ୍ତୁ ବୋଲି ରାଜ୍ୟ ଓଷ୍ଟାର ନେତୃତ୍ୱ ସଭାପତି ଅକ୍ଷୟ କୁମାର ମିଶ୍ର, କାର୍ଯ୍ୟକାରୀ ସଭାପତି ନୀଳମଣି ପୁରୋହିତ, ସାଧାରଣ ସଂପାଦକ ରଞ୍ଜନ କୁମାର ଦାଶ, ଯୁଗ୍ମ ସାଧାରଣ ସଂପାଦକ ବ୍ରଜକିଶୋର ବିଶ୍ୱାଳ, କୋଷାଧ୍ୟକ୍ଷ ଅଶୋକ କୁମାର ମହାପାତ୍ର, ଶିକ୍ଷାପ୍ରଦୀପ ସଂପାଦକ ଶଙ୍କର କୁମାର ସୁବୁଦ୍ଧି ପ୍ରମୁଖ ସରକାରଙ୍କ ନିକଟରେ ଦୃଢ଼ ଦାବି ଉପସ୍ଥାପନ କରିଛନ୍ତି।