Tag: ବିଜେଡି

ଦୁଷ୍ମନ୍ତ କୁମାର ପଣ୍ଡା

କଳାହାଣ୍ଡି: ରାଜ୍ୟରେ ଦୀର୍ଘ ଦୁଇ ଦଶନ୍ଧିରୁ ଉର୍ଦ୍ଧ୍ବ ସମୟ ଅପ୍ରତିଦ୍ବନ୍ଦି ଭାବେ ବିଜେଡି ଏକ ସ୍ଥିର ସରକାର ଶାସନ କରିବାରେ ଅପୁର୍ବ ସଫଳତା ଲାଭ କରିପାରିଛି। କେନ୍ଦ୍ରରେ ଏକ ସ୍ଥିର ସରକାର ଦେଇଥିବା ବିଜେପି ଏବଂ ସର୍ବ ପୁରାତନ କଂଗ୍ରେସ ଦୁହିଁଙ୍କ ପଦର୍ଶନ ଓଡ଼ିଶାରେ ଅତ୍ୟନ୍ତ ଦୟନୀୟ। ରାଜ୍ୟରେ ବିଜେପି ଆଖି ଦୃଶିଆ ପ୍ରଦର୍ଶନ କରିପାରିନି ତଥାପି ଦ୍ଵିତୀୟ ସର୍ବବୃହତ ଦଳ ଭାବେ ରାଜ୍ୟରେ ବିରୋଧି ଦଳର ଭୂମିକା ନିର୍ବାହ କରୁଛି।

ଅବଶ୍ୟ କଳାହାଣ୍ଡି ଜିଲ୍ଲାରେ ବିଜେପିର ସ୍ଥିତି ବିଗତ ଦିନରେ ବେଶ ସୁଦୃଢ଼ ଥିଲା। ଯାହାର ଶ୍ରେୟ ପ୍ରଦୀପ୍ତ ନାୟକଙ୍କର ସାଂଗଠନିକ କଳାଚାତୁରୀ ଯୋଗୁଁ ସମ୍ଭବ ହୋଇଥିବା ରାଜନୈତିକ ସମୀକ୍ଷକମାନେ କହନ୍ତି। ତେଣୁ ତାଙ୍କୁ ରାଜ୍ୟ ବିଜେପି ବିରୋଧୀଦଳ ନେତା ଭାବେ ପଦାସିନ କରାଯାଇଥିଲା। କିନ୍ତୁ ଦୁର୍ଭାଗ୍ୟକୁ ଶ୍ରୀ ନାୟକ ଭୟଙ୍କର କୋରୋନାର ଶିକାର ହୋଇ ଅଦ୍ୟାବଧି ସଂପୂର୍ଣ୍ଣ ସୁସ୍ଥ ହୋଇପାରି ନାହାନ୍ତି। ଦୀର୍ଘଦିନ ବିରୋଧୀ ଦଳ ନେତାପଦ ଏକ ପ୍ରକାର ଖାଲି ପଡ଼ିଥିବାରୁ ଦଳ ପକ୍ଷରୁ ଶେଷରେ ନୂତନ ବିରୋଧୀ ଦଳ ନେତା ଭାବେ ଜୟନାରାୟଣ ମିଶ୍ରଙ୍କୁ ଦାୟିତ୍ୱ ଦେଇଛି।

ଆଗାମୀ ସାଧାରଣ ନିର୍ବାଚନକୁ ଦୃଷ୍ଟିରେ ରଖି ରାଜ୍ୟରେ ଶାସକ ବିଜେଡି ନିଜର ସଂଗଠନକୁ ସୁଦୃଢ଼ କରୁଥିବାବେଳେ ଜୟନାରାୟଣଙ୍କୁ ନୂଆ ନିଯୁକ୍ତି ଦେଇ ବିଜେପି ଓଡ଼ିଶାରେ ପୁଣିଥରେ ନିଜର ପୁରୁଣା ଆଭିମୁଖ୍ୟ ଆପଣାଇବ ବୋଲି ସନ୍ଦେଶ ଦେବାକୁ ପ୍ରୟାସ କରିଛି। ଯଦିଓ କେନ୍ଦ୍ର ସରକାରଙ୍କର ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଗୁଡିକୁ ପରୋକ୍ଷରେ ଅବା ପ୍ରତ୍ୟକ୍ଷରେ ବିଜେଡି ସର୍ବଦା ସମର୍ଥନ କରି ରାଜନୈତିକ ଫାଇଦା ହାସଲ କରିବାରେ ସଫଳ ହୋଇଛି।

ରାଜ୍ୟରେ ଶାସକ ଦଳ ସମସ୍ତ କେନ୍ଦ୍ରୀୟ ଯୋଜନାକୁ କୂଟନୈତିକ କୌଶଳରେ ରାଜ୍ୟର ସମସ୍ତ ଯୋଜନା ନିଜର ବୋଲି ଉପସ୍ଥାପନ କରି ଜନତାଙ୍କର ପ୍ରିୟଭାଜନ ହୋଇପାରିଥିବା ବେଳେ ବିଜେପି କେନ୍ଦ୍ରୀୟ ଅନୁଦାନର ରାଜନୈତିକ ଫାଇଦା ହାସଲ କରିବାରେ ସମ୍ପୂର୍ଣ୍ଣ ବିଫଳ ହୋଇଛି। ଆଉ ଏକ ବିଷୟ ବିଜେପିର ନିର୍ବାଚିତ ପ୍ରତିନିଧି ମାନଙ୍କର ଉପରେ ଦଳର ଆୟତ୍ତ ନଥିବାରୁ ଦଳୀୟ ସଙ୍ଗଠନକୁ ଅଣଦେଖାକରି ନିଜସ୍ୱ ବ୍ୟକ୍ତିଗତ କର୍ମୀଙ୍କୁ ଅଗ୍ରାଧିକାର ଦେଉଥିବାରୁ ତୃଣମୂଳ ସ୍ତରରେ କର୍ମୀ ଅସନ୍ତୋଷ ହେବା ଦଳ ପାଇଁ ଶୁଭଙ୍କର ନୁହେଁ ବୋଲି ବୁଦ୍ଧିଜୀବୀ ମହଲରେ ପ୍ରତିକ୍ରିୟା ପ୍ରକାଶ ପାଇଛି। ବର୍ତ୍ତମାନ ସ୍ଥିତିରେ ଜୟନାରାୟଣ ମିଶ୍ରଙ୍କୁ ଦିଆଯାଇଥିବା ନୂତନ ଦାୟିତ୍ବ କେତେଦୂର ଓଡ଼ିଶାର ବିଜେପି ସଙ୍ଗଠନକୁ ମଜବୁତ କରିବ ସମସ୍ତଙ୍କର ନଜର ରହିଛି।

ଆଗାମୀ ସାଧାରଣ ନିର୍ବାଚନକୁ ଦୃଷ୍ଟିରେ ରଖି ବିଜେପି ଓ ବିଜେଡି ମଧ୍ୟରେ ପୁଣିଥରେ ରାଜନୀତିକ ଛକାପଞ୍ଝା ଓ ଉଷ୍ମତା ବୃଦ୍ଧି ପାଇବ ବୋଲି ଆଶଙ୍କା କରାଯାଉଛି। ଶ୍ରୀ ମିଶ୍ର କହିଛନ୍ତି ଯେ, ଦଳ ତାଙ୍କ ଉପରେ ବିଶ୍ୱାସ କରି ଦେଇଥିବା ଗୁରୁଦାୟିତ୍ୱକୁ ସେ ସମ୍ପାଦନ କରିବାକୁ ପୂର୍ଣ୍ଣ ପ୍ରୟାସ କରିବେ।

୨୦୧୯ ସାଧାରଣ ନିର୍ବାଚନ ପରଠୁ ବିଜେପିର କେନ୍ଦ୍ରୀୟ ନେତୃତ୍ୱଙ୍କୁ ସୁହାଇବା ଭଳି ଅନେକ ନିଷ୍ପତ୍ତି ବିଜେଡି ସୁପ୍ରିମୋ ନେଇଛନ୍ତି, ଯାହାକି ପରୋକ୍ଷରେ ରାଜ୍ୟରେ ବିଜେପି ସଂଗଠନକୁ ଦୁର୍ବଳ କରାଇଛି। ଏହାର ପରିଣାମ ମଧ୍ୟ ବିଜେପିକୁ ଗତ ତ୍ରିସ୍ତରୀୟ ପଞ୍ଚାୟତ, ପୌର ଓ ସମବାୟ ନିର୍ବାଚନରେ ଭୋଗିବାକୁ ପଡିଛି। ଓଡ଼ିଶାରୁ ୩ଜଣଙ୍କୁ କେନ୍ଦ୍ରମନ୍ତ୍ରୀ ଓ ଜଣେ ଆଦିବାସୀ ମହିଳାଙ୍କୁ ମହାମହିମ ରାଷ୍ଟ୍ରପତି ପଦରେ ଆସୀନ କରିବା ରାଜ୍ୟ ବିଜେପି ତାହାର ଫାଇଦା ହାସଲ କରିନପାରିବା ରାଜ୍ୟ ନେତୃତ୍ୱର ଅପାରଗତା ପଦାରେ ପଡିଛି।

ଉଲ୍ଲେଖଯୋଗ୍ୟ, ବିଜେଡି ନେତୃତ୍ୱ ସମଦୂରତ୍ୱ ରଣନୀତିର ଆଳ ଦେଖାଇ ବାସ୍ତବରେ କେନ୍ଦ୍ରରେ ବିଜେପି ସରକାର ଓ ବିଜେପି ନେତୃତ୍ୱଙ୍କୁ ସୁହାଇବା ଭଳି ନିଷ୍ପତ୍ତି ନେଇ ସୁଚିନ୍ତିତ ଢଙ୍ଗରେ ରାଜ୍ୟରେ ବିରୋଧୀ ଦଳକୁ ନିଷ୍ପ୍ରଭ କରିବାକୁ ପ୍ରୟାସ କରିଛନ୍ତି। ୨୦୧୫ରେ ଜିଏସଟି ବିଲ, ୨୦୧୬ରେ ବିମୁଦ୍ରାକରଣ, ୨୦୧୭ରେ ଏନଡିଏ ରାଷ୍ଟ୍ରପତି ପ୍ରାର୍ଥୀ ରାମନାଥ କୋବିନ୍ଦଙ୍କୁ ସମର୍ଥନ, ୨୦୧୮ ଜୁଲାଇ ୨୦ରେ ମୋଦି ସରକାର ବିରୁଦ୍ଧରେ ଅନାସ୍ଥା ପ୍ରସ୍ତାବବେଳେ ସଂସଦରୁ ନାଟକୀୟ ଢଙ୍ଗରେ କକ୍ଷତ୍ୟାଗ କରି ବିଜେଡି ସିଧାସଳଖ ନିଜର ଘନିଷ୍ଠତାର ପ୍ରମାଣ ଦେଇଥିଲା।

୨୦୧୮ ଅଗଷ୍ଟ ୮ରେ ବିଜେଡି ନିଜର ସମ୍ପର୍କକୁ ଆଉ ପାଦେ ଆଗେଇ ନେଇ ଏନଡିଏର ରାଜ୍ୟସଭା ଉପାଧ୍ୟକ୍ଷ ପ୍ରାର୍ଥୀ ହରିବଂଶ ନାରାୟଣ ସିଂଙ୍କୁ ସମର୍ଥନ ଦେଲା। ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ବିଜେଡି ସାଂସଦଙ୍କ ସମର୍ଥନ, କଶ୍ମୀରରେ ଧାରା-୩୭୦ର ଉଚ୍ଛେଦ, ଟ୍ରିପଲ ତଲାକ ବିଲ୍ , ନାଗରିକତା ସଂଶୋଧନ ବିଲ୍ (ସିଏଏ)କୁ ସମର୍ଥନ ଦେବାକୁ ପଛାଇ ନଥିଲା।

୨୦୧୯ ଜୁନ୍ ମାସରେ ବିଜେପିର ରାଜ୍ୟସଭା ପ୍ରାର୍ଥୀ ଅଶ୍ୱିନୀ ବୈଷ୍ଣବଙ୍କୁ ସମର୍ଥନ ଦେଇ ଓ ନିଜର ଜିତିବା ସିଟକୁ ଛାଡ଼ି ଦେଇ ବିଜେଡି ସମସ୍ତଙ୍କୁ ଚକିତ କରିଦେଇଥିଲା। ୨୦୨୨ରେ ଏନଡିଏ ରାଷ୍ଟ୍ରପତି ଓ ଉପରାଷ୍ଟ୍ରପତି ପ୍ରାର୍ଥୀଙ୍କୁ ମଧ୍ୟ ସମର୍ଥନ ଦେବାକୁ ବିଜେଡି ପଛାଇ ନାହିଁ। ଏଭଳି ସମର୍ଥନ ଦେଇ ବିଜେଡି ପରୋକ୍ଷରେ ରାଜ୍ୟରେ ବିଜେପି ସଂଗଠନକୁ ଦୁର୍ବଳ କରାଉଥିବା ପ୍ରତ୍ୟୟ ହେଉଛି। ଯାହାଫଳରେ ତୃଣ ମୂଳ ସ୍ତରରେ ବିଜେପି କର୍ମୀମାନେ ଏକ ପ୍ରକାର ହତାଶ ହୋଇ ବିଜେଡିକୁ ମୁହାଇବା ସମ୍ଭାବନାକୁ ଏଡାଇ ଦିଆ ଯାଇ ନ ପାରେ।

ରାଜ୍ୟରେ ନିର୍ବାଚନରେ ବିଜେପିର କ୍ରମାଗତ ବିଫଳତା ଏବଂ ରାଜ୍ୟ ତଥା ଜିଲ୍ଲା ସ୍ତରରେ ସଂଗଠନର ମଙ୍ଗୁଆଳ ମାନଙ୍କର ପରିଚାଳନା କାର୍ଯ୍ୟକର୍ତ୍ତାଙ୍କର ମନରେ ଉତ୍ସାହ ଓ ଉର୍ଜ୍ଜା ପ୍ରଦାନ କରିବାରେ ଆଶାନୁରୂପ ଭାବେ ଫଳ ପ୍ରଦ ହୋଇପାରି ନାହିଁ। ସାମୁହିକ ଶକ୍ତିକୁ ପ୍ରଦାନ କରିବା ପରିବର୍ତ୍ତେ ସମସ୍ତ ବରିଷ୍ଠ ନେତୃବୃନ୍ଦ ନିଜସ୍ୱ ସ୍ୱାର୍ଥକୁ ଅଗ୍ରାଧିକାର ଦେଉଥିବା କାର୍ଯ୍ୟକର୍ତ୍ତାଙ୍କ ମହଲରେ ଶୁଣିବାକୁ ମିଳୁଛି।

ବିଶେଷ କରି କଳାହାଣ୍ଡିରେ ବିଜେପିର ସ୍ଥିତି କ୍ରମଶଃ ଦୁର୍ବଳ ହେବାରେ ଲାଗିଛି। ଓଡ଼ିଶାରେ ବିଜେପି ଶାସକ ଦଳର ନୀତି ଯାହା ଅଛି ତାକୁ କାଟୁ କରିବାର ବାଟ ବାହାର ନକଲେ ବିଜେପିର ସ୍ଥିତିରେ ବିଶେଷ ପରିବର୍ତ୍ତନ ହେବା କଷ୍ଟକର ବୋଲି ଦଳର ବରିଷ୍ଠ ସଦସ୍ୟ ମାନେ ମତବ୍ୟକ୍ତ କରିଛନ୍ତି।

ନୂଆଦିଲ୍ଲୀ: ଦେଶରେ ରାଷ୍ଟ୍ରପତି ନିର୍ବାଚନ ସମାପ୍ତ ହେବା ପରେ ବର୍ତ୍ତମାନ ଉପରାଷ୍ଟ୍ରପତି ନିର୍ବାଚନ ହେବାକୁ ଯାଉଛି। ଉପରାଷ୍ଟ୍ରପତି ନିର୍ବାଚନ ପାଇଁ ମତଦାନ ଅଗଷ୍ଟ ୬ ତାରିଖରେ ଅନୁଷ୍ଠିତ ହେବ ଏବଂ ସେହି ଦିନ ଏହାର ଫଳାଫଳ ଘୋଷଣା କରାଯିବ। ରାଷ୍ଟ୍ରପତି ନିର୍ବାଚନରେ ​​ଏନଡିଏ ପ୍ରାର୍ଥୀ ଦ୍ରୌପଦୀ ମୁର୍ମୁ ପ୍ରଥମ ମହିଳା ଆଦିବାସୀ ରାଷ୍ଟ୍ରପତି ହୋଇ ବିରୋଧୀ ପ୍ରାର୍ଥୀ ଯଶବନ୍ତ ସିହ୍ନାଙ୍କ ବିରୋଧରେ ଏକ ବଡ଼ ବିଜୟ ହାସଲ କରିଥିଲେ। ବର୍ତ୍ତମାନ ପରବର୍ତ୍ତୀ ପରୀକ୍ଷା ଏନଡିଏର ଉପରାଷ୍ଟ୍ରପତି ପ୍ରାର୍ଥୀ ଜଗଦୀପ ଧନଖଡଙ୍କ ପାଇଁ, ଯାହାର ସାମ୍ନାରେ ବିରୋଧୀ ପ୍ରାର୍ଥୀ ହେଉଛନ୍ତି କଂଗ୍ରେସ ନେତା ମାର୍ଗରେଟ୍ ଅଲଭା।

ଉପରାଷ୍ଟ୍ରପତି ନିର୍ବାଚନରେ ​​ବିରୋଧୀ ଦଳ ବିଜେଡି ଏବଂ ଏଆଇଏଡିଏମକେ ଏନଡିଏ ପ୍ରାର୍ଥୀ ଜଗଦୀପ ଧନଖଡଙ୍କୁ ସମର୍ଥନ କରିସାରିଛନ୍ତି। ବିଜେଡି ରାଜ୍ୟସଭା ସାଂସଦ ତଥା ସାଧାରଣ ସମ୍ପାଦକ ଗଣମାଧ୍ୟମ ଦାୟିତ୍ୱରେ ଥିବା ମନସ ମଙ୍ଗରାଜ, ଏଆଇଏଡିଏମକେ ନେତା ଏମ ଥାମ୍ବି ଦୁରାଇ ଏବଂ ଜଗନ୍ ମୋହନ ରେଡ୍ଡୀଙ୍କ ନେତୃତ୍ୱରେ YSR କଂଗ୍ରେସ ଦଳର ନେତା ବିଜୟାସାଇ ରେଡ୍ଡୀ କହିଛନ୍ତି ଯେ, ଆମ ଦଳ ଜଗଦୀପ ଧନଖଡଙ୍କୁ ସମର୍ଥନ କରିବ। ଏନଡିଏ ପ୍ରାର୍ଥୀ ଜଗଦୀପ ଧନଖଡଙ୍କୁ ସମର୍ଥନ କରିବା ଲାଗି ତାଙ୍କ ଦଳ ନିଷ୍ପତ୍ତି ନେଇଛି ବୋଲି ସେମାନେ କହିଛନ୍ତି। କାରଣ ସେ ଜଣେ କୃଷକଙ୍କ ପୁଅ ଏବଂ ଏକ ପଛୁଆ ବର୍ଗର ଅଟନ୍ତି।

ରାଷ୍ଟ୍ରପତି ପ୍ରାର୍ଥୀ ଭାବରେ ଆଦିବାସୀ ସମ୍ପ୍ରଦାୟରୁ ଆସିଥିବା ଦ୍ରୌପଦୀ ମୁର୍ମୁଙ୍କ ଉପରେ ବିଜେପି ଏକ ବାଜି ଖେଳିଥିଲା ​​ଏବଂ ସହଯୋଗୀ-ବିରୋଧୀଙ୍କ ସମର୍ଥନରେ ବାଜି ଜିତିଥିଲା। ସେହିଭଳି ବିଜେପିର ଦ୍ୱିତୀୟ ବାଜି ହେଉଛି ଜଗଦୀପ ଧନଖରଙ୍କୁ କୃଷକଙ୍କ ପୁଅ ଭାବରେ ପ୍ରାର୍ଥୀ କରିବା। ଯଦି ସବୁ ଠିକ୍ ହୁଏ, ତେବେ ବିଜେପି ସମର୍ଥିତ ଏନଡିଏ ପ୍ରାର୍ଥୀ ଭାବରେ ଜଗଦୀପ ଧନଖଡଙ୍କ ବିଜୟ ମଧ୍ୟ ସମ୍ଭବ ହୋଇପାରେ।

ବିରୋଧୀ ଦଳର ପ୍ରାର୍ଥୀ ଅଲଭା ରାଜ୍ୟସଭାର ଉପ ବାଚସ୍ପତି ତଥା କଂଗ୍ରେସର ଜଣେ ବରିଷ୍ଠ ନେତା ଅଟନ୍ତି। ସେ ୧୯୮୪ ରୁ ୮୫ ପର୍ଯ୍ୟନ୍ତ କେନ୍ଦ୍ର ସରକାରରେ ଯୁବ ଓ କ୍ରୀଡା ମନ୍ତ୍ରଣାଳୟର ରାଜ୍ୟ ମନ୍ତ୍ରୀ ଭାବରେ କାର୍ଯ୍ୟ କରିଛନ୍ତି। ବିରୋଧୀ ପ୍ରାର୍ଥୀ ଭାବରେ ମାର୍ଗରେଟ୍ ଅଲଭାଙ୍କ ନାମ କଂଗ୍ରେସ ଜାଣିଶୁଣି ମନୋନୀତ କରିଛି। କାରଣ ଅଲଭାଙ୍କର ବହୁତ ଅଭିଜ୍ଞତା ଅଛି, ସେ ଜଣେ ମହିଳା। ଏହାସହିତ ଦକ୍ଷିଣରୁ ଆସିଥିବା ସଂଖ୍ୟାଲଘୁ ଖ୍ରୀଷ୍ଟିଆନ ସମ୍ପ୍ରଦାୟର ସେ ଅଟନ୍ତି।

ରାଷ୍ଟ୍ରପତି ନିର୍ବାଚନରେ ​​ବିରୋଧୀ ମତଭେଦ ସ୍ପଷ୍ଟ ଦେଖାଯାଉଥିଲା ଏବଂ ଶାସକ ଦଳ ଏହାର ଲାଭ ପାଇଥିଲେ। କ୍ରସ-ଭୋଟିଂ ଏନଡିଏ ପ୍ରାର୍ଥୀ ମୁର୍ମୁଙ୍କ ବିଜୟକୁ ବଡ କରିଦେଇଥିଲା ଏବଂ ବର୍ତ୍ତମାନ ଉପରାଷ୍ଟ୍ରପତି ନିର୍ବାଚନରେ ​​ମଧ୍ୟ ବିରୋଧୀ ଏକତା ଭାଙ୍ଗୁଥିବା ଜଣାପଡିଛି। ଟିଏମସି ଏହା ପୂର୍ବରୁ ସ୍ପଷ୍ଟ କରିସାରିଛି ଯେ, ଦଳ ନିର୍ବାଚନରୁ ଦୂରେଇ ରହିବ। ୟୁପିଏ ପ୍ରାର୍ଥୀ ମାର୍ଗରେଟ୍ ଅଲଭା କିମ୍ବା ଏନଡିଏ ପ୍ରାର୍ଥୀ ଜଗଦୀପ ଧନଖଡଙ୍କୁ ଭୋଟ୍ ଦେବେ ନାହିଁ ବୋଲି ଟିଏମସି ଘୋଷଣା କରିସାରିଛି।

କଂଗ୍ରେସ ପ୍ରାର୍ଥୀ ମାର୍ଗରେଟ୍ ଅଲଭାଙ୍କୁ ଆରଜେଡି, ଏନସିପି, ଶିବସେନା, ଡିଏମକେ ଏବଂ ସିପିଆଇ (ଏମ) ଭଳି ଦଳ ସମର୍ଥନ କରିବା କଥା କହିଛନ୍ତି। କିନ୍ତୁ ବିରୋଧୀ ଏକତାକୁ ଭାଙ୍ଗି ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ ନିରପେକ୍ଷ ରହିବାକୁ ଘୋଷଣା କରିଛି। ବିରୋଧୀ ପ୍ରାର୍ଥୀ ମାର୍ଗରେଟ୍ ଅଲଭା ଟିଏମସିର ଏହି ନିଷ୍ପତ୍ତିକୁ ନିରାଶାଜନକ ବୋଲି କହିଛନ୍ତି। ସେ କହିଛନ୍ତି ଯେ, ଅହଂକାର କିମ୍ବା କ୍ରୋଧର ସମୟ ନୁହେଁ। ସାହସ, ନେତୃତ୍ୱ ଏବଂ ଏକତା ପାଇଁ ଏହା ଏକ ସମୟ। ଅନ୍ୟପକ୍ଷରେ ମମତା ବାନାର୍ଜୀ କହିଛନ୍ତି ଯେ, ଅଲଭାଙ୍କ ପ୍ରାର୍ଥୀତ୍ୱ ସମ୍ପର୍କରେ ତାଙ୍କଠାରୁ ପରାମର୍ଶ ନିଆଯାଇ ନାହିଁ।

ଟିଏମସି ପକ୍ଷରୁ କୁହାଯାଇଛି ଯେ, ଆମେ ସମସ୍ତେ ସମାନ ଦଳ, ଯାହାର ଉଦ୍ଦେଶ୍ୟ ହେଉଛି ବିଜେପିକୁ ପରାସ୍ତ କରିବା। କିନ୍ତୁ, ଟିଏମସି କଂଗ୍ରେସର ନିର୍ବାଚନ ସହଯୋଗୀ ନୁହେଁ। ତେଣୁ ଟିଏମସିକୁ ସମାନ ଅଂଶୀଦାର ଭାବରେ ଦେଖାଯିବା ଉଚିତ୍। ମମତାଙ୍କ ଏହି ବିବୃତ୍ତିରେ ବିରୋଧୀ ଦଳ ତାଙ୍କୁ ସମାଲୋଚନା କରିଛନ୍ତି ଏବଂ ଏହାକୁ ଧନଖଡଙ୍କ ଚା ପାର୍ଟିର ପ୍ରଭାବ ବୋଲି କହିଛନ୍ତି।

କଣ କୁହେ ନିର୍ବାଚନୀ ସମୀକରଣ?:

ଉପରାଷ୍ଟ୍ରପତି ନିର୍ବାଚନରେ ​​ରାଜ୍ୟସଭାର ୨୩୩ ସାଂସଦ ତଥା ୧୨ ଜଣ ମନୋନୀତ ସାଂସଦ ଏବଂ ଲୋକସଭାର ସମସ୍ତ ୫୪୩ ସାଂସଦ ଭୋଟ୍ ଦେଇଛନ୍ତି। କେବଳ ଲୋକସଭା ଓ ରାଜ୍ୟସଭାରେ ବିଜେପିର ୩୯୪ ସାଂସଦ ଅଛନ୍ତି। ଏଭଳି ପରିସ୍ଥିତିରେ ସେ ନିଶ୍ଚିତ ଭାବେ ଏହି ନିର୍ବାଚନରେ ​​ଆଗରେ ଅଛନ୍ତି। ଏହିପରି, ଏନଡିଏର ପଲ୍ଲା ଭାରୀ ରହିଛି।

ନୂଆଦିଲ୍ଲୀ: ରାଷ୍ଟ୍ରପତି ନିର୍ବାଚନରେ ​​ବିରୋଧୀ ଦଳର ପ୍ରାର୍ଥୀଙ୍କ ନାମ ଉପରେ ସହମତି ପ୍ରକାଶ କରିବା ପାଇଁ ତୃଣମୂଳ କଂଗ୍ରେସ ସଭାପତି ମମତା ବାନାର୍ଜୀ ଆଜି ଅପରାହ୍ନ ୩ ଟାରେ ବିରୋଧୀ ଦଳର ନେତାଙ୍କ ସହ ପ୍ରଥମ ବୈଠକ କରିବେ। ବିରୋଧୀ ଦଳର ନେତାଙ୍କ ଏକ ସ୍ୱତନ୍ତ୍ର କମିଟି ଗଠନ ପ୍ରସ୍ତାବକୁ ଏହି ବୈଠକରେ ଆଲୋଚନା କରାଯାଇପାରେ। ଏଥିରେ ମୁଖ୍ୟ ବିରୋଧୀ ଦଳର ୫ ନେତା ଏଥିରେ ସାମିଲ ହୋଇପାରନ୍ତି। ଏହି କମିଟି ଆସନ୍ତା ଏକ ସପ୍ତାହ ମଧ୍ୟରେ ସମ୍ଭାବ୍ୟ ପ୍ରାର୍ଥୀଙ୍କ ନାମ ଉପରେ ଆଲୋଚନା କରି ବିରୋଧୀ ଦଳ ମଧ୍ୟରେ ଏକ ସହମତି ସୃଷ୍ଟି କରିବାକୁ ଚେଷ୍ଟା କରିବ ଏବଂ ସମ୍ଭାବ୍ୟ ପ୍ରାର୍ଥୀଙ୍କ ନାମ ଉପରେ ମଧ୍ୟ ଆଲୋଚନା କରିବ।

ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ଟିଆରଏସ ବୈଠକରେ ଯୋଗଦେବେ ନାହିଁ। ବିଜେପି ଏବଂ କଂଗ୍ରେସଠାରୁ ସମାନ ଦୂରତା ବଜାୟ ରଖିବାକୁ ଦଳ ନିଷ୍ପତ୍ତି ନେଇଛି। ଏହା ପଛର କାରଣ ଦିଆଯାଇଥିଲା ଯେ, ଟିଆରଏସ୍ ର ଆପତ୍ତି ସତ୍ତ୍ୱେ କଂଗ୍ରେସକୁ ଏହି ବୈଠକକୁ ନିମନ୍ତ୍ରଣ କରାଯାଇଛି। ତେଲେଙ୍ଗାନାର କଂଗ୍ରେସ ହେଉଛି ମୁଖ୍ୟ ବିରୋଧୀ ଦଳ। ତେଲେଙ୍ଗାନାରେ ନିକଟରେ ହୋଇଥିବା ଏକ ସାଧାରଣ ସଭାରେ ରାହୁଲ ଗାନ୍ଧୀ ବିଜେପି ବିରୋଧରେ କିଛି ନ କହି ଟିଆରଏସ ସରକାରଙ୍କୁ ଟାର୍ଗେଟ କରିଥିଲେ। ତେଲେଙ୍ଗାନାରେ ଟିଆରଏସ ବିରୋଧରେ କଂଗ୍ରେସ ବିଜେପି ସହ ମେଣ୍ଟ କରିଛି ବୋଲି ଅଭିଯୋଗ କରାଯାଇଛି। ତେଣୁ କଂଗ୍ରେସ ସହିତ କୌଣସି ପ୍ଲାଟଫର୍ମରେ ଏକାଠି ହେବାର ପ୍ରଶ୍ନ ନାହିଁ ବୋଲି ଦଳ କହିଛି।

ଟିଆରଏସ ଆହୁରି ମଧ୍ୟ ଅଭିଯୋଗ କରିଛି ଯେ, ଲୋକସଭା ନିର୍ବାଚନରେ ​​ହୁଜୁରାବାଦ ଉପ-ନିର୍ବାଚନରେ ବିଜେପି ଜିତିବା ପାଇଁ କଂଗ୍ରେସ ଜମା ପୁଞ୍ଜି ହରାଇବାକୁ ପ୍ରସ୍ତୁତ ଥିଲା। ତେଣୁ କୌଣସି ସମୟରେ ଏଭଳି ଦଳ ଉପରେ ବିଶ୍ୱାସର ପ୍ରଶ୍ନ ଉଠିବ ନାହିଁ। ଟିଆରଏସ ଅଭିଯୋଗ କରିଛି ଯେ, ପ୍ରାର୍ଥୀ ଚୟନ ହୋଇସାରିଛି ଏବଂ ଏହା ପରେ ଏକ ବୈଠକ ଡକାଯାଇଛି। ମୋତେ ଉତ୍ତର ଦିଆଯାଉ, ତୁମେ ଏହା କାହିଁକି କଲ? ସଠିକ୍ ପ୍ରକ୍ରିୟା ବୈଠକ କରିବା, ଏକ ସହମତି ହାସଲ କରିବା, ପ୍ରାର୍ଥୀଙ୍କୁ ଅନୁମୋଦନ କରିବା ଏବଂ ବୈଠକ ପରେ ନାମ ଘୋଷଣା କରିବା ଉଚିତ ଥିଲା। ତେଣୁ ଟିଆରଏସ ଏହି ସଭାରେ ଅଂଶଗ୍ରହଣ କରିବ ନାହିଁ। ରାଷ୍ଟ୍ରପତି ନିର୍ବାଚନରେ ​​ଆମ ଦଳ କିପରି ଭୋଟ୍ ଦେବ ସେନେଇ ନିଷ୍ପତ୍ତି ଏବଂ ଘୋଷଣା ପରେ କରାଯିବ।

ଉଲ୍ଲେଖ ଯୋଗ୍ୟ ଯେ, ଓଡିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିଜୁ ଜନତା ଦଳ ମଧ୍ୟ ଏହି ବୈଠକରେ ଅଂଶଗ୍ରହଣ କରିବାର ସମ୍ଭାବନା କମ୍। ଆଜି ହେବାକୁ ଥିବା ବିରୋଧୀ ଦଳର ବୈଠକରେ ଆମ୍ ଆଦମୀ ପାର୍ଟି ମଧ୍ୟ ଅଂଶଗ୍ରହଣ କରିବ ନାହିଁ। ଆମ୍ ଆଦମୀ ପାର୍ଟି ସୂତ୍ର ଅନୁଯାୟୀ, ‘ରାଷ୍ଟ୍ରପତି ପ୍ରାର୍ଥୀ ଘୋଷିତ ହେବା ପରେ ହିଁ ଏଏପି ଏହି ପ୍ରସଙ୍ଗ ଉପରେ ବିଚାର କରିବ’।

ଏହା ପରେ ଜୁନ୍ ୨୦ ତାରିଖ କିମ୍ବା ୨୧ ତାରିଖରେ ବିରୋଧୀ ଦଳର ନେତାଙ୍କ ଏକ ବୈଠକ ଅନୁଷ୍ଠିତ ହୋଇପାରେ ଯେଉଁଥିରେ ବିରୋଧୀ ଦଳର ପ୍ରାର୍ଥୀ କିଏ ହେବ ସେନେଇ ଚୂଡ଼ାନ୍ତ ନିଷ୍ପତ୍ତି ନିଆଯିବ। ରାଷ୍ଟ୍ରପତି ନିର୍ବାଚନ ପାଇଁ ନାମାଙ୍କନପତ୍ରର ଶେଷ ତାରିଖ ହେଉଛି ଜୁନ୍ ୨୯ ତାରିଖ। ପ୍ରାୟ ଏକ ସପ୍ତାହ ପୂର୍ବରୁ ବିରୋଧୀ ଦଳ ତାଙ୍କର ପ୍ରାର୍ଥୀ କିଏ ହେବେ, ନିଷ୍ପତ୍ତି ନେବେ।

ବାମପନ୍ଥୀ ନେତା ସୀତାରାମ ୟେଚୁରୀ ଏବଂ ଡି ରାଜାଙ୍କ ସହ ଶରଦ ପାୱାରଙ୍କ ସାକ୍ଷାତ ସମୟରେ କଂଗ୍ରେସ ନେତା ଗୁଲାମ ନବୀ ଆଜାଦ ଏବଂ ଗୋପାଳ କୃଷ୍ଣ ଗାନ୍ଧୀଙ୍କ ପରି ନେତାଙ୍କ ନାମ ଆଲୋଚନା କରାଯାଇଥିଲା। ସୂଚନାନୁସାରେ, ଗୁଲାମ ନବୀ ଆଜାଦଙ୍କ ନାମରେ ବାମପନ୍ଥୀ ନେତାମାନେ ଆପତ୍ତି କରିଥିଲେ। ଶରଦ ପାୱାର ବାମପନ୍ଥୀ ନେତାମାନଙ୍କୁ ସ୍ପଷ୍ଟ ଭାବରେ କହିଛନ୍ତି ଯେ, ସେ ବିରୋଧୀ ଦଳର ପ୍ରାର୍ଥୀ ହେବାକୁ ଆଗ୍ରହୀ ନୁହଁନ୍ତି।

ଭୁବନେଶ୍ୱର: କେନ୍ଦ୍ର ସରକାର ଗତକାଲି ସାଧାରଣ ଧାନର ସର୍ବନିମ୍ନ ସହାୟକ ମୂଲ୍ୟ (ଏମଏସପି) ୧୦୦ ଟଙ୍କାକୁ ବୃଦ୍ଧି କରିଛନ୍ତି। ଫଳରେ ୨୦୨୧-୨୨ ରୁ କୁଇଣ୍ଟାଲ ପ୍ରତି ୧୯୪୦ ଟଙ୍କା ଥିବା ସାଧାରଣ ଧାନର ଦର ୨୦୨୨-୨୩ ବର୍ଷ ପାଇଁ କୁଇଣ୍ଟାଲ ପ୍ରତି ୨୦୪୦ ଟଙ୍କା ହୋଇଛି। ଧାନର ଏଭଳି ନଗଣ୍ୟ ଦରବୃଦ୍ଧି ଓଡିଶା ଚାଷୀକୂଳ ପ୍ରତି ଉପହାସ ବୋଲି କହିଛନ୍ତି ବିଜେଡି ପ୍ରବକ୍ତା ଡକ୍ଟର ସସ୍ମିତ ପାତ୍ର।

ଧାନର ମୂଲବୃଦ୍ଧି ଉପରେ ଡକ୍ଟର ପାତ୍ର କହିଛନ୍ତି ଯେ ସ୍ୱାମୀନାଥନ୍ କମିଶନ ଧାନର ଏମ୍‍ଏସ୍‍ପିକୁ ଉତ୍ପାଦନ ମୂଲ୍ୟର ସି୨ ହାରରେ ୧.୫ ଗୁଣ ବୃଦ୍ଧି କରିବାକୁ ଯେଉଁ ସୁପାରିଶ କରିଥିଲେ ତାହା କେନ୍ଦ୍ର କରିନାହିଁ। ୨୫ ମାର୍ଚ୍ଚ, ୨୦୧୭ ରେ, ଓଡ଼ିଶା ବିଧାନସଭା ସର୍ବସମ୍ମତି କ୍ରମେ ଏକ ସଂକଳ୍ପ ପାରିତ କରି ସାଧାରଣ ଧାନର ଏମଏସପି କୁଇଣ୍ଟାଲ ପିଛା ୨୯୩୦ ଟଙ୍କାକୁ ବୃଦ୍ଧି କରିବାକୁ ପରାମର୍ଶ ଦେଇଛି। ବିଜେପି, କଂଗ୍ରେସ ଏବଂ ବିଜେଡିର ସମସ୍ତ ବିଧାୟକ ଏହାକୁ ସର୍ବସମ୍ମତି କ୍ରମେ ସମର୍ଥନ କରିଛନ୍ତି। କିନ୍ତୁ ଏହି ସଂକଳ୍ପ ପାରିତ ହେବାର ପାଞ୍ଚ ବର୍ଷ ପରେ ମଧ୍ୟ ବିଜେଡି ସାଂସଦଙ୍କ ସଂସଦ ତଥା ଓଡ଼ିଶା ବିଧାନସଭାରେ ରଖାଯାଇଥିବା ଅନେକ ଦାବି ପରେ ମଧ୍ୟ କେନ୍ଦ୍ର ସରକାର ଏହାକୁ କାର୍ଯ୍ୟକାରୀ କରି ନାହିଁ।

ଧାନର ଏମଏସ୍‍ପି କୁଇଣ୍ଟାଲ ପ୍ରତି ୨୯୩୦ ଟଙ୍କାକୁ ବୃଦ୍ଧି କରିବା ପ୍ରସଙ୍ଗ ବ୍ୟତିତ କେନ୍ଦ୍ର ମଧ୍ୟ ଓଡିଶାରୁ ଅତିରିକ୍ତ ଉଷୁନା ଚାଉଳ ଉଠାଇବା ବନ୍ଦ କରିବାକୁ ନିଷ୍ପତ୍ତି ନେଇଛି। ଓଡିଶାରେ ଉତ୍ପାଦିତ ଅଧିକାଂଶ ଚାଉଳ ହେଉଛି ଉଷୁନା ଚାଉଳ ଏବଂ ଦେଶର ପିଡିଏସ୍‍ ଚାଉଳରେ ଅବଦାନ ପାଇଁ ଏହା ଏକ ଅଗ୍ରଣୀ ରାଜ୍ୟ ଅଟେ। ବଳକା ଉଷୁନା ଚାଉଳ ଉଠାଇବା ବନ୍ଦ କରିବା ପାଇଁ କେନ୍ଦ୍ରର ନିଷ୍ପତ୍ତି ଓଡିଶାର ଲକ୍ଷ ଲକ୍ଷ ଚାଷୀଙ୍କ ଉପରେ ପ୍ରତିକୂଳ ପ୍ରଭାବ ପକାଇବ ଏବଂ ପଶ୍ଚିମ ଓଡିଶାରେ ମଧ୍ୟ ଏହା ଅଧିକ ପ୍ରଭାବ ପକାଇବ।

୨୦୨୧-୨୨ ଖରିଫ ମାର୍କେଟିଂ ସିଜିନ (କେଏମଏସ୍‍)ରେ ୫୨ ଲକ୍ଷ ଟନ୍ ଚାଉଳ ସଂଗ୍ରହ ମଧ୍ୟରୁ, ସାଧାରଣ ବଣ୍ଟନ ବ୍ୟବସ୍ଥା (ପିଡିଏସ୍‍) ଏବଂ ଅନ୍ୟାନ୍ୟ କଲ୍ୟାଣମୂଳକ ଯୋଜନା ଅଧୀନରେ ରାଜ୍ୟର ବ୍ୟବହାର ପ୍ରାୟ ୩୯ ଲକ୍ଷ ଟନ୍ ହେବ। ରାଜ୍ୟରେ ୧୩ ଲକ୍ଷ ଟନ୍ ଚାଉଳ ବଳକା ହେବାର ସମ୍ଭାବନା ଅଛି ଯାହାକୁ ତୁରନ୍ତ ଉଠାଇବା ଉଚିତ୍‍। କିନ୍ତୁ କେନ୍ଦ୍ର ଏହି ପ୍ରସଙ୍ଗରେ ନିରବ ରହିଛି।

ଏଥିସହ ଖାଉଟି ବ୍ୟାପାର, ଖାଦ୍ୟ ଏବଂ ସାଧାରଣ ବଣ୍ଟନ ମନ୍ତ୍ରଣାଳୟ ଅଧିନରେ ଥିବା ଖାଦ୍ୟ ଏବଂ ସାଧାରଣ ବଣ୍ଟନ ବିଭାଗ (ଡିଏଫପିଡି) ଦ୍ୱାରା ଦିଆଯାଇଥିବା ଲକ୍ଷ୍ୟ ଅନୁଯାୟୀ ପାଞ୍ଚ ଲକ୍ଷ ଟନ୍ ଭିଟାମିନଯୁକ୍ତ ଉଷୁନା ଚାଉଳକୁ ଏଫସିଆଇରେ ପହଞ୍ଚାଇବା ପାଇଁ ରାଜ୍ୟ ସରକାର ସମସ୍ତ ଆବଶ୍ୟକୀୟ ପଦକ୍ଷେପ ନେଇଛନ୍ତି। ୨୦୨୧-୨୨ କେଏମଏସ୍‍ ସମୟରେ ଅଧିକ ପରିମାଣର ଭିଟାମିନଯୁକ୍ତ ଉଷୁନା ଚାଉଳ ବିତରଣ କରିବା ସ୍ଥିତିରେ ରାଜ୍ୟ ଅଛି ଏବଂ ଡିଏଫପିଡି କୁ ଭିଟାମିନଯୁକ୍ତ ଚାଉଳର ଅତିରିକ୍ତ ଲକ୍ଷ୍ୟ ଦେବାକୁ ଅନୁରୋଧ କରାଯାଇଛି। କିନ୍ତୁ ଅଧିକ ପରିମାଣର ଲକ୍ଷ୍ୟ ପାଇଁ କେନ୍ଦ୍ର ପକ୍ଷରୁ ଏପର୍ଯ୍ୟନ୍ତ ରାଜ୍ୟକୁ ସୂଚିତ କରାଯାଇନାହିଁ।

ଓଡିଶା ସରକାର ୧୦,୩୩୩ କୋଟି ଟଙ୍କା ଖାଦ୍ୟ ସବସିଡି ବିଲ୍ ପ୍ରଦାନ କରିବାକୁ ଦାବି କରିଥିଲେ। ରାଜ୍ୟରେ ଧାନ ସଂଗ୍ରହ କରୁଥିବା ସଂସ୍ଥାକୁ ଆର୍ଥିକ ଚାପରୁ ମୁକୁଳାଇବା ପାଇଁ କେନ୍ଦ୍ର ତୁରନ୍ତ ଟଙ୍କା ପ୍ରଦାନ କରିବାକୁ ରାଜ୍ୟ ଦାବି କରୁଥିବା ସତ୍ତ୍ୱେ ଏ ଦିଗରେ କୌଣସି ପଦକ୍ଷେପ ନିଆଯାଇ ନାହିଁ। ରାଜ୍ୟ ସରକାରଙ୍କ ପାଇଁ ଧାନ ଖରିଦ ସକାଶେ ନିଯୁକ୍ତ ସଂସ୍ଥା ଓଡିଶା ରାଜ୍ୟ ଯୋଗାଣ ନିଗମର ୨୦୨୨ ଏପ୍ରିଲ୍‍ ଶେଷ ସୁଦ୍ଧା ୭୯୩୧.୯୦ କୋଟି ଟଙ୍କାର ଅସ୍ଥାୟୀ ସବସିଡି ଏବଂ ୨୪୦୨.୧୯ କୋଟି ଟଙ୍କାର ଅଗ୍ରୀମ ସବସିଡି ଏହିଭଳି ମୋଟ୍‍ ୧୦,୩୩୪ କୋଟି ଟଙ୍କା ହୋଇଗଲାଣି। ଆହୁରି ମଧ୍ୟ ଅତିରିକ୍ତ ସୁଧ ପ୍ରଦାନରେ ବିଳମ୍ବ ଏବଂ ସବସିଡିର ସ୍ୱଳ୍ପ ମଞ୍ଜୁର ହେତୁ ମାର୍ଚ୍ଚ ୩୧, ୨୦୨୨ ସୁଦ୍ଧା ପ୍ରାୟ ୫୪୫୪.୬୭ କୋଟି ଟଙ୍କାର ଅତିରିକ୍ତ ବୋଝ ହୋଇଛି ଯାହା ଭରଣା କରାଯାଇ ପାରୁନାହିଁ। କେନ୍ଦ୍ର ସୁଧ ବାବଦ ଦେୟ ପ୍ରଦାନ କରିବା ଉଚିତ୍‍, ଏହା ନହେଲେ ରାଜ୍ୟ ଅତିରିକ୍ତ ବୋଝ ବହନ କରିବ। କିନ୍ତୁ କେନ୍ଦ୍ର ଏ ବାବଦରେ କୌଣସି ପଦକ୍ଷେପ ନେଉନାହିଁ ବୋଲି ଡକ୍ଟର ପାତ୍ର କହିଛନ୍ତି।