The Samikhsya Odia
କର୍କଟ: – ଆଜି ଏହି ରାଶିର ବ୍ୟକ୍ତିଙ୍କ ପାଇଁ ବହୁତ ଭଲ । ସମସ୍ତେ କାର୍ଯ୍ୟ ଏବଂ ପ୍ରତିଭା ଦ୍ୱାରା ଆକର୍ଷିତ ହେବେ । ଯାତ୍ରା ଏବଂ ଚାକିରି, ଦେଶ ବାହାରେ ବ୍ୟବସାୟର ରାଶି ଗଠନ କରାଯାଉଛି । ତୁମର ଜୀବନ ସାଥୀ ପାଇଁ ତୁମର ଅପାର ପ୍ରେମ ଦୃଶ୍ୟମାନ ହେବ ।
ଧନୁ : – ଆଜି ଯାତ୍ରା କରିବାକୁ ଯୋଜନା କରିବେ । ଚାକିରିରେ ଭୁଲ ବୁଝାମଣାର ସମ୍ଭାବନା ଅଛି, ସାବଧାନ ରୁହ, ଅନ୍ୟର କାର୍ଯ୍ୟର ଦାୟିତ୍ବ ତୁମ ମୁଣ୍ଡରେ ନିଅ ନାହିଁ । ପତ୍ନୀଙ୍କୁ ଏକ ବିଶେଷ ବନ୍ଧୁଙ୍କ ସହିତ ପରିଚିତ କରାଇବ ।
ମେଷ: – ଆଜି ଏହି ରାଶିର ବ୍ୟକ୍ତି ଝଗଡାଠାରୁ ଦୂରେଇ ରହିବା ଉଚିତ୍। ପରିସ୍ଥିତି ଅନୁଯାୟୀ କାର୍ଯ୍ୟ କରନ୍ତୁ । ବ୍ୟବସାୟ ଏବଂ ଚାକିରିରେ ସବୁକିଛି ଆପଣଙ୍କ ଅନୁଯାୟୀ ହେବ ।
ସିଂହ: – ଆଜି, ତୁମେ ସବୁକିଛି ରଙ୍ଗୀନ ପାଇବ । ପରିବାର ଏବଂ ସାଙ୍ଗମାନଙ୍କ ସହିତ କୌଣସି ସ୍ଥାନକୁ ଯିବେ । ଏହା ପ୍ରେମ ଏବଂ ଉତ୍ସର୍ଗୀକୃତତା ବୃଦ୍ଧି କରିବ । ଚାକିରିରେ ସାବଧାନ ରୁହନ୍ତୁ, ଆପଣଙ୍କ ଅଫିସରେ କେହି ଜଣେ ଅଛନ୍ତି ଯିଏ ଆପଣଙ୍କ କାମରେ ଇର୍ଷା କରନ୍ତି ।
ବୃଷ: – ଆଜି ବ୍ୟକ୍ତି ଧର୍ଯ୍ୟର ସହିତ କାମ କରିବା ଉଚିତ୍ । ସାଙ୍ଗମାନଙ୍କୁ ଅନ୍ଧ ଭାବରେ ବିଶ୍ୱାସ କର ନାହିଁ । ଅଜାଣତରେ କିଛି ବଡ ଭୁଲ କରିବା ଆପଣଙ୍କୁ ବିବ୍ରତ କରିବ । ଚାକିରିରେ କାର୍ଯ୍ୟ ପ୍ରତି ଉତ୍ସର୍ଗୀକୃତତା ଭବିଷ୍ୟତରେ ଆପଣଙ୍କ ପାଇଁ ଲାଭଦାୟକ ହେବ। ସ୍ୱାସ୍ଥ୍ୟର ଯତ୍ନ ନିଅନ୍ତୁ ।
ମିଥୁନ: – ଆଜି ଏହି ରାଶିର ବ୍ୟକ୍ତି ଯାତ୍ରା କରିବାକୁ ଯୋଜନା କରିବେ । ଏହା ପରିବାରରେ ସୁଖର ଆଲୋକ ଦେବ । ଅଫିସରେ ଆପଣଙ୍କ କାର୍ଯ୍ୟକୁ ସମସ୍ତେ ପ୍ରଶଂସା କରିବେ, କିନ୍ତୁ ବ୍ୟବସାୟରେ ଆପଣଙ୍କ ପ୍ରିୟଜନମାନେ ଆପଣଙ୍କୁ ପ୍ରତାରଣା କରିବେ ।
ପୁରୀ, ଆଜି ତିନି ରଥର ପ୍ରଥମ ଭୂଇଁ ଫ୍ରେମ ଖଞ୍ଜା ହୋଇ ନମ୍ବରିଂ ହୋଇଥିଲା। ଆଜି ପ୍ରଥମ ଭୂଇଁ ଖୋଲାଯାଇ ରଥ ଉପରେ ଡେରା ଯିବା ପରେ ତିନିରଥର ଦ୍ୱିତୀୟ ଭୂଇଁ ଫ୍ରେମ ଖଞ୍ଜା ସରି ନମ୍ବରିଂ ଶେଷ ହୋଇଛି।
ତିନି ରଥର ଏହି ଦ୍ୱିତୀୟ ଭୂଇଁ ସେଟିଙ୍ଗ ୧୬ ଫୁଟର ୪ ଗୋଟି ଭୂଇଁ ଚଉତାକୁ ବର୍ଗାକାର ଭାବେ ପ୍ରତ୍ୟେକ ବାହୁ ସଂଯୋଗ ହୋଇଛି। ତାହାର ଉଭୟ ପାର୍ଶ୍ୱରେ ୧୨ ଫୁଟର ଦୁଇଟି ଓରା ପକାଯାଇ ଉକ୍ତ ଓରାର ଉଭୟ ପଟରେ ୪ ଟି ଲେଖାଁଏ ଖମ୍ବୀ ସଂଯୋଗ ହୋଇଛି। ଏହାର ଚାରି ପାର୍ଶ୍ୱରେ ଅତି ରଥର ୪ଟି ଲେଖାଁଏ ୧୬ ଫୁଟିଆ ଭୂଇଁ ଶେଣୀ ସଂଯୋଗ କରାଯାଇଛି।
ସେଥିରେ ୩ଫୁଟ ୬ ଇଞ୍ଚିର ସିଆଣ ଚାରି ପାର୍ଶ୍ୱରେ ୪ଟି ଲେଖାଁଏ ୧୬ ଟି ସଂଯୋଗ କରାଯାଇଛି। ଭୂଇଁ ଶେଣୀ ଉପରେ ମାଛ ପାତିଆ ଓ ସିଆନ ସଂଯୋଗ ହୋଇ ଦ୍ୱିତୀୟ ଭୁଇଁ ଫ୍ରେମ ପରୀକ୍ଷା ମୂଳକ ଭବେ ତିନି ରଥର ମାପ ଅନୁଯାଇ ସେଟିଙ୍ଗ ଶେଷ ହେବାପରେ ନମ୍ବରିଂ କରା ଯାଇଅଛି।
ଭୁବନେଶ୍ବର, ହିନ୍ଦୁ କ୍ୟାଲେଣ୍ଡର ଅନୁଯାୟୀ, ଜ୍ୟେଷ୍ଠ ମାସର ଶୁକ୍ଲ ପକ୍ଷ ଏକାଦାଶୀକୁ ନିର୍ଜଳା ଏକାଦଶୀ କୁହାଯାଏ । ଏହା ଭୀମସେନ୍, ପାଣ୍ଡବ ବା ଭୀମ ଏକାଦାଶୀ ନାମରେ ମଧ୍ୟ ଜଣାଶୁଣା। ସାଧାରଣତଃ ନିର୍ଜଳା ଏକାଦଶୀରେ ଦିନ ଭଗବାନ ବିଷ୍ଣୁଙ୍କ ସହିତ ମା ଲକ୍ଷ୍ମୀଙ୍କୁ ପୂଜା କରାଯାଏ। ନିର୍ଜଳା ଏକାଦଶୀ ଅର୍ଥ ହେଲା ନିଃ ଜଳ ବା ପାଣି ଗ୍ରହଣ କରିବ ନାହିଁ। ସେଥିପାଇଁ ଏହି ଦିନ ଯେଉଁମାନେ ଉପବାସ କରନ୍ତି ସେମାନେ ପାଣି ଗ୍ରହଣ କରି ନ ଥାନ୍ତି।
ଚଳିତ ବର୍ଷ 21 ତାରିଖ ସୋମବାର ଦିନ ଏହି ନିର୍ଜଳା ଏକାଦଶୀ ପଡୁଛି। ଏଭଳି ପରିସ୍ଥିତିରେ ଶିବ ଏବଂ ସିଦ୍ଧ ଯୋଗ ସଂଗଠିତ ହେଉଛି। ଯେଉଁଥିପାଇଁ ଏହି ଏକାଦଶୀର ଗୁରୁତ୍ୱ ଆହୁରି ବଢିଯାଇଛି। ଜୁନ୍ 21 ରେ, ଶିବ ଯୋଗ ଅପରାହ୍ନ 5:34 ପର୍ଯ୍ୟନ୍ତ ରହିବ ଏବଂ ଏହା ପରେ ସିଦ୍ଧ ଯୋଗ ଆରମ୍ଭ ହେବ । ସିଦ୍ଧ ଯୋଗରେ ଜଣେ ବ୍ୟକ୍ତିଙ୍କର ସମସ୍ତ ଇଚ୍ଛା ପୂରଣ ହୁଏ । ଏହି ସମୟ ମଧ୍ୟରେ କରାଯାଇଥିବା ପ୍ରତ୍ୟେକ କାର୍ଯ୍ୟ ସଫଳ ହୁଏ । ଶିବ ଯୋଗ ମଧ୍ୟ ଅତ୍ୟନ୍ତ ଶୁଭ ବୋଲି କୁହାଯାଏ ଏବଂ ଏହି ସମୟ ମଧ୍ୟରେ କରାଯାଇଥିବା ଧାର୍ମିକ ରୀତିନୀତି, ପୂଜାପାଠ କିମ୍ବା ଦାନ ଇତ୍ୟାଦି ମଧ୍ୟ ଶୁଭ ଫଳାଫଳ ଦେଇଥାଏ ।
କେମିତି ପାଳନ ହୁଏ ନିର୍ଜଳା ଏକାଦଶୀ
ନିର୍ଜଳା ଏକାଦଶୀ ଉପବାସ ସମୟରେ ସକାଳେ ଗାଧୋଇବା ପରେ ଉପବାସର ଶପଥ ନିଅନ୍ତୁ। ଏହି ଦିନ ପରିଷ୍କାର ରହିବା ଉପରେ ବିଶେଷ ଧ୍ୟାନ ଦେବା ଉଚିତ। ନିର୍ଜଳା ଏକାଦଶୀ ଉପାସନା ସମୟରେ ହଳଦିଆ ରଙ୍ଗର ପୋଷାକ କିମ୍ବା ଜିନିଷ ବ୍ୟବହାର କରନ୍ତୁ। କାରଣ ହଳଦିଆ ରଙ୍ଗ ଭଗବାନ ବିଷ୍ଣୁଙ୍କ ପ୍ରିୟ ଅଟେ। ଏକାଦଶୀ ଦିନ ଭୋଜନ ଗ୍ରହଣ କରାଯିବା ଉଚିତ୍ ନୁହେଁ । ଏକାଦଶୀ ଉପବାସ ସମୟରେ ଜଣେ ସକାଳ ଓ ସନ୍ଧ୍ୟାରେ ପୂଜା କରିବା ଜରୁରୀ। ନିର୍ଜଳା ଏକାଦଶୀ ଉପବାସରେ ଜଣେ ‘ଓଁ ନାମୋ ଭାଗବତ ବାସୁଦେବୟା’ ମନ୍ତ୍ର ଜପ କରିବା ଉଚିତ୍। ନିର୍ଜାଲା ଏକାଦଶୀ ଉପବାସ ସମୟରେ କ୍ରୋଧ ଇତ୍ୟାଦିକୁ ଏଡ଼ାଇବା ଉଚିତ।
ନିର୍ଜଲା ଏକାଦଶୀରେ ତୁଳସୀ ପୂଜାର ଗୁରୁତ୍ୱ
ହିନ୍ଦୁ ଧର୍ମରେ ତୁଳସୀ ପୂଜା ଦୀର୍ଘ ଦିନ ଧରି ଚାଲିଆସୁଛି। ସମସ୍ତ ହିନ୍ଦୁ ଘରେ ତୁଳସୀ ଗଛକୁ ବିଶେଷ ଭାବେ ପୂଜା କରିଥାନ୍ତି। ସମସ୍ତ ଏକାଦଶୀ ଦିନରେ ତୁଳସୀଙ୍କର ବିଶେଷ ପୂଜା ମଧ୍ୟ କରାଯାଏ । ନିର୍ଜଳା ଏକାଦଶୀରେ ଭଗବାନ ବିଷ୍ଣୁଙ୍କୁ ପୂଜା କରାଯାଏ ଏବଂ ତୁଳସୀ ଭଗବାନ ବିଷ୍ଣୁଙ୍କ ପାଇଁ ଅତ୍ୟନ୍ତ ପ୍ରିୟ, ତେଣୁ ଏହି ଦିନ ତୁଳସୀ ପୂଜା ମହତ ପୂର୍ଣ ଅଟେ। ତୁଳସୀ ଦେବୀ ଲକ୍ଷ୍ମୀଙ୍କ ପ୍ରତୀକ ଭାବରେ ବିବେଚନା କରାଯାଏ। ତୁଳସୀ ଗଛ ଥିବା ଘରେ ଦେବତା ଏବଂ ଦେବୀ ବାସ କରନ୍ତି ବୋଲି ବିଶ୍ୱାସ କରାଯାଏ।
ନିର୍ଜଳା ଏକାଦାଶୀ ଦିନ ତୁଳସୀ ପୂଜାର ବିଧି
ନିର୍ଜଳା ଏକାଦଶୀ ଦିନ ତୁଳସୀ ପୂଜାର ବେଶେ ଗୁରୁତ୍ବ ରହିଛି। ସେଥିପାଇଁ ତୁଳସୀଙ୍କୁ ପୂଜା କରିବାକି ସକାଳୁ ଉଠି ସ୍ନାନ କରନ୍ତୁ । ଏହା ପରେ ତୁଳସୀ ଗଛରେ ବିଶୁଦ୍ଧ ଜଳ କିମ୍ବା ଗଙ୍ଗାଜଳ ଅର୍ପଣ କରନ୍ତୁ । ଏହାପରେ ତୁଳସୀ ଗଛ ମୂଳେ ଏକ ଦୀପ ଲଗାନ୍ତୁ। ତୁଳସୀ ଗଛକୁ କଦଳୀ ଏବଂ ସିନ୍ଦୁର ଅର୍ପଣ କରନ୍ତୁ।
ଏହି ଦିନ ତୁଳସୀ ପୂଜନା ସହିତ କିଛି ଦାନ ଧର୍ମ କରିବାର ବିଧି ରହିଛି। ତାହା ହେଉଛି ଗରିବ ଲୋକଙ୍କୁ ଏହି ଦିନ ଗରମରୁ ରକ୍ଷା ପାଇବା ପାଇଁ କିଛି ଜିନିଷ ଦାନ କରନ୍ତୁ। ଏହି ଦିନ ଗରିବ ଲୋକଙ୍କୁ ଚପଲ ବା ଜୋତା ଦାନ ମଧ୍ୟ କରାଗଲେ ବେଶ୍ ଶୁଭଦାୟକ ବୋଲି ବିବେଚନା କରାଯାଇଛି।
ଚଳିତ ନିର୍ଜଳା ଏକାଦଶୀର ସମୟ
ନିର୍ଜାଲା ଏକାଦଶୀ- ସୋମବାର, ଜୁନ୍ 21 ତାରିଖ 2021 ରେ ପଡୁଛି
ଏକାଦଶୀ ତାରିଖ ଆରମ୍ଭ – ଜୁନ୍ 20 ତାରିଖ 2021 ଅପରାହ୍ନ 04:21 ରୁ ଆରମ୍ଭ
ଏକାଦଶୀ ତାରିଖ ସମାପ୍ତ – ଜୁନ୍ 21 ତାରିଖ 2021 ରେ ଦିନ 01:31ରେ ଶେଷ।
ଦ୍ୱାଦଶ ପାରାୟଣ ତିଥି ଦିନ ଶେଷ ହୁଏ – 10:22 AM
ପୁରୀ, ଆସନ୍ତା ଗୁରୁବାର ୨୪ ତାରିଖରେ ହେଉଛି ଦେବସ୍ନାନ ପୂର୍ଣ୍ଣିମା। ଏହି ଦିନ ଶ୍ରୀମନ୍ଦିରରୁ ତିନିଠାକୁର ରତ୍ନବେଦୀ ଛାଡି ସ୍ନାନମଣ୍ଡପକୁ ବିଜେ କରିବେ। ସେଠାରେ ସ୍ନାନ କରିବା ସହିତ ହାତୀ ବେଶରେ ଭକ୍ତଙ୍କୁ ଦର୍ଶନ ଦେବେ। ତେବେ ଏଥର କରୋନା କଟକଣା ପାଇଁ ସାହଣ ମେଲା ହେବ ନାହିଁ।
ଚଳିତ ବର୍ଷ ବିଳମ୍ବିତ ରାତ୍ରୀରୁ ପ୍ରଭୃଙ୍କ ନିତିକାନ୍ତି ଆରମ୍ଭ ହେବ। ଶ୍ରୀ ଜଗନ୍ନାଥ ମନ୍ଦିର ପ୍ରଶାସନ ତରଫରୁ ଜାରୀ କରାଯାଇଛି ସମୟ ନିର୍ଘଣ୍ଟ। ସେହି ଅନୁସାରେ
ଜୁନ ୨୪ ତାରିଖ ଗୁରୁବାର ସ୍ନାନଯାତ୍ରା ପୂଜା ନିତି ସମୟ
ପହଣ୍ଡି ବିଜେ- ରାତ୍ରୀ ୧ଟାରୁ ଭୋର ୪ଟା ପର୍ୟ୍ୟନ୍ତ
ମଙ୍ଗଳା ଆରତି- ଭୋର ୪ଟା ୩୦
ଜଳବିଜେ- ସକାଳ ୭ଟା ୩୦ ରୁ ୯ ଟା ୩୦
ନୂଆଲୁଗା ଲାଗି- ୧୦ଟା
ଛେରାପହଁରା- ୧୦ଟା ୩୦
ହାତୀ ବେଶ- ୧୧ଟାରୁ ୧୨ ଟା ପଯ୍ୟନ୍ତ
ସାହଣ ମେଲା- ଏଥର ହେବ ନାହିଁ
ବାହୁଡା ପହଁଣ୍ଡି- ଅପରାହ୍ନ ୫ଟାରୁ ରାତି ୮ଟା ପର୍ଯ୍ୟନ୍ତ
ମହାସ୍ନାନ- ରାତି ୧୦ଟା
ନୂଆଦିଲ୍ଲୀ: ନ୍ୟୁଜିଲାଣ୍ଡ ବିରୋଧରେ ୱାର୍ଲ୍ଡ ଟେଷ୍ଟ ଚମ୍ପିୟାନଶିପର ଫାଇନାଲ ମ୍ୟାଚରେ ଭାରତର ତାରକା ଖେଳାଳି ଋଷଭ ପନ୍ତ ବିଫଳ ହୋଇଛନ୍ତି। ସେ ପ୍ରଥମ ପାଳିରେ ମାତ୍ର ୪ ରନରେ ଆଉଟ ହୋଇଯାଇଥିଲେ। ସେ କାଇଲ ଜେମିସନଙ୍କ ଶିକାର ହୋଇଥିଲେ। ପନ୍ତ ଆଉଟ ହେବ ପରେ ଟିମ ଇଣ୍ଡିଆର ବିପଦ ବଢିଯାଇଥିଲା। ସେ ୨୨ ଟି ବଲର ସାମ୍ନା କରିଥିଲେ। ନ୍ୟୁଜିଲାଣ୍ଡର ଦ୍ରୁତ ବୋଲରଙ୍କୁ ସେ ସାମ୍ନା କରିବା ପାଇଁ ସଂଘର୍ଷ କରିଥିବା ଦେଖାଯାଇଥିଲା। ଜେମିସନଙ୍କ ବାହାର ଯାଉଥିବା ବଲକୁ ପନ୍ତ ଖେଳିବା ପାଇଁ ପ୍ରୟାସ କରିଥିଲେ। କିନ୍ତୁ ସ୍ଲିପରେ ଟମ ଲାଥମଙ୍କ ଦ୍ଵାରା ସେ କ୍ୟାଚ ଆଉଟ ହୋଇଯାଇଥିଲେ।
ପନ୍ତଙ୍କ ଆଉଟ ହେବ ପରେ ଭାରତୀୟ ଖେଳପ୍ରେମୀ ନିରାଶ ହୋଇଥିଲେ। ପନ୍ତ କେବଳ ବ୍ୟାଟିଂ ପିଚରେ ଖେଳିପାରିବେ ବୋଲି ଟ୍ବିଟରରେ ଅନେକ ଖେଳପ୍ରେମୀ ଲେଖିଥିଲେ। ସ୍ପାଇଡ଼ର ମ୍ୟାନ ଆସିଲେ ଆଉ ସ୍ପାଇଡ଼ର ମ୍ୟାନ ଫେରିଗଲେ ବୋଲି ଜଣେ ୟୁଜର ଲେଖିଥିଲେ। ରିଷଭ ପନ୍ତ ଆଉଟ ହେବା ପରେ ଏଭଳି ଅନେକ ଖେଳପ୍ରେମୀ ନିରାଶ ହୋଇ ଟ୍ବିଟରରେ ଅସନ୍ତୋଷ ବ୍ୟକ୍ତ କରିଛନ୍ତି।
ଉଲ୍ଲେଖ ଯୋଗ୍ୟ ଯେ, ଟିମ ଇଣ୍ଡିଆ ଏହି ମ୍ୟାଚରେ ପ୍ରଥମରୁ ଭଲ ଖେଳ ଆରମ୍ଭ କରିଥିବା ବେଳେ ଗତକାଲି ଖେଳ ସମାପ୍ତ ହେବା ପର୍ଯ୍ୟନ୍ତ ୩ ଟି ୱିକେଟ ହରାଇ ୧୪୬ ରନ ସଂଗ୍ରହ କରିଥିଲା। କିନ୍ତୁ ଆଜି ଖେଳ ଆରମ୍ଭ ହେବା ପରେ ଭାରତୀୟ ଖେଳାଳି ବ୍ୟାଟିଂରେ ବିଫଳ ହୋଇଥିଲେ। ମାତ୍ର ୨୧୭ ରନରେ ଭାରତୀୟ ଦଳ ସମସ୍ତ ୱିକେଟ ହରାଇଥିଲା।
ନ୍ୟୁଜିଲାଣ୍ଡ ପକ୍ଷରୁ କାଇଲ ଜେମିସନ ସର୍ବାଧିକ ୫ ଟି ୱିକେଟ ଅକ୍ତିଆର କରିଥିଲେ। ତେବେ ଖବର ଲେଖା ହେବା ଯାଏଁ ନ୍ୟୁଜିଲାଣ୍ଡ ଦଳ କୌଣସି ୱିକେଟ ନହରାଇ ୫୭ ସଂଗ୍ରହ କରି ଦଳକୁ ମଜବୁତ ସ୍ଥିତିରେ ରଖିଛି।
ମୁମ୍ବାଇ: ମହାରାଷ୍ଟ୍ରରେ ଶିବସେନା, କଂଗ୍ରେସ ଏବଂ ଏନସିପିକୁ ନେଇ ମହା ବିକାଶ ଆଘାଡି ମେଣ୍ଟ ସରକାର ଚାଲିଛି। ହେଲେ ଏହି ମେଣ୍ଟରେ ସବୁ କିଛି ଠିକ ଚାଲିନଥିବା କୁହାଯାଉଛି। ଏଭଳି ପ୍ରଶ୍ନ ଉଠିବାର କାରଣ ହେଉଛି, କଂଗ୍ରେସ ନେତାଙ୍କ ପକ୍ଷରୁ ଅଲଗା ନିର୍ବାଚନ ଲଢିବା ଘୋଷଣା ପରେ ଦଳର ମୁଖିଆ ଉଦ୍ଧବ ଠାକରେଙ୍କୁ ଶିବସେନା ବିଧାୟକ ପ୍ରତାପ ସରନାୟକ ବିଜେପି ସହ ମିଶିବା ପାଇଁ ଚିଠି ଲେଖିଛନ୍ତି।
ଶିବସେନା ବିଧାୟକ ତଥା ଦଳର ପ୍ରବକ୍ତା ପ୍ରତାପ ସରନାୟକ ଏକ ପାତ୍ର ମାଧ୍ୟମରେ ଉଦ୍ଧବଙ୍କୁ କହିଛନ୍ତି ଯେ, ଯେଉଁଠି କଂଗ୍ରେସ ଅଲଗା ନିର୍ବାଚନ ଲଢିବା ପାଇଁ କହୁଛି, ତାହା ଶିବସେନା ଏବଂ ଏନସିପିକୁ ଦୁର୍ବଳ କରିବ। ବିଜେପି ସାଥିର ନଥିବା କାରଣରୁ ପ୍ରତାପଙ୍କ ସମେତ ଶିବସେନାର ଅନେକ ନେତାଙ୍କ ବିରୋଧରେ କେନ୍ଦ୍ରୀୟ ଯାଞ୍ଚ ଏଜେନ୍ସି ପକ୍ଷରୁ କାର୍ଯ୍ଯାନୁଷ୍ଠାନ ହେଉଛି। ବିଜେପି ସହ ମିଶିଗଲେ ଏଭଳି କାର୍ଯ୍ୟାନୁଷ୍ଠାନ ହେବ ନାହିଁ ବୋଲି ପ୍ରତାପ କହିଛନ୍ତି।
ଅପରପକ୍ଷେ ଶିବସେନା ନେତାଙ୍କ ବିଜେପି ସାଥିରେ ମିଶିବା ପାଇଁ କହୁଥିବା ବେଳେ କଂଗ୍ରେସ ପକ୍ଷରୁ ଅଲଗା ନିର୍ବାଚନ ଲଢିବା ପାଇଁ ବାରମ୍ବାର କୁହାଯାଉଛି। କଂଗ୍ରେସ ପକ୍ଷରୁ ଆଗାମୀ ସବୁ ନିର୍ବାଚନ ନିଜ ଉଦ୍ୟମରେ ଲଢିବ ବୋଲି ବାରମ୍ବାର କୁହାଯାଉଛି।
ମହାରାଷ୍ଟ୍ରର କଂଗ୍ରେସ ଅଧ୍ୟକ୍ଷ କହିଛନ୍ତି ଯେ, ରାଜ୍ୟର ଆଗାମୀ ବିଧାନସଭା ଏବଂ ଆଞ୍ଚଳିକ ନିର୍ବାଚନ ନିଜ ପ୍ରଚେଷ୍ଟାରେ ଲଢିବା ପାଇଁ ଆମେ ପୂର୍ବରୁ ଘୋଷଣା କରିଦେଇଛୁ।
ଭୁବନେଶ୍ବର: ଆଜି ରାଜଧାନୀ ଭୁବନେଶ୍ବରରୁ ୨୮୭ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ଆଜିର ୨୮୭ ଆକ୍ରାନ୍ତଙ୍କ ମଧ୍ୟରୁ ୩୨ ଜଣ କ୍ଵାରେଣ୍ଟିନରୁ ଚିହ୍ନଟ ହୋଇଥିବା ବେଳେ ୨୫୫ ଜଣ ସ୍ଥାନୀୟ ଆକ୍ରାନ୍ତ। ଆଜିର ଆକ୍ରାନ୍ତଙ୍କୁ ମିଶାଇ ଭୁବନେଶ୍ବରର ମୋଟ ଆକ୍ରାନ୍ତଙ୍କ ସଂଖ୍ୟା ୮୬ ହଜାର ୬୮୯ କୁ ବୃଦ୍ଧି ହୋଇଛି।
ସେହିପରି ଆଜି ଭୁବନେଶ୍ବରରୁ ୭୧୬ ଜଣ ଆକ୍ରାନ୍ତ ସୁସ୍ଥ ହୋଇ ଘରକୁ ଫେରିଛନ୍ତି। ତେବେ ଏହି ସୁସ୍ଥ ଆକ୍ରାନ୍ତକୁ ମିଶାଇ ମୋଟ ୮୪ ହଜାର ୪୧୨ ଜଣ ଆକ୍ରାନ୍ତ ସୁସ୍ଥ ହୋଇ ଘରକୁ ଫେରିଥିବା ବେଳେ ୧ ହଜାର ୮୫୪ ଜଣ ସକ୍ରିୟ ଆକ୍ରାନ୍ତ ଚିକିତ୍ସିତ ହେଉଛନ୍ତି ଏବଂ ୪୦୨ ଜଣ କରୋନାରେ ମୃତ୍ୟୁବରଣ କରିଛନ୍ତି।
ଭୁବନେଶ୍ୱର: ସାରା ବିଶ୍ୱରେ ବର୍ତ୍ତମାନ ଯୋଗକୁ ଗୁରୁତ୍ୱ ଦିଆ ଯାଉଥିବା ବେଳେ ଏହା ସାହାଯ୍ୟରେ ସବୁ ବୟସର ବ୍ୟକ୍ତି ବିଶେଷଙ୍କୁ ବିଭିନ୍ନ ରୋଗରୁ ଦୁରେଇ ରଖିବା ନିମନ୍ତେ ଭାରତରେ ଚିନ୍ତା କରାଯାଉଛି। ଏହାସତ୍ତ୍ୱେ ସହରାଂଚଳ ବାସୀଙ୍କ ମଧ୍ୟରେ ଏହି ଅଭ୍ୟାସ ଆଦୃତ ହୋଇ ପାରି ନାହିଁ ବୋଲି ଏକ ସର୍ଭେରୁ ଜଣା ପଡିଛି।
ଭୁବନେଶ୍ୱରରେ ମାତ୍ର ୧୭ ପ୍ରତିଶତ ଲୋକ ‘ଆସନ’, ‘ପ୍ରାଣାୟାମ ‘ ବା ‘ଧ୍ୟାନ’ କରୁଥିବା ବେଳେ ୧୦.୭ ପ୍ରତିଶତ ଲୋକ ଯୋଗର ବିଭିନ୍ନ ଅଭ୍ୟାସ କରିଥାନ୍ତି ବୋଲି ଶିକ୍ଷା ଓ ଅନୁସନ୍ଧାନ (ସୋଆ) ପରିଚାଳିତ ଇନ୍ଷ୍ଟିଚ୍ୟୁଟ ଅଫ ମେଡିକାଲ ସାଇନ୍ସେସ ଆଣ୍ଡ ସମ ହସ୍ପିଟାଲର କମ୍ୟୁନିଟି ମେଡ଼ିସିନ ବିଭାଗ ପକ୍ଷରୁ କରାଯାଇଥିବା ସର୍ଭେରୁ ଜଣାପଡିଛି।
ଡ଼ଃ ସତ୍ୟଜିତ ମହାନ୍ତି, ଡ଼ଃ ସନ୍ଦୀପ କୁମାର ପାଣିଗ୍ରାହୀ ଓ ଡ଼ଃ ଜ୍ୟୋତି ରଞ୍ଜନ ସାହୁଙ୍କ ଦ୍ଵାରା ଭୁବନେଶ୍ୱରର ୧୨୦୦ ରୁ ଅଧିକ ଲୋକଙ୍କୁ ନେଇ ଏହି ସାମ୍ପଲ ଷ୍ଟଡି କରାଯାଇଛି।
ନିକଟରେ ଭାରତର ବିଭିନ୍ନ ରାଜ୍ୟ ର ରାଜଧାନୀ ଗୁଡ଼ିକ ମଧ୍ୟରେ ଭୁବନେଶ୍ଵର ଶ୍ରେଷ୍ଠ ୪ଟି ବାସପଯୋଗୀ ସହର ମଧ୍ୟରେ ସ୍ଥାନିତ ହୋଇଛି।
ଏହି ସର୍ଭେରୁ ଜଣାପଡିଛି ଯେ ପୁରୁଷ ମାନଙ୍କ ଅପେକ୍ଷା ଭୁବନେଶ୍ୱରରେ ମହିଳା ମାନେ ଅଧିକ ସଂଖ୍ୟାରେ ଯୋଗାଭ୍ୟାସ କରୁଛନ୍ତି। ତେବେ ଅଧିକ ଶିକ୍ଷାଗତ ଯୋଗ୍ୟତା ଥିବା ଲୋକମାନେ ଯୋଗାଭ୍ୟାସ କୁ ଗ୍ରହଣ କରିବା ନିମନ୍ତେ ଅଧିକ ଆଗ୍ରହୀ ବୋଲି କହିଛନ୍ତି କମ୍ୟୁନିଟି ମେଡ଼ିସିନ ବିଭାଗର ପ୍ରଫେସର ଇ. ଭେଙ୍କଟ ରାଓ।
ଯୋଗର ଗ୍ରହଣୀୟତା କ୍ଷେତ୍ରରେ ଭାରତରେ ଏହା ଦ୍ଵିତୀୟ ସର୍ଭେ ବୋଲି ପ୍ରଫେସର ରାଓ ସୂଚନା ଦେଇ ପୂର୍ବ ସର୍ଭେ ଅନୁଯାୟୀ ପୂର୍ବ ଭାରତର ସହରାଞ୍ଚଳରେ ବାସ କରୁଥିବା ଲୋକଙ୍କ ମଧ୍ୟରୁ ମାତ୍ର ୫.୩ ପ୍ରତିଶତ ଯୋଗକୁ ଗୁରୁତ୍ୱ ଦେଉଥିବା ଜଣା ପଡିଥିଲା ବୋଲି କହିଛନ୍ତି।
ସଦ୍ୟତମ ସର୍ଭେରୁ ଜଣାପଡିଛି ଯେ ଉଚ୍ଚ ସାମାଜିକ ଓ ଅର୍ଥନୈତିକ ବର୍ଗର ବ୍ୟକ୍ତି ମାନେ ଯୋଗାଭ୍ୟାସ ନିମନ୍ତେ ବିଶେଷ ଆଗ୍ରହ ଦେଖାଉ ନାହାନ୍ତି। ତେବେ ଯେଉଁମାନେ ଯୋଗ କରୁଛନ୍ତି ସେମାନେ ଶାରୀରିକ ଭାବେ ସୁସ୍ଥ ଅଛନ୍ତି ଏବଂ ଭୁବନେଶ୍ବରରେ ୪୯ ପ୍ରତିଶତ ଡାକ୍ତର ତାଙ୍କ ରୋଗୀ ମାନଙ୍କୁ ଶାରୀରିକ ବ୍ୟାୟାମ ଭାବେ ଯୋଗାଭ୍ୟାସ କରିବାକୁ ପରାମର୍ଶ ଦେଉଛନ୍ତି।
ବୈଦିକ ଯୁଗରେ ଯୋଗର ଉତ୍ପତି ହୋଇଥିବା ବେଳେ ୨୦୧୫ ମସିହାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜାତିସଂଘରେ ସୁସ୍ଥତା ଓ ଜନକଲ୍ୟାଣ ନିମନ୍ତେ ଯୋଗର ଉପଯୋଗୀତା ଉପରେ ଗୁରୁତ୍ୱାରୋପ କରିବା ପରେ ସାରା ବିଶ୍ୱରେ ଏହା ପରିବ୍ୟାପ୍ତ ହୋଇଥିଲା। ଏହା ଛଡ଼ା ଜୁନ ୨୧ ତାରିଖକୁ ବିଶ୍ୱ ଯୋଗ ଦିବସ ଭାବେ ପାଳନ କରାଯାଉଛି।
‘ଫିଟ ଇଣ୍ଡିଆ’ କାର୍ଯ୍ୟକ୍ରମରେ ଯୋଗ କୁ ଅନ୍ୟତମ ଶାରୀରିକ ଅଭ୍ୟାସ ଭାବେ ଉଦ୍ଦିଷ୍ଟ କରାଯାଇଛି।
କୋଭିଡ ମହାମାରୀ ସାରା ମାନବ ସମାଜକୁ ସ୍ତବ୍ଧ କରିରଖିଥିବା ବେଳେ କୋଭିଡ ପରବର୍ତ୍ତୀ ଚିକିତ୍ସାରେ ଯୋଗର ଏକ ପ୍ରମୁଖ ଭୂମିକା ରହୁଛି ଏବଂ ଏ ଦିଗରେ ସଚେତନତାର ଆବଶ୍ୟକତା ରହିଛି।
ଆଠଟି ଯୋଗାଭ୍ୟାସ ମଧ୍ୟରୁ ଆସନ, ପ୍ରାଣାୟାମ ଏବଂ ଧ୍ୟାନ ଯୋଗର ସବୁଠୁ ଗୁରୁତ୍ୱପୂର୍ଣ୍ଣ ଅଭ୍ୟାସ ହୋଇଥିବା ବେଳେ ଅନେକ କ୍ଷେତ୍ରରେ କେବଳ ଆସନ କୁ ହିଁ ଯୋଗ ଭାବେ ଗଣା ଯାଉଛି। ତେବେ ଯୋଗାଭ୍ୟାସ ମଣିଷର ଉଭୟ ଶରୀର ଓ ମନ ଉପରେ ପ୍ରଭାବ ପକାଉ ଥିବା ସ୍ପଷ୍ଟ। ଉଚ୍ଚ ରକ୍ତ ଚାପ, ମଧୁମେହ, ବିଭିନ୍ନ ଯକୃତ ଜନିତ ସମସ୍ୟା, ଆଣ୍ଠୁଗଣ୍ଠି ସମସ୍ୟା, ଅଣ୍ଟା ଯନ୍ତ୍ରଣା, ଏବଂ ମାନସିକ ସମସ୍ୟାର ଉପଚାର ନିମନ୍ତେ ମଧ୍ୟ ଯୋଗ ଏକ ପ୍ରକୃଷ୍ଟ ମାଧ୍ୟମ।
ଗୁରୁତର ସ୍ୱାସ୍ଥ୍ୟ ସମସ୍ୟାରୁ ସୁସ୍ଥ ହେବା ନିମନ୍ତେ ବିଶ୍ୱ ସ୍ୱାସ୍ଥ୍ୟ ସଂଗଠନ ପକ୍ଷରୁ ପ୍ରତ୍ୟେକ ଦିନ ୩୦ ମିନିଟ ର ବ୍ୟାୟ।ମ ନିମନ୍ତେ ପରାମର୍ଶ ଦିଆଯାଇଥିବା ବେଳେ ଯୋଗ ଏକ ଉତ୍କୃଷ୍ଟ ମାଧ୍ୟମ ବୋଲି ଏହି ରିପୋର୍ଟ ରେ ଉଲ୍ଲେଖ କରାଯାଇଛି।
ସୀତାରାମ ଅଗ୍ରୱାଲ
ଚିଲିକା: ବହୁ ପ୍ରତୀକ୍ଷାର ଅନ୍ତ ଘଟିଛି। ଆସନ୍ତାକାଲିଠାରୁ ଚିଲିକା ନିର୍ବାଚନମଣ୍ଡଳୀରେ ୧୮ରୁ ୪୪ ବର୍ଷ ବର୍ଗର ନାଗରିକମାନଙ୍କୁ ପ୍ରଥମ ଡୋଜ ଟୀକା ଦିଆଯିବ। ଏ ନେଇ ଉଭୟ ବାଣପୁର ଏବଂ ବାଲୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଅଧିକାରୀମାନେ ସୂଚନା ଦେଇଛନ୍ତି।
ଜାଣନ୍ତୁ କାଲିର ଟୀକାକରଣ ବ୍ୟବସ୍ଥା କେଉଁଠି ଏବଂ କିପରି ନେବେ:
ବାଣପୁର- ୧୮ରୁ ୪୪ ବର୍ଷ ବର୍ଗର ନାଗରିକ(ପ୍ରଥମ ଡୋଜ) ଏବଂ ୪୫ ବର୍ଷରୁ ଉର୍ଦ୍ଧ୍ଵ ନାଗରିକ(ଦ୍ଵିତୀୟ ଡୋଜ)
୧- ବାଣପୁର ମାଇନର ସ୍କୁଲ- ୫୦୦ ଡୋଜ
୨- ଗମ୍ଭାରୀମୁଣ୍ଡା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର- ୨୫୦ ଡୋଜ
୩- ସୁନାଖଳା ଉପ ସ୍ୱାସ୍ଥ୍ୟ କେନ୍ଦ୍ର- ୨୫୦ ଡୋଜ
ସକାଳ ୬.୩୦ ଘଟିକାରୁ ଟୀକାକରଣ କାର୍ଯ୍ୟକ୍ରମ ଆରମ୍ଭ ହେବ।
ଚିଲିକା- ୧୮ରୁ ୪୪ ବର୍ଷ ବର୍ଗର ନାଗରିକ(ପ୍ରଥମ ଡୋଜ) ଏବଂ ୪୫ ବର୍ଷରୁ ଉର୍ଦ୍ଧ୍ଵ ନାଗରିକ(ଦ୍ଵିତୀୟ ଡୋଜ)
୧- ବାଲୁଗାଁ ଉଚ୍ଚ ବିଦ୍ୟାଳୟ- ୪୦୦ ଡୋଜ
୨- ନଈରୀ ଉପ ସ୍ୱାସ୍ଥ୍ୟ କେନ୍ଦ୍ର- ୩୦୦ ଡୋଜ
୩- ଜରିପଡା ଉପ ସ୍ୱାସ୍ଥ୍ୟ କେନ୍ଦ୍ର- ୩୦୦ ଡୋଜ
୧୮ରୁ ୪୪ ବର୍ଷ ନାଗରିକ ମାନଙ୍କ ଟୀକାକରଣ ସମୟ – ସକାଳ ୯ ରୁ ମଧ୍ୟାହ୍ନ ୧୨ ଘଟିକା
୪୫ ବର୍ଷରୁ ଉର୍ଦ୍ଧ୍ଵ ନାଗରିକ ମାନଙ୍କ ଟୀକାକରଣ ସମୟ- ଅପରାହ୍ନ ୩ ରୁ ସନ୍ଧ୍ୟା ୬ ଘଟିକା
କିପରି ନେବେ:
ଟୀକାକେନ୍ଦ୍ରରେ ସିଧାସଳଖ ନିଜର ଆଧାର କାର୍ଡ ନମ୍ବର ଏବଂ ପଞ୍ଜିକୃତ ମୋବାଇଲ ନମ୍ବର ଦେଇ ଟୀକା ନେଇପାରିବେ।
ସୀତାରାମ ଅଗ୍ରୱାଲ
ଚିଲିକା: ଆଜି ପୂର୍ବାହ୍ନରେ ଖୋର୍ଦ୍ଧା ଜିଲ୍ଲା ଚିଲିକା ବ୍ଲକ ଅନ୍ତର୍ଗତ ସୋରଣ ଗ୍ରାମପଞ୍ଚାୟତର ବହୁମୁଖୀ ବାତ୍ୟା ଆଶ୍ରୟସ୍ଥଳୀ ଠାରେ ରାଷ୍ଟ୍ରୀୟ ସ୍ୱୟଂସେବକ ସଙ୍ଘ(ଆରଏସ୍ଏସ୍)ଏବଂ ‘ଦି ବ୍ଲଡ଼ ଡୋନର୍ସ ଓଡିଶା’ ର ମିଳିତ ଆନୁକୂଲ୍ୟରେ ୰ସ୍ବର୍ଗତ ଶ୍ରୀମତୀ ସାବିତ୍ରୀ ଦେବୀଙ୍କ ସ୍ମୃତିରେ ଏକ ସ୍ୱେଚ୍ଛାକୃତ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଛି।
ଉକ୍ତ ଶିବିରକୁ ଖୋର୍ଦ୍ଧା ଜିଲ୍ଲା ବ୍ଲଡ଼ ବ୍ୟାଙ୍କ ଅଧିକାରୀ ଡାକ୍ତର ସୌରଭ ରାୟ ପ୍ରଦୀପ ପ୍ରଜ୍ୱଳନ କରି ଉଦଘାଟିତ କରିଥିଲେ। କରୋନା ମହାମାରୀ ସମୟରେ ରକ୍ତଦାନ କରି ଅନ୍ୟର ଜୀବନ ବଞ୍ଚେଇବା ସହ ଏହି ମହାମାରୀ ଠାରୁ ବିଜୟ ଲାଭ କରିବା ପାଇଁ ବ୍ଲଡ଼ ବ୍ୟାଙ୍କର ମୂଖ୍ୟ ଲାବୋରେଟୋରି ଟେକ୍ନିସିଆନ ଅରୁଣ ସାହୁ ଜନସମାଜକୁ ଆହ୍ଵାନ କରିଥିଲେ।
ସେଇଭଳି ଭାବେ ସାରା ଦେଶ ଉକ୍ତ ଘଡିସନ୍ଧି ମୁହୂର୍ତ୍ତରେ ଜୀବନ ମରଣର ଦୋଛକିରେ ଲଢେଇ କରୁଥିବାବେଳେ ଉକ୍ତ ରକ୍ତଦାନ ଶିବିର ଆୟୋଜନ କରିବା ନିଶ୍ଚିତ ଭାବେ ଫଳପ୍ରଦ ହୋଇପାରିବ ବୋଲି ରାଷ୍ଟ୍ରୀୟ ସ୍ବୟଂ ସେବକ ସଂଘର ଖୋର୍ଦ୍ଧା ଜିଲ୍ଲା ସେବା ପ୍ରମୂଖ ସୁକାନ୍ତ ବେହେରା ମତବ୍ୟକ୍ତ କରିଥିଲେ।
ଉକ୍ତ କାର୍ଯ୍ୟକ୍ରମର ଅନ୍ୟତମ ସହଯୋଗୀ ‘ଦି ବ୍ଲଡ଼ ଡୋନର୍ସ ଓଡ଼ିଶା’ ର ରାଜ୍ୟ ସଭାପତି ଅଧ୍ୟାପକ ରଞ୍ଜନ କୁମାର ମହାପାତ୍ର କରୋନା ମହାମାରୀ ସମୟରେ ସମସ୍ତ ଯୁବ ସମାଜ ରକ୍ତଦାନ କରିବାକୁ ଆଗେଇ ଆସନ୍ତୁ ବୋଲି ଅନୁରୋଧ କରିଥିଲେ। ତେବେ ଉକ୍ତ ଶିବିରରେ ମୋଟ ୩୫ ୟୁନିଟ୍ ରକ୍ତ ସଂଗ୍ରହ କରାଯାଇଥିଲା। ଏଭଳି ପରିସ୍ଥିତିରେ ସ୍ଵେଚ୍ଛାକୃତ ଭାବେ ରକ୍ତଦାନ ଦ୍ଵାରା ବହୁ ଅମୂଲ୍ୟ ଜୀବନ ବଞ୍ଚିବା ସହ ଅଞ୍ଚଳବାସୀଙ୍କ ଏପରି ମହାନ୍ କାର୍ଯ୍ୟକୁ ବେଶ ପ୍ରଶଂସା କରାଯାଇଛି।
ଉକ୍ତ କାର୍ଯ୍ୟକ୍ରମକୁ ସଫଳ କରିବା ଦିଗରେ ନକୁଳ ବେହେରା, ସନ୍ତୋଷ ସାହୁ, ତପନ ସାହୁ,ଶୁଶାନ୍ତ ବେହେରା, ସୁଧାଂଶୁ ବେହେରା, ରଞ୍ଜିତ କୁମାର ସାହୁ, ଦୀପକ କୁମାର ବେହେରା ଏବଂ ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟର ଡାଟା ଏଣ୍ଟ୍ରି ଅପରେଟର ଅମିତା ନାୟକ ପ୍ରମୁଖ ସହଯୋଗ କରିଥିଲେ।
ପୁରୀ, ଚଳିତ ବର୍ଷର ରଥଯାତ୍ରାର ସମୟ ନିର୍ଘଣ୍ଟ ଶ୍ରୀମନ୍ଦିର ପ୍ରଶାସନ ତରଫରୁ ପ୍ରକାଶ କରାଯାଇଛି। ସେହି ଅନୁସାରେ ଚଳିତ ବର୍ଷ ତିନିଠାକୁରଙ୍କ ପହଣ୍ଡି ବିଜେ ସକାଳ ୮ଟା ୩୦ରେ କରାଯିବ। ଦିନ ୩ଟାରେ ଆରମ୍ଭ ହେବ ରଥଟଣା। କୋଭିଡ କଟକଣା ପାଇଁ ଗତ ବର୍ଷ ପରି ଚଳିତ ବର୍ଷ ମଧ୍ୟ ବିନା ଭକ୍ତିରେ ରଥଟଣା କାର୍ୟ୍ୟ ହେବ। ପ୍ରଶାସନ ତରଫରୁ ଘୋଷଣା କରାଯାଇଥିବା ରଥଯାତ୍ରାରର ସମୟ ନିର୍ଘଣ୍ଟ ହେଲା…
ରଥଯାତ୍ରା ଜୁଲାଇ ୧୨ ତାରିଖ ସୋମବାର
ପହଣ୍ଡି ଆରମ୍ଭ- ସକାଳ ୮ଟା ୩୦ ମିନିଟ
ପହଣ୍ଡି ଶେଷ- ଦିନ ୧୧ଟା ୩୦ ମିନିଟ
ଛେରା ପହଁରା-୧୨ ଟା ୪୫ ରୁ ଦିନ ୨ଟା ପର୍ୟ୍ୟନ୍ତ
ରଥଟଣା- ଅପରାହ୍ନ ୩ଟା
ବାହୁଡା ଯାତ୍ରା ଜୁଲାଇ ୨୦ ତାରିଖ ମଙ୍ଗଳବାର
ପହଣ୍ଡି ଆରମ୍ଭ- ଦିନ ୧୨ଟାରୁ ୨ଟା ୩୦ ମିନିଟ
ଛେରା ପହଁରା-୨ଟା ୩୦ ମିନିଟରୁ ୩ଟା ୩୦ ମିନିଟ
ରଥଟଣା- ଅପରାହ୍ନ ୪ଟା
ସୁନାବେଶ ୨୧ ଜୁଲାଇ ବୁଧବାର
ମଧ୍ୟାହ୍ନ ଧୂପ- ଦିନ ୨ଟାରୁ ୩ଟା ପର୍ୟ୍ୟନ୍ତ
ମଇଲମ- ଅପରାହ୍ନ ୩ଟା ୩୦
ସୁନାବେଶ- ଅପରାହ୍ନ ୪ଟାରୁ ୫ଟା ୩୦ ପର୍ୟ୍ୟନ୍ତ
ନିଳାଦ୍ରୀ ବିଜେ ଜୁଲାଇ ୨୩ ତାରିଖ ଶୁକ୍ରବାର
ନିଳାଦ୍ରୀ ବିଜେ- ଅପରାହ୍ନ ୪ ଟାରୁ ରାତ୍ରୀ ୧୦ଟା ପର୍ୟ୍ୟନ୍ତ
ଭୁବନେଶ୍ବର: ଆଜି ରାଜ୍ୟରୁ ଆଉ ୫ ହଜାର ୮୨ ଜଣ କରୋନା ଆକ୍ରାନ୍ତ ସୁସ୍ଥ ହୋଇଛନ୍ତି। ଏନେଇ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ସୂଚନା ଦେଇଛି।
ଆଜି ସର୍ବାଧିକ ଖୋର୍ଦ୍ଧାରୁ ୭୫୪, କଟକରୁ ୪୭୫, ବାଲେଶ୍ଵରରୁ ୩୯୨, ମୟୂରଭଞ୍ଜରୁ ୨୮୭, ଯାଜପୁରରୁ ୨୬୭, ଅନୁଗୁଳରୁ ୨୫୧, ସୁନ୍ଦରଗଡରୁ ୨୪୮, ଭଦ୍ରକରୁ ୨୪୪, ପୁରୀରୁ ୨୩୪, ଜଗତସିଂହପୁରରୁ ୧୯୪, ରାୟଗଡାରୁ ୧୬୭, ଢେଙ୍କାନାଳରୁ ୧୫୧, ବୌଦ୍ଧରୁ ୧୪୭, ନୟାଗଡରୁ ୧୩୭, କେନ୍ଦୁଝରରୁ ୧୩୩, ବରଗଡରୁ ୧୨୪, ସୋନପୁରରୁ ୧୦୯, କୋରାପୁଟରୁ ୯୬, ମାଲକାନାଗିରିରୁ ୯୨, କନ୍ଧମାଳରୁ ୬୨, ସମ୍ବଲପୁରରୁ ୬୧, ସମ୍ବଲପୁରରୁ ୬୧, କେନ୍ଦ୍ରାପଡାରୁ ୫୯, ନବରଙ୍ଗପୁରରୁ ୫୩, କଳାହାଣ୍ଡିରୁ ୪୮, ଗଜପତିରୁ ୪୬, ଗଞ୍ଜାମରୁ ୩୦, ବଲାଙ୍ଗୀରିରୁ ୨୯, ଦେବଗଡରୁ ୨୬, ଝାରସୁଗୁଡାରୁ ୨୪, ନୂଆପଡାରୁ ୧୮ ଏବଂ ଷ୍ଟେଟ ପୁଲରୁ ୧୨୪ ଜଣ ଆକ୍ରାନ୍ତ ସୁସ୍ଥ ହୋଇ ଘରକୁ ଫେରିଛନ୍ତି।
ଏହି ସୁସ୍ଥ ଆକ୍ରାନ୍ତଙ୍କୁ ମିଶାଇ ରାଜ୍ୟରେ ମୋଟ ୮ ଲକ୍ଷ ୪୦ ହଜାର ୨୧୪ ଜଣ ସୁସ୍ଥ ହୋଇ ଘରକୁ ଫେରିଛନ୍ତି। ତେବେ ରାଜ୍ୟରେ ଆକ୍ରାନ୍ତଙ୍କ ସଂଖ୍ୟା ୮ ଲକ୍ଷ ୭୭ ହଜାର ୫୦୨ କୁ ବୃଦ୍ଧି ହୋଇଥିବାବେଳେ ଏବେ ସକ୍ରିୟ ଆକ୍ରାନ୍ତ ରହିଛନ୍ତି ୩୩ ହଜାର ୬୪୫ ଜଣ। ରାଜ୍ୟରେ ମୋଟ ମୃତକଙ୍କ ସଂଖ୍ୟା ୩୫୮୯ କୁ ବୃଦ୍ଧି ହୋଇଛି।
ଭୁବନେଶ୍ୱର: ରାଜ୍ୟର ପାଖାପାଖି ୧୦ ହଜାର ଗାଁରେ ମୋବାଇଲ ସେବା ନାହିଁ। ଭାରତରେ ଟେଲିଫୋନ ସେବା ୮୭ ଜଣଙ୍କ ପାଖରେ ପହଞ୍ଚିଥିବା ବେଳେ ଓଡ଼ିଶାରେ ଏହି ସଂଖ୍ୟା ୭୭ଭାଗ। ଅର୍ଥାତ୍ ରାଜ୍ୟର ୨୩ଜଣଙ୍କ ପାଖରେ ଆଜି ବି ଟେଲିଫୋନ ସେବା ପହଞ୍ଚି ନାହିଁ। ଯେତିକି ସେବା ପହଞ୍ଚିଛି, ନେଟୱର୍କ ବହୁତ ଦୁର୍ବଳ। ଚାରିକୋଟି ପଚାଶଲକ୍ଷ ଲୋକଙ୍କ ଭିତରୁ ପାଖାପାଖି ତିନିଲକ୍ଷ ଲୋକ ଇଣ୍ଟରନେଟ ବ୍ୟବହାର କରୁଥିବାର ଜଣାଯାଏ।
ଖୋଦ୍ ଶିକ୍ଷାମନ୍ତ୍ରୀ ବିଧାନସଭାରେ ଅତୀତରେ ପ୍ରକାଶ କରିଥିଲେ ଯେ, ରାଜ୍ୟର ୫୪ ଭାଗ ପିଲାଙ୍କ ପାଖରେ ଟେଲିଫୋନ ଅଛି। ସେଥିମଧ୍ୟରୁ ମାତ୍ର ୨୮ଭାଗ ପିଲାଙ୍କ ପାଖରେ ସ୍ମାର୍ଟ ଫୋନ୍ ରହିଛି। ଅର୍ଥାତ୍ ୭୨ ଭାଗ ପିଲାଙ୍କ ପାଖରେ ସ୍ମାର୍ଟଫୋନ୍ ସେବା ଉପଲବ୍ଧ ନାହିଁ। ଖୋଦ୍ ରାଜଧାନୀରେ ଟେଲିଫୋନ୍ ସେବା କେତେ ସ୍ପଷ୍ଟ ତାହା ଆମେ ଅଙ୍ଗେ ଲିଭାଉଛେ। ତେଣୁ ଏଭଳି ପରିସ୍ଥିତିରେ ଅନ୍ ଲାଇନ୍ ଓ ୟୁଟୁବ୍ରେ ପାଠପଢା ଛାତ୍ରଛାତ୍ରୀମାନଙ୍କ ପାଇଁ ‘ଧର୍ମକୁ ଆଖିଠାର’ ବୋଲି ସମାଜବାଦୀ ପାର୍ଟି ରାଜ୍ୟ ସଭାପତି ରବି ବେହେରା ଏକ ପ୍ରେସ୍ ବିଜ୍ଞପ୍ତିରେ କହିଛନ୍ତି। ଯେଉଁ ଦେଶରେ ଖୋଦ୍ କ୍ୟାବିନେଟ ମନ୍ତ୍ରୀ ସିଡ଼ି ଲଗାଇ ଗଛ ଉପରେ ଚଢି ଟେଲିଫୋନ୍ ଧରନ୍ତି, ସେ ଦେଶର ଛାତ୍ରଛାତ୍ରୀମାନେ ଅନ୍ଲାଇନ୍ ଓ ୟୁଟୁବ୍ରେ ପାଠ ପଢିବେ କେମିତି ବୋଲି ଶ୍ରୀ ବେହେରା ପ୍ରଶ୍ନ କରିଛନ୍ତି।
ସରକାର ଯଦି ଆନ୍ତରିକ ଭାବେ ଚାହାଁନ୍ତି, ଦେଶବାସୀ ଡ଼ିଜିଟାଲ ସ୍ୱାଧୀନତା ପାଆନ୍ତୁ, ଛାତ୍ରଛାତ୍ରୀମାନେ ଗୁଣାତ୍ମକ ଟେଲିଫୋନ ସେବା ଦ୍ୱାରା ମହାମାରୀ ସମୟରେ ଶିକ୍ଷାଲାଭ କରନ୍ତୁ, ତାହେଲେ ଚାଷୀମାନଙ୍କୁ ମୋବାଇଲ ଯୋଗାଇ ଦେବା ଭଳି ରାଜ୍ୟ ସରକାର ଛାତ୍ରଛାତ୍ରୀଙ୍କୁ ଡ଼ିଜିଟାଲ ଶିକ୍ଷା ଯୋଗାଇ ଦେବା ପାଇଁ ସ୍ମାର୍ଟ ଫୋନ୍ / ଲାପ୍ଟପ ଯୋଗାଇ ଦେବାକୁ ଶ୍ରୀ ବେହେରା ଦାବି କରିଛନ୍ତି। ଏହା ଫଳରେ ରାଜ୍ୟର ଲକ୍ଷ ଲକ୍ଷ ଛାତ୍ରଛାତ୍ରୀ ଉପକୃତ ହୋଇପାରିବେ ଏବଂ ଡ଼ିଜିଟାଲ ସ୍ୱାଧୀନତାର ସୁଫଳ ସେମାନଙ୍କ ପାଖରେ ପହଞ୍ଚି ପାରିବ।
ମହାମାରୀ ସମୟରେ ଶିକ୍ଷାର ସଙ୍କଟ ଆଉ ଭବିଷ୍ୟତରେ ରହିବ ନାହିଁ। ବିଶେଷତଃ ଗ୍ରାମାଞ୍ଚଳ ଓ ଆଦିବାସୀ ଅଞ୍ଚଳର ଛାତ୍ରଛାତ୍ରୀମାନେ ଏହା ଦ୍ୱାରା ବିଶେଷ ଉପକୃତ ହୋଇପାରିବେ। ଏହି ଶ୍ରେଣୀର ଛାତ୍ରଛାତ୍ରୀଙ୍କ ପାଖରେ ଗୁଣାତ୍ମକ, ନୀରବଚ୍ଛିନ୍ନ ଡ଼ିଜିଟାଲ ସେବା ପହଞ୍ଚିବା ସହିତ ରାଜ୍ୟର ଆଗୁଆ ବର୍ଗର ଛାତ୍ରଛାତ୍ରୀମାନଙ୍କ ଭଳି ମଧ୍ୟ ସେମାନେ ଡ଼ିଜିଟାଲ ଟେକ୍ନୋଲୋଜି ମାଧ୍ୟମରେ ଶିକ୍ଷାଲାଭ କରିପାରିବେ।
ତେଣୁ ରାଜ୍ୟର ଭବିଷ୍ୟତ ନାଗରିକମାନଙ୍କର ସ୍ୱାର୍ଥକୁ ଆଖି ଆଗରେ ରଖି ସେମାନଙ୍କୁ ଡ଼ିଜିଟାଲ ସ୍ୱାଧୀନତା ଦେବା ସହିତ ନିରନ୍ତର, ନୀରବଚ୍ଛିନ୍ନ ଗୁଣାତ୍ମକ ଅନଲାଇନ ଶିକ୍ଷା ଯୋଗାଇ ଦେବା ଉଦ୍ଦେଶ୍ୟରେ ରାଜ୍ୟ ସରକାର ଛାତ୍ରଛାତ୍ରୀମାନଙ୍କୁ ସ୍ମାର୍ଟ ଫୋନ୍ ଓ ଲାପଟପ ଯୋଗାଇ ଦେବାକୁ ଶ୍ରୀ ବେହେରା ଦାବି କରିଛନ୍ତି।
ଏହା ସହିତ ରାଜ୍ୟରେ ସମସ୍ତ ଅଞ୍ଚଳକୁ ମୋବାଇଲ ସେବା ଯୋଗାଇ ଦେବା ସହିତ ଗୁଣାତ୍ମକ ଇଣ୍ଟରନେଟ ସେବା ପାଇଁ ପଦକ୍ଷେପ ନେବାକୁ ଭାରତ ସରକାରଙ୍କ ପାଖରେ ରାଜ୍ୟ ସରକାର ଦାବି କରିବାକୁ ଶ୍ରୀ ବେହେରା ପରାମର୍ଶ ଦେଇଛନ୍ତି।
ସୀତାରାମ ଅଗ୍ରୱାଲ
ବାଲୁଗାଁ: ଆଜି ସକାଳୁ ଖୋର୍ଦ୍ଧା ଜିଲ୍ଲା ବାଲୁଗାଁ ଥାନା ଅନ୍ତର୍ଗତ ୧୬ ନମ୍ବର ଜାତୀୟ ରାଜପଥ ଖଡ଼ିକାପଲ୍ଲୀ ଓଭରବ୍ରିଜ ଉପରୁ ବାଲୁଗାଁ ପୋଲିସ ଏକ ବେଆଇନ ଦେଶୀ ମଦ ବୋଝେଇ ଅଟୋ ଜବତ କରିବା ସହ ଜଣଙ୍କୁ ଗିରଫ କରିଛି।
ସୂଚନା ମୁତାବକ ଆଜି ସକାଳ ୫ ଘଟିକାରେ ବାଲୁଗାଁ ଆଇଆଇସି ରମାକାନ୍ତ ମାହାଲିକ ଏବଂ ନାଭାଲ ଫାଣ୍ଡି ଅଧିକାରୀ ଦିଲୀପ ସାହୁ ପାଟ୍ରୋଲିଂ କରୁଥିବା ସମୟରେ ଖଡ଼ିକାପଲ୍ଲୀ ଓଭରବ୍ରିଜ ଉପରେ ଯାଉଥିବା ଏକ ଅଟୋ ଉପରେ ସନ୍ଦେହ ହେବାରୁ ଅଟୋଟିକୁ ଅଟକାଇ ଯାଞ୍ଚ କରିଥିଲେ। ଯାଞ୍ଚ କରିବା ସମୟରେ ଅଟୋରେ ଦେଶୀ ମଦ ବୋଝେଇ ବସ୍ତା ଥିବାର ଆଇଆଇସି ଜାଣିବାକୁ ପାଇଥିଲେ।
ତେବେ ଅଟୋ ଭିତରୁ ପୋଲିସ ୨୮୦ ଲିଟର ଦେଶୀ ମଦ ଜବତ କରିବା ସହ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ଜଣକ ହେଲେ ବାଲୁଗାଁ ଥାନା ଛେଡାପଦର ଗ୍ରାମର କନ୍ଦର୍ପ ଦାସ। ତେବେ ଘଟଣାସ୍ଥଳରୁ ଅଟୋ ମାଲିକ ଫେରାର ହୋଇଯାଇଛନ୍ତି। ବାଲୁଗାଁ ଥାନା ପୋଲିସ ଗିରଫ ଅଭିଯୁକ୍ତଙ୍କ ବିରୋଧରେ କେସ ନମ୍ବର ୧୦୮/୨୧ ରେ ମାମଲା ରୁଜୁ କରିବା ସହ ଆଜି କୋର୍ଟଚାଲାଣ କରିଥିବାର ବାଲୁଗାଁ ଏସଡ଼ିପିଓ ମାନସ ରଞ୍ଜନ ବାରିକ ସୂଚନା ଦେଇଛନ୍ତି।
ମୂଳଲେଖା : ପ୍ରଭାତ ପଟ୍ଟନାୟକ, ଭାଷାନ୍ତର : ଲଳାଟେନ୍ଦୁ ସାମନ୍ତରାୟ
ଭୁବନେଶ୍ବର, ଆମେରିକା, ବ୍ରିଟେନ, ଜର୍ମାନୀ, ଫ୍ରାନ୍ସ ,ଇଟାଲୀ, ଜାପାନ, ଏବଂ କାନାଡାକୁ ନେଇ ଗଠିତ ଗ୍ରୁପ-୭ ବା ଜି-୭ ର ସଦ୍ୟ ସମାପ୍ତ ବୈଠକରେ ବିଶ୍ୱର ଅବଶିଷ୍ଟ ଦେଶକୁ ଅର୍ଥାତ ତଥାକଥିତ “ବିକାଶଶୀଳ” ଦେଶଗୁଡ଼ିକୁ ଏକ ବିଲିୟନ (୧୦୦ କୋଟି) ଡୋଜ ଆଣ୍ଟି-କୋଭିଡ ଟିକା ଦାନ କରିବାକୁ ପ୍ରତିଶୃତି ଦିଆଯାଇଛି। ଆମେରିକା ୫୦ କୋଟି ଡୋଜ ଓ ବ୍ରିଟେନ ୧୦ କୋଟି ଡୋଜ ଦେବା ପାଇଁ ପ୍ରତିଶୃତି ଦେଇଛନ୍ତି; ଅନ୍ୟ ଜି-୭ ଦେଶ, ଇଟାଲୀ, ଜାପାନ, ଫ୍ରାନ୍ସ, ଜର୍ମାନୀ ଏବଂ କାନାଡା ଅବଶିଷ୍ଟାଂଶ ଟୀକା ଡୋଜ ଦେବେ ବୋଲି ଅନୁମାନ କରାଯାଏ ।
“ଏକ ବିଲିୟନ ଡ଼ୋଜ” ବହୁତ ବଡ଼ ବୋଲି ଶୁଣା ଯାଉଛି, କିନ୍ତୁ ବିଶ୍ବର ଅନ୍ୟାନ୍ୟ ଅଂଚଳର ଆବଶ୍ୟକତା ଆଗରେ ଏହି “ଏକ ବିଲିୟନ ଡ଼ୋଜ” ଅତ୍ୟନ୍ତ ନଗଣ୍ୟ । ସେହିପରି ଉନ୍ନତ ପୁଞ୍ଜିବାଦୀ ଦେଶଗୁଡ଼ିକରେ, ସେହି ଦେଶର ପ୍ରତ୍ୟେକ ବ୍ୟକ୍ତିଙ୍କ ପାଇଁ ଦୁଇଟି ଡୋଜକୁ ହିସାବକୁ ନେଇ ନିଜ ନିଜର ଜନସଂଖ୍ୟା ପାଇଁ ଯାହା ଆବଶ୍ୟକ, ତାହା ଠାରୁ ବହୁ ବହୁ ଗୁଣରେ ସେମାନେ ମହଜୁଦ କରି ରଖିଥିବା ଟିକାଗୁଡ଼ିକର ବିପୁଳ ପରିମାଣର ଭଣ୍ଡାର, ଆଗରେ ଏହି “ଏକ ବିଲିୟନ ଡ଼ୋଜ” ମଧ୍ୟ ଅତ୍ୟନ୍ତ ନଗଣ୍ୟ / ତୁଚ୍ଛ ଅଟେ। ଏହି କାରଣରୁ ଅନେକ ‘ଅନ୍ତର୍ଜାତୀୟ ନାଗରିକ ସମାଜ ସଂଗଠନ’ ଜି-୭ର୍ ଏହି ଘୋଷଣାକୁ କେବଳ ଏକ “ଜନସମ୍ପର୍କର ପ୍ରତାରଣପୁର୍ଣ୍ଣ କୌଶଳ” ବୋଲି ଖାରଜ କରିଛନ୍ତି।
ବର୍ତ୍ତମାନ ସୁଦ୍ଧା ବିଶ୍ୱର ମୋଟ ଟୀକା ନେଇ ନଥିବା ଜନସଂଖ୍ୟା ୬.୮ ବିଲିୟନ (୬୮୦ କୋଟି) ଅଟେ। ଏହି ଜନସଂଖ୍ୟାକୁ ଦୁଇଥର ଟିକା ଦେବା ପାଇଁ ଆବଶ୍ୟକ ହେଉଥିବା ମୋଟ ଟୀକା ଡୋଜ ସଂଖ୍ୟା ୧୩.୬ ବିଲିୟନ (୧୩୬୦ କୋଟି) ରେ ପହଞ୍ଚିବ। ଜି-୭ ଦ୍ୱାରା ପ୍ରତିଶ୍ରୁତି ଦିଆଯାଇଥିବା ଏକ ବିଲିୟନ (୧୦୦ କୋଟି) ଡୋଜ ଏହି ଆବଶ୍ୟକତାର କେବଳ ୭.୪ ପ୍ରତିଶତ ଅଟେ। ଯଦି ଟୀକାର ଉପରୋକ୍ତ ମୋଟ ଚାହିଦାରୁ ଆମେ ତଥାକଥିତ “ବିକାଶଶୀଳ” ଦେଶଗୁଡ଼ିକର ଚାହିଦାକୁ ମାତ୍ର ୧୦ ବିଲିୟନ (୧୦୦୦ କୋଟି) ବୋଲି ଗ୍ରହଣ କରିବା, ଜି-୭ ଦ୍ୱାରା ଯାହା ପ୍ରତିଶ୍ରୁତି ଦିଆଯାଇଛି ତାହା ଏହି ଚାହିଦାର ମାତ୍ର ୧୦ ପ୍ରତିଶତ ହେବ।
ଏଥି ସହିତ, ଉନ୍ନତ ପୁଞ୍ଜିବାଦୀ ଦେଶଗୁଡିକ ବହୁ ପରିମାଣର ଟୀକା କ୍ରୟ କରି ସେଗୁଡିକୁ ମହଜୁଦ କରି ରଖିଛନ୍ତି। ଏପରିକି ଏହି ମହଜୁଦ ପରିମାଣ ତୁଳନାରେ ପ୍ରସ୍ତାବିତ ଦାନର ପରିମାଣର ଅନୁପାତ ବହୁତ କମ୍ । ଉଦାହରଣ ସ୍ୱରୂପ ଇଂଲଣ୍ଡ, ସ୍କଟଲ୍ୟାଣ୍ଡ, ୱେଲ୍ସ ଏବଂ ଉତ୍ତର ଆୟର୍ଲାଣ୍ଡକୁ ନେଇ ଗଠିତ ଗ୍ରେଟ୍ ବ୍ରିଟେନ୍ (United Kingdom) କଥା ବିଚାର କରାଯାଉ। ଏହାର ଜନସଂଖ୍ୟା ୬କୋଟି ୮୦ ଲକ୍ଷ କିନ୍ତୁ ଏହି ଦେଶ ୫୦ କୋଟି ଡୋଜ ଟିକା କିଣିଛି। ଯଦି ଏହି ସମୁଦାୟ ଜନସଂଖ୍ୟାର ଟୀକା ଆବଶ୍ୟକତାକୁ, ଯାହା କିଣାଯାଇ ରଖାଯାଇଛି ସେଥିରୁ ପୂରଣ କରିବାକୁ ହୁଏ ତେବେ ପ୍ରତ୍ୟେକ ବ୍ୟକ୍ତିଙ୍କ ପାଇଁ ଦୁଇ ଡୋଜ ହିସାବରେ ୧୩.୬୦ କୋଟି ଡୋଜର ଟୀକା ବ୍ୟବହାର ହୋଇ , ତଥାପି ୩୬.୪୦ କୋଟି ଡୋଜର ଅତିରିକ୍ତ ଷ୍ଟକ୍ ରହିଯିବ।
ଏହି ବଳକା ମହଜୁଦରୁ ଇଂଲଣ୍ଡ କେବଳ ୧୦ କୋଟି ଡୋଜ ଦାନ କରିବାକୁ ପ୍ରସ୍ତାବ ଦେଉଛି, ଯାହା ଅତିରିକ୍ତ ଷ୍ଟକ୍ ର କେବଳ ୨୭ ପ୍ରତିଶତ । ଏହି ଦେଶ ଅବଶିଷ୍ଟ ୭୩ ପ୍ରତିଶତ କାହିଁକି ରଖିବାକୁ ଚାହୁଁଛି ତାହା ସ୍ପଷ୍ଟ ହୋଇନାହିଁ। ନିଃସନ୍ଦେହରେ ମହାମାରୀ ଜାରି ରହିଲେ ଟୀକାକରଣର ନୂତନ ରାଉଣ୍ଡ ଆବଶ୍ୟକ ହୋଇପାରେ; କିନ୍ତୁ ବର୍ତ୍ତମାନର ଗଚ୍ଛିତ ଟୀକା ଆଗାମୀ ଦିନର ଭୂତାଣୁ ବିରୁଦ୍ଧରେ ପ୍ରଭାବଶାଳୀ ହୋଇ ରହିବ ବୋଲି ମାନିନେଲେ ମଧ୍ୟ , ଏବଂ ନୂତନ ଧରଣର ଟୀକାକରଣ ପୂର୍ବରୁ ମଧ୍ୟବର୍ତ୍ତୀ କାଳରେ ଉତ୍ପାଦିତ ହେବାକୁ ଥିବା ନୂତନ ଟୀକାର ଉତ୍ପାଦନରୁ କିଛି ବି କ୍ରୟ କରାଯିବ ନାହିଁ ବୋଲି ଅନୁମାନ କଲେ ମଧ୍ୟ, ୧୦ କୋଟି ଡୋଜ ଦାନ କରି ଗ୍ରେଟ୍ ବ୍ରିଟେନ୍ ନିଜ ପାଖରେ ଯେଉଁ ଅତିରିକ୍ତ ଷ୍ଟକ୍ ରଖିବା ପାଇଁ ଯୋଜନା କରୁଛି, ଏହାର ସମୁଦାୟ ଜନସଂଖ୍ୟାକୁ ଦୁଇଥର ଟୀକାକରଣ ପାଇଁ ଯଥେଷ୍ଟ ! ଯୁକ୍ତରାଷ୍ଟ୍ର ଆମେରିକା ଏବଂ ଅନ୍ୟାନ୍ୟ ଉନ୍ନତ ପୁଞ୍ଜିବାଦୀ ଦେଶମାନଙ୍କ କ୍ଷେତ୍ରରେ ମଧ୍ୟ ସେହି ସମାନ ଅବସ୍ଥା।
ଏପରିକି, ଜି-୭ ଦ୍ବାରା ଏହି ପ୍ରତିଶ୍ରୁତିବଦ୍ଧ ଡୋଜଗୁଡିକ ଆସନ୍ତା ବର୍ଷର ମଧ୍ୟଭାଗ ପର୍ଯ୍ୟନ୍ତ ପ୍ରସାରିତ ସମୟ ଅବଧି ମଧ୍ୟରେ ମିଳିପାରେ। ଏହା ନୁହେଁ ଯେ ଏସିଆ, ଆଫ୍ରିକା ଏବଂ ଲାଟିନ୍ ଆମେରିକାରେ ବର୍ତ୍ତମାନ ଦ୍ୱିତୀୟ ପର୍ଯ୍ୟାୟ ମହାମାରୀର ସବୁଠାରୁ ଖରାପ ପ୍ରଭାବର ସମ୍ମୁଖୀନ ହେଉଥିବା ଲୋକମାନଙ୍କ ପାଇଁ ଏହି ଷ୍ଟକ୍ ହଠାତ୍ ଉପଲବ୍ଧ ହେବାକୁ ଯାଉଛି ; ଏହି ପ୍ରତିଶ୍ରୁତିବଦ୍ଧ ଟିକା ଉପଲବ୍ଧ ହେବା ବେଳକୁ ମହାମାରୀ ହେତୁ ଆହୁରି ଲକ୍ଷ ଲକ୍ଷ ଲୋକ ମରିଯାଇଥିବେ।
ଏହା ଚିନ୍ତା କରାଯାଇପାରେ ଯେ ଜି-୭ର ଟୀକା ଅନୁଦାନର ପ୍ରସ୍ତାବିତ ଆକାର ବିଶ୍ବର ଅନ୍ୟାନ୍ୟ ଦେଶର ଚାହିଦା ତୁଳନାରେ ସାମାନ୍ୟ ହୋଇଥିଲେ ମଧ୍ୟ ଏହାର ଆର୍ଥିକ ମୂଲ୍ୟ ଯଥେଷ୍ଟ ହେବ। ଏପରିକି, ଏହି ଦାବି ମଧ୍ୟ ଭିତ୍ତିହୀନ ବୋଲି ପ୍ରମାଣିତ ହୋଇଥାଏ। ଭିନ୍ନ ଭିନ୍ନ ମୂଲ୍ୟର ବିଭିନ୍ନ ଟିକା ରହିଛି ଏବଂ ଜି-୭ ଦ୍ବାରା କେଉଁ ଟିକା ଦାନ କରାଯିବ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ୟୁରୋପୀୟ ୟୁନିୟନର ଦେଶଗୁଡିକ ଠାରୁ ଅକ୍ସଫୋର୍ଡ-ଆଷ୍ଟ୍ରା ଜେନେକା ଟିକା ପାଇଁ କମ୍ପାନୀ ଦ୍ବାରା ଡୋଜ ପିଛା ୩ ଡଲାର ଆଦାୟ କରାଯାଉଥିବାବେଳେ ଅନ୍ୟ ଟିକାଗୁଡିକ ବହୁ ମହଙ୍ଗା ଅଟେ।
ଖବର ଅନୁଯାୟୀ ଆମେରିକା ୫୦ କୋଟି ଡୋଜ ଫାଇଜର ଟିକା ଦାନ କରିବାକୁ ଯୋଜନା କରୁଛି। ଯେହେତୁ ଏହା ପୂର୍ବରୁ, ନିଜ ଦେଶବାସୀଙ୍କ ପାଇଁ ଏହି ଟିକାକୁ ଡୋଜ ପିଛା ୧୯.୫ ଡଲାରରେ କିଣିଛି, ଆସନ୍ତୁ ଧରିନେବା ଯେ ଏହା ଦାନ କରିବାକୁ ଚାହୁଁଥିବା ଟିକାକୁ ଡୋଜ ପିଛା ପୂର୍ଣ୍ଣ ସଂଖ୍ୟାରେ ୨୦ ଡଲାର୍ ଦେବ। ତେବେ, ଏହାର ସମୁଦାୟ ଅବଦାନ ପ୍ରାୟ ୧୦ ବିଲିୟନ (୧୦୦୦ କୋଟି) ଡ଼ଲାର ହେବ ଯାହା ତା’ର ଜିଡିପିର ୦.୦୫ ପ୍ରତିଶତ ହୋଇପାରେ। ଏହିପରି, ଆମେ ଯେକୌଣସି ଦିଗରୁ ଏହାକୁ ବିଚାର କଲେ ଦେଖିବା ଯେ, ଜି-୭ର ଦାନ ହେଉଛି ଏହାର ଖାଇବା ଟେବୁଲରୁ ଛୋଟ ଟୁକୁଡ଼ାଏ ରୁଟି ସହ ସମାନ।
ଏଥି ସହିତ, ଏହି ଦାନକୁ ଘେରି ରହିଥିବା ମାମୁଲି ମନ୍ତବ୍ୟଗୁଡିକ ଏହି ତଥ୍ୟକୁ ଲୁଚାଇଥାଏ ଯେ ଜି-୭ ଏହି ଟିକା ଉପରେ ଅସ୍ଥାୟୀ ପେଟେଣ୍ଟ-ଛାଡ ପ୍ରଶ୍ନ ଉପରେ ଆଲୋଚନା କରି ନାହିଁ। ସେମାନଙ୍କ ମଧ୍ୟରେ କେବଳ ଆମେରିକା ଏବଂ ଫ୍ରାନ୍ସ ‘ଅସ୍ଥାୟୀ ପେଟେଣ୍ଟ-ଛାଡ’ ପ୍ରସ୍ତାବକୁ ଗ୍ରହଣ କରିଛନ୍ତି। ଯଦି ଜି-୭ ଏଭଳି ଛାଡ଼ର ପ୍ରସ୍ତାବ ଉପରେ ଆଲୋଚନା ଏବଂ ଅନୁମୋଦନ କରିଥାଆନ୍ତା, ତେବେ ଏହା ଟୀକା ଉତ୍ପାଦନକୁ ବହୁଗୁଣିତ କରିଥାନ୍ତା ଏବଂ ଏହା ଶହେ କୋଟି ଡ଼ୋଜର ଦାନ ଅପେକ୍ଷା ଗରିବ ଦେଶମାନଙ୍କ ପାଇଁ ଅଧିକ ଉପଯୋଗୀ ହୋଇଥାନ୍ତା।
ବାସ୍ତବରେ, ଅନ୍ୟ ଦେଶମାନଙ୍କ କଥା ବାଦ ଦିଅନ୍ତୁ, ବ୍ରିଟେନ୍, ଯିଏକି ଏହି ଜି-୭ ଶିଖର ସମ୍ମିଳନୀ ପାଇଁ ଆୟୋଜକ ଦେଶ ଥିଲା ଏବଂ ଯାହାର ପ୍ରଧାନମନ୍ତ୍ରୀ ସାର୍ବଜନୀନ ଟୀକାକରଣର ଆବଶ୍ୟକତା ବିଷୟରେ ତାର ସ୍ୱରରେ ଚିତ୍କାର କରୁଛନ୍ତି, ସେ ଟୀକା ଉପରେ ଏକ ଅସ୍ଥାୟୀ ପେଟେଣ୍ଟ ଛାଡ଼ ପାଇଁ ରାଜି ହୋଇନାହାଁନ୍ତି, ଯାହା କେବଳ ବୁର୍ଜୁୟା ସ୍ୱାର୍ଥର ପ୍ରୋତ୍ସାହନ ତଥା ପ୍ରତିରକ୍ଷା ପାଇଁ ବୁର୍ଜୁୟା ସରକାରଙ୍କ ପ୍ରତିବଦ୍ଧତାର ଶକ୍ତିକୁ ସୂଚିତ କରେ। ଏବଂ ବର୍ତ୍ତମାନର ବୁର୍ଜୁୟା ସ୍ୱାର୍ଥ ବିଶ୍ୱସ୍ତରୀୟ ଟୀକା ଅଭାବକୁ ଦୀର୍ଘସ୍ଥାୟୀ କରିବା ମଧ୍ୟରେ ନିହିତ ରହିଛି ଯାହା ମୁନାଫାଖୋରୀ ପାଇଁ ଏକ ଅନୁକୂଳ ବାତାବରଣ ସୃଷ୍ଟି କରିଛି।
ଆମେରିକୀୟ ଫାର୍ମାସ୍ୟୁଟିକାଲ୍ ଏବଂ ବାୟୋଟେକ୍ନୋଲୋଜି କମ୍ପାନୀ – “ମୋଡର୍ନା” ର କଥା ବିଚାର କରାଯାଉ। କୋଭିଡ ଟିକାର ଅନୁସନ୍ଧାନ ଏବଂ ବିକାଶ ପାଇଁ ଏହି କମ୍ପାନୀ ଆମେରିକା ସରକାରଙ୍କ ଠାରୁ ୬ ବିଲିୟନ (୬୦୦ କୋଟି) ଡଲାର ପାଇଲା। ଏହାର ପ୍ରତିବଦଳରେ ଏହା ଆମେରିକା ସରକାରଙ୍କ ପାଇଁ ତା’ର ଟୀକା ଡୋଜ ପିଛା ୧୫ ଡ଼ଲାର ଧାର୍ଯ୍ୟ କରିଥିଲା, ଯଦିଓ ଆଷ୍ଟ୍ରାଜେନେକା ଦ୍ବାରା ଚାର୍ଜ କରାଯାଇଥିବା ୩-୪ ଡଲାର ତୁଳନାରେ ଏହା ଅଧିକ ମହଙ୍ଗା ଥିଲା, ଫାଇଜର କମ୍ପାନୀ ଦ୍ବାରା ଚାର୍ଜ କରାଯାଉଥିବା ୧୯.୫୦ ଡ଼ଲାର ଠାରୁ ଶସ୍ତା ଥିଲା।
କେବଳ ଯୁକ୍ତି ପାଇଁ ଧରାଯାଉ, ଏହି ୧୫ ଡ଼ଲାର ଉତ୍ପାଦନର ୟୁନିଟ୍ ମୂଲ୍ୟ ଏବଂଏଥିସହ ଏକ ଯୁକ୍ତିଯୁକ୍ତ ଲାଭର ମାର୍ଜିନକୁ ବୁଝାଉଛି, ଯେଉଁଥିରେ ସରକାରଙ୍କ ଦ୍ଵାରା ଅନୁସନ୍ଧାନ ପାଇଁ କରାଯାଇଥିବା ଖର୍ଚ୍ଚର ପରିଶୋଧର କୌଣସି ଅଂଶକୁ ଯୁକ୍ତ କରାଯାଇନାହିଁ। ତେବେ ଅନ୍ୟ କ୍ରେତାଙ୍କ ଠାରୁ ମଧ୍ୟ ମୋଡର୍ନା ୧୫ ଡଲାରରୁ ଅଧିକ ଦାମ୍ ଆଦାୟ କରିବାର କୌଣସି କାରଣ ନାହିଁ ( ହୁଏତ ଲାଭ ମାର୍ଜିନ ଦ୍ବାରା ଏହି ଦାମ୍ ଅଳ୍ପ ଟିକେ ଅଧିକ ହୋଇପାରେ), କାରଣ ଆମେରିକା ସରକାର ଏହି କମ୍ପାନୀ ତରଫରୁ ଗବେଷଣା ନିମନ୍ତେ ଯାହା ଖର୍ଚ୍ଚ କରିଛନ୍ତି, ତାହା ଉପରେ “ମୋଡର୍ନା” ଲାଭ ଉଠାଇବାର କୌଣସି ଯଥାର୍ଥତା ନାହିଁ। କିନ୍ତୁ “ମୋଡର୍ନା”ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ଷ୍ଟିଫେନ୍ ବାନସେଲ କହିଛନ୍ତି ଯେ ଯୋଗାଣ ଅର୍ଡରର ଆକାର ଉପରେ ନିର୍ଭର କରି, ଏହାର ପ୍ରତି ଡୋଜ ଟିକା ପାଇଁ ଏକ ଉଚିତ ମୂଲ୍ୟ ୨୫ ଡ଼ଲାର ରୁ ୩୭ ଡ଼ଲାର ମଧ୍ୟରେ ଯେକୌଣସି ଏକ ମୂଲ୍ୟ ଅଟେ !
ଏଭଳି ଲାଭଜନକ ପରିସ୍ଥିତିର ପରିଣାମ ସ୍ୱରୂପ, ଗତ ବର୍ଷ ମାର୍ଚ୍ଚ ପହିଲାରୁ ଚଳିତ ବର୍ଷ ଏପ୍ରିଲ ମଧ୍ୟରେ “ମଡର୍ନା”ର ସେୟାର ମୂଲ୍ୟ ଛଅଗୁଣ ବୃଦ୍ଧି ପାଇଛି ଏବଂ ଏହାର ସିଇଓ ପ୍ରାୟ ତୁଳନାତ୍ମକ ସମୟ ମଧ୍ୟରେ ୫.୫ ବିଲିୟନ (୫୫୦ କୋଟି) ଡ଼ଲାରର ସମ୍ପତ୍ତି ନିର୍ମାଣ କରିଛନ୍ତି। କହିବା ବାହୁଲ୍ୟ ମାତ୍ର, ସାମ୍ପ୍ରତିକ ଟିକା ଅଭାବରୁ କେବଳ “ମୋଡର୍ନା” ଯେ ଉପକୃତ, ତା ନୁହଁ; ଅନ୍ୟମାନେ ମଧ୍ୟ ଏହି ଖେଳରେ ଅଛନ୍ତି ଏବଂ ସୁନ୍ଦର ଭାବରେ ଖେଳ ପ୍ରଦର୍ଶନ କରୁଛନ୍ତି ।
ଦୁର୍ଭିକ୍ଷରୁ ତ୍ରାଣ ପାଇଁ ଗଠିତ ଅକ୍ସଫୋର୍ଡ କମିଟି (ଅକ୍ସଫାମ) ଦ୍ୱାରା ନିର୍ମିତ ଏକ ସରଳ ପରିସଂଖ୍ୟାନ ଲାଭଖୋରୀର ପରିମାଣ ଦର୍ଶାଉଛି। ଅକ୍ସଫାମ ମତରେ, ଯଦି ପେଟେଣ୍ଟ ଛାଡ ହୁଏ ତେବେ “ନିମ୍ନ ଏବଂ ମଧ୍ୟମ ଆୟକାରୀ ଦେଶଗୁଡିକ”ର ସମୁଦାୟ ଜନସଂଖ୍ୟାକୁ ୬.୫ ବିଲିୟନ (୬୫୦ କୋଟି) ଡ଼ଲାର ଖର୍ଚ୍ଚରେ ଟୀକାକରଣ କରାଯାଇପାରେ।
ଅନ୍ୟପକ୍ଷରେ, ପେଟେଣ୍ଟ ଛାଡ ଅନୁପସ୍ଥିତିରେ ଏହାର ମୂଲ୍ୟ ୮୦ ବିଲିୟନ (୮୦୦୦ କୋଟି) ଡଲାର ହେବ। ଅର୍ଥାତ ଯଦି ଏହି ଦେଶମାନଙ୍କର ସମଗ୍ର ଜନସଂଖ୍ୟାକୁ ଟୀକାକରଣ କରାଯାଏ ତେବେ ୮୦ ବିଲିୟନ (୮୦୦୦ କୋଟି) ଡଲାର ଖର୍ଚ୍ଚ ହେବ ଏବଂ ଏଥିରୁ ପ୍ରାୟ ୭୪ ବିଲିୟନ (୭୪୦୦ କୋଟି) ଡଲାର ଟିକା ଉତ୍ପାଦନକାରୀ କମ୍ପାନୀଗୁଡିକର ପକେଟକୁ ଯିବ। ଭିନ୍ନ ଭାବରେ କହିବାକୁ ଗଲେ, ପେଟେଣ୍ଟ-ସଂରକ୍ଷଣ ସହିତ ଧାର୍ଯ୍ୟ ମୂଲ୍ୟରେ ଏହି ଦେଶମାନଙ୍କର ଜନସଂଖ୍ୟାକୁ ଟୀକାକରଣ ପାଇଁ ମୋଟ ଖର୍ଚ୍ଚର ୯୦ ପ୍ରତିଶତରୁ ଅଧିକ ପେଟେଣ୍ଟ ଧରିଥିବା ବ୍ୟକ୍ତିଙ୍କ ପକେଟକୁ ଯିବ।
ଏହିପରି ଆପଦ କାଳର ସୁଯୋଗରେ ଅତ୍ୟଧିକ ମୁନାଫାଖୋରୀକୁ ସୁରକ୍ଷା ଦେବା ପାଇଁ ବୁର୍ଜୁୟା ସରକାରମାନେ ଆଗ୍ରହୀ। ଏକ ଅସ୍ଥାୟୀ ପେଟେଣ୍ଟ-ଛାଡ ପାଇଁ ସହମତ ହୋଇଥିବା ସରକାରଗୁଡିକ ଚାହୁଁଛନ୍ତି ଯେ ବିଶ୍ୱ ସ୍ୱାସ୍ଥ୍ୟ ସଂଗଠନ (WTO)ରେ ଏକ ଚୁକ୍ତିନାମା କରିବାକୁ ଯେତିକି ସମୟ ଆବଶ୍ୟକ ସେତିକି ସମୟ ପରେ ପରେ ଏହି ଲାଭଖୋରୀର ସମାପ୍ତି ଘଟୁ ; ଯେଉଁମାନେ ଏହିପରି ଛାଡକୁ ବିରୋଧ କରନ୍ତି, ସେମାନେ ଏହି ଲାଭ ପାଇବାକୁ ଚାହାଁନ୍ତି। ଜି-୭ ବୈଠକରେ ଏହି ଦୁଇଟି ଅବସ୍ଥାନ ଉପରେ ଆଲୋଚନା କରିବା ପାଇଁ ଏବଂ ଏହିପରି ଲାଭଖୋରୀକୁ କିପରି ଶୀଘ୍ର ସମାପ୍ତ କରାଯିବ ସେ ସମ୍ବନ୍ଧରେ କିଛି ଚୁକ୍ତି କରିବାକୁ କୌଣସି ପ୍ରୟାସ କରାଯାଇ ନାହିଁ। ଏପରିକି ଆମେରିକା ଏବଂ ଫ୍ରାନ୍ସ ମଧ୍ୟ ଜି-୭ ମଧ୍ୟରେ ଥିବା ଅବାଧ୍ୟ ଜିଦ୍ଖୋର ସହକର୍ମୀଙ୍କୁ ଅସ୍ଥାୟୀ ପେଟେଣ୍ଟ-ଛାଡକୁ ବିରୋଧ ନ କରିବାକୁ ମନାଇବା ପାଇଁ କୌଣସି ବିଶେଷ ଉଦ୍ୟମ କରିଥିବାର ସୂଚନା ଦେଇ ନାହାନ୍ତି।
‘ପେଟେଣ୍ଟ-ଛାଡ’ କେବଳ ମୂଲ୍ୟ ହ୍ରାସ କରିବା ପାଇଁ ଗୁରୁତ୍ୱପୂର୍ଣ୍ଣ ନୁହେଁ, ଟୀକା ଉତ୍ପାଦନ ବୃଦ୍ଧି ପାଇଁ ଏହାର ମହତ୍ତ୍ୱ ସବୁଠାରୁ ଉର୍ଦ୍ଧ୍ବରେ । କିନ୍ତୁ ଏହି ଦିଗରେ କୌଣସି ଅଗ୍ରଗତିର ସାମାନ୍ୟ ପ୍ରମାଣ ନାହିଁ। ନିକଟରେ ଯାହା ଘଟିଛି ତାହା ହେଉଛି ଯେ ଜୁନ୍ ୯ ତାରିଖରେ ବିଶ୍ୱ ସ୍ୱାସ୍ଥ୍ୟ ସଂଗଠନ (ଡବ୍ଲୁଏଚଓ)ର ଏକ ବୈଠକରେ ଦେଶମାନେ “ଚୁକ୍ତିନାମା ପ୍ରସ୍ତୁତ କରିବା ଦିଗରେ ଏକ ପ୍ରକ୍ରିୟା ଆରମ୍ଭ କରିବା” ପ୍ରସ୍ତାବକୁ ସମର୍ଥନ କରିଥିଲେ ଏବଂ “ଏହି ଆଲୋଚନାର ତତ୍ପରତା ଉପରେ ସହମତ ହୋଇଥିଲେ”!
ନୂଆଦିଲ୍ଲୀ: ଲୋକ ଜନଶକ୍ତି ପାର୍ଟିର ଲଢେଇ ଏବେ ନିର୍ବାଚନ କମିଶନ ପର୍ଯ୍ୟନ୍ତ ପହଞ୍ଚିସାରିଛି। ଏହା ଭିତରେ ଚିରାଗ ପାଶୱାନଙ୍କ ସମର୍ଥକମାନେ ଆଜି ଦିଲ୍ଲୀରେ ଦଳର ରାଷ୍ଟ୍ରୀୟ କାର୍ଯ୍ୟକାରିଣୀ ବୈଠକ ଡାକିଥିଲେ। ପ୍ରାରମ୍ଭରୁ ଚିରାଗ ପାଶୱାନଙ୍କ ସହ ବୈଠକକୁ ଆସିଥିବା ସମସ୍ତ ସଦସ୍ୟ ସମ୍ବିଧାନର ଶପଥ ନେଇଥିଲେ। ଦଳର ସୁରକ୍ଷା ପାଇଁ ଏହି ବୈଠକରେ ଶପଥ ଗ୍ରହଣ କରାଯାଇଥିଲା। ଏହାସହ ପୂର୍ବତନ ଦଳର ଅଧ୍ୟକ୍ଷ ତଥା ପୂର୍ବତନ କେନ୍ଦ୍ରମନ୍ତ୍ରୀ ସ୍ଵର୍ଗତ ରାମବିଳାସ ପାଶୱାନଙ୍କୁ ଭାରତ ରତ୍ନ ପ୍ରଦାନ କରିବା ପାଇଁ ଏହି ବୈଠକରେ ଦାବି କରାଯାଇଥିଲା।
ମିଳିଥିବା ଖବର ଅନୁଯାୟୀ, ଚିରାଗଙ୍କୁ ଦଳର ଅଧିକାଂଶ ନେତା ସମର୍ଥନ କରୁଥିବାର ଏକ ଶକ୍ତି ପ୍ରଦର୍ଶନ କରିବା ଏହି ବୈଠକର ମୁଖ୍ୟ ଉଦ୍ଦେଶ୍ୟ ଥିଲା। ବୈଠକ ପୂର୍ବରୁ ଚିରାଗଙ୍କ ଘର ବାହାରେ ଅନେକ ପୋଷ୍ଟର ଏବଂ ବ୍ୟାନର ଲଗାଯାଇ, “ହଁ, ଆମେ ଚିରାଗ ପାଶୱାନଙ୍କ ସାଥିରେ ଅଛି” ବୋଲି ଲେଖାଯାଇଥିଲା।
କନ୍ଦର୍ପ ବେହେରା
ରେଢାଖୋଲ: ଆଜି ସକାଳେ ଚାରମାଳ ରାଶିବେଡା ଜଙ୍ଗଲରେ ଏକ ହରିଣକୁ କୁକୁର ପଲ ମାରିଦେଇଥିବା ବନ ବିଭାଗ ପ୍ରକାଶ କରିଛି।
ରେଢାଖୋଲ ବନଖଣ୍ଡ ଚାରମାଳ ବନାଂଚଳ ରାଶିବେଡା ଗ୍ରାମ ଜଙ୍ଗଲରୁ ଏକ ହରିଣକୁ କୁକୁରମାନେ ଆହତ କରିଥିବା ବେଳେ ତାକୁ ବନ ବିଭାଗ ଉଦ୍ଧାର କରିଛି। ବନ ବିଭାଗ ହରିଣର ଚିକିତ୍ସା କରୁଥିବା ବେଳେ ତାର ମୃତ୍ୟୁ ହୋଇଥିବା ସୂଚନା ମିଳିଛି। ହରିଣର ବୟସ ୩ ବର୍ଷ ହେବ ବୋଲି ବନ ବିଭାଗ ପ୍ରକାଶ କରିଛି। ମୃତ ହରିଣ ଗର୍ଭବତୀ ଥିବା ଶବ ବ୍ୟବଚ୍ଛେଦ ପରେ ଜଣା ପଡିଛି।
ଜଙ୍ଗଲୀଜୀବ ମାନେ ଗାଁ ମୁହାଁ ହେଉଥିବା ବେଳେ ଗାଁ କୁକୁର ହାବୁଡରେ ପଡି ମୃତ୍ୟୁବରଣ କରୁଥିବା ଜଣାପଡିଛି। ବନ ବିଭାଗ ମୃତ ହରିଣର ଶବକୁ ବ୍ୟବଚ୍ଛେଦ କରି ତାକୁ ପୋତି ଦେଇଥିବା ଚାରମାଳ ଫରେଷ୍ଟର ପ୍ରବୀଣ କୁମାର ପ୍ରଧାନ ପ୍ରକାଶ କରିଛନ୍ତି।
ପୁରୀ, ଜ୍ୟେଷ୍ଠ ଶୁକ୍ଳ ଦଶମୀ ତିଥିରେ ଶ୍ରୀମନ୍ଦିରରେ ମହାପ୍ରଭୁଙ୍କ ରାଜେନ୍ଦ୍ରାଭିଷେକ ନୀତି ଅନୁଷ୍ଠିତ ହୋଇଥାଏ। ଏହି ଦିନ ସନ୍ଧ୍ୟାଧୂପ ସରିବା ପରେ, ଶ୍ରୀ ମଦନମୋହନ ଆଜ୍ଞାମାଳ ପାଇ, ଭୋଗ ବାଟ ଗଣେଶଙ୍କ ପାଖରେ ପଡିଥିବା ଖଟୁଲି ଉପରେ ବିଜେ କରିଥାନ୍ତି। ଭିତର ଶୋଧ ହେବା ପରେ, ଜୟବିଜୟ ଦ୍ଵାର ବନ୍ଦ ହୋଇ ଜଗମୋହନ ଅନ୍ଧକାର କରାଯାଇଥାଏ ଏବଂ ପ୍ରଭୁଙ୍କୁ ଆଲଟ ଲାଗି ହୋଇଥାଏ।
ଏହା ପରେ ଜଣେ ସେବକ ଆସି ଶ୍ରୀ ମଦନମୋହନଙ୍କଠାରେ ରୁକ୍ମିଣୀଙ୍କ ବିବାହ ପ୍ରସ୍ତାବ ଜଣାଇଥାନ୍ତି। ଏହା ପରେ, ମହାପ୍ରଭୁ ରାଜେନ୍ଦ୍ରାଭିଷେକ ହେବା ନିମନ୍ତେ ବଟମୂଳ ସ୍ଥିତ ରଥରେ ବିଜେ କରିଥାନ୍ତି। ଏହା ପରେ ଘଣ୍ଟ ଓ କାହାଳୀ ବାଜି ମହାପ୍ରଭୁ ରଥରେ ବେଢା ପରିକ୍ରମା କରି ସାରି ବଟମୂଳଠାରେ ବିଜେ କରିଥାନ୍ତି ।
କୁତ କୌତୁକ ଋଷି ଭେଶରେ ଜଣେ ସେବକ ପାଳିଆ ସେବକଙ୍କଠାରୁ ଶୁକ୍ଳ ଫୁଲ ନେଇ ଆଞ୍ଜୁଳି କରି ରାସ୍ତା ଯାକ ଥରକୁ ଥର ଦଣ୍ଡ ପ୍ରଣାମ କରି ଦକ୍ଷିଣୀ ଘରକୁ ନେଇଥାନ୍ତି। ଏଠାରେ ଖଟ ଉପରେ ବିଜେ କରିବା ପରେ ପ୍ରଭୁଙ୍କ ପଞ୍ଚାମୃତ ମହାସ୍ନାନ ହୋଇ, ଫୁଲ ଚନ୍ଦନ ଲାଗି ବେଶ କରାଯାଇଥାଏ ଏବଂ ଶୀତଳ ଭୋଗ ମଣୋହି ହୋଇ, ଖିରି, ଅମାଲୁ ଭୋଗ ହୋଇ ବନ୍ଦାପନା ବଢ଼ିଥାଏ ।
ଏହି ନୀତି କାନ୍ତି ପରେ ପ୍ରଭୁ ଦକ୍ଷିଣୀ ଘରକୁ ବିଜେ କରିଥାନ୍ତି। ଅଭିଷେକ ସମୟରେ ଛତା ଟେକା ହୋଇ ଘଣ୍ଟ କାହାଳୀ ମହୁରୀ ବାଜୁ ଥାଏ ଏବଂ ଅଭିଷେକ ସରିବା ପରେ ଭିତରେ ପଣା ଭୋଗ ଓ ଅନ୍ୟାନ୍ୟ ନୀତି ହୋଇଥାଏ।
ପୁରୀ: ଶ୍ରୀମନ୍ଦିର ପ୍ରଶାସନ କାର୍ଯ୍ଯାଳୟରେ ଆଜି ଏକ ବୈଠକ ଅନୁଷ୍ଠିତ ହୋଇଯାଇଛି। ବିଭିନ୍ନ ନିଯୋଗ ଏବଂ ପୁରୀ ଜିଲ୍ଲାପାଳ ସମର୍ଥ ବର୍ମାଙ୍କ ମଧ୍ୟରେ ବୈଠକ ଅନୁଷ୍ଠିତ ହୋଇଯାଇଛି। ମହାପ୍ରଭୁଙ୍କ ସ୍ନାନଯାତ୍ରା ଏବଂ ବିଭିନ୍ନ ନୀତିକାନ୍ତି ସମୟରେ କରୋନା ସଂକ୍ରମଣକୁ ରୋକିବା ଦିଗରେ ଏକ ଆଲୋଚନା କରାଯାଇଛି। ଶ୍ରୀମନ୍ଦିରରେ କିଭଳି ଶ୍ରୁଙ୍ଖଳିତ ଭାବେ ନୀତି କରାଯିବ ତାହା ଉପରେ ଗୁରୁତ୍ଵ ଦିଆଯାଉଛି। ଜଳଲାଗି ଏବଂ ହାତିବେଶ ବେଳେ ଗହଳି ନକରିବାକୁ ଲୋକଙ୍କୁ ପରାମର୍ଶ ଦିଆଯାଇଛି। ଲୋକଙ୍କ ଘରେ ମହାପ୍ରସାଦ ପହଞ୍ଚାଇବା ପାଇଁ ବ୍ୟବସ୍ଥା କରାଯାଉଛି। ଏନେଇ ପୁରୀ ଜିଲ୍ଲାପାଳ ସମର୍ଥ ବର୍ମା ସୂଚନା ଦେଇଛନ୍ତି।