Tag: ମହାରାଷ୍ଟ୍ର

ନୂଆଦିଲ୍ଲୀ: ଆଜି ଅର୍ଥ ହେରଫେର ମାମଲାରେ ମହାରାଷ୍ଟ୍ରର ପୂର୍ବତନ ମନ୍ତ୍ରୀ ନବାବ ମଲିକଙ୍କୁ ସୁପ୍ରିମକୋର୍ଟ ଦୁଇମାସ ଜାମିନ ପ୍ରଦାନ କରିଛନ୍ତି। ତାଙ୍କ ସ୍ୱାସ୍ଥ୍ୟ ସମସ୍ୟାକୁ ଦୃଷ୍ଟିରେ ରଖି କୋର୍ଟ ମଲିକଙ୍କୁ ଏହି ଜାମିନ ଦେଇଛନ୍ତି।

ସୂଚନା ଅନୁଯାୟୀ, ରାଷ୍ଟ୍ରବାଦୀ କଂଗ୍ରେସ ପାର୍ଟି (ଏନସିପି) ନେତା ନବାବ ମଲିକଙ୍କୁ ଜାମିନ ପ୍ରଦାନକୁ ଇଡି ବିରୋଧ କରି ନାହିଁ। ଅର୍ଥ ହେରଫେର ମାମଲାରେ ମଲିକ ଫେବୃଆରୀ ୨୦୨୨ ରୁ ଜେଲରେ ଅଛନ୍ତି।

ନୂଆଦିଲ୍ଲୀ: କେନ୍ଦ୍ର ସ୍ୱରାଷ୍ଟ୍ର ଏବଂ ସମବାୟ ମନ୍ତ୍ରୀ ଅମିତ ଶାହା ମହାରାଷ୍ଟ୍ରର ପୁଣେ ଠାରେ କେନ୍ଦ୍ରୀୟ ସମବାୟ ସମିତି ନିବନ୍ଧକ (ସିଆରସିଏସ)ଙ୍କ ଡିଜିଟାଲ ପୋର୍ଟାଲର ଶୁଭାରମ୍ଭ କରିଛନ୍ତି। ଏହି ଅବସରରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ, କେନ୍ଦ୍ର ସମବାୟ ରାଷ୍ଟ୍ର ମନ୍ତ୍ରୀ ବି.ଏଲ ବର୍ମାଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।

କାର୍ଯ୍ୟକ୍ରମକୁ ସମ୍ବୋଧିତ କରି ଶ୍ରୀ ଶାହ କହିଥିଲେ, ମହାରାଷ୍ଟ୍ରରୁ ହିଁ ସମବାୟ ସଂସ୍କୃତି ସାରା ଦେଶରେ ବିସ୍ତାରିତ ହୋଇଥିଲା ଏବଂ ମହାରାଷ୍ଟ୍ରର ସମବାୟ ମଡେଲ ଦେଶରେ ସମବାୟ ଆନ୍ଦୋଳନକୁ ଆଗେଇ ନେଉଛି। ସେ କହିଥିଲେ, ଯଦି ଆମେ ଆଜି ସମବାୟ ଆନ୍ଦୋଳନର କ୍ରମ ବିକାଶକୁ ଦେଖିବା ତା’ହେଲେ ଏହା ଗୁଜରାଟ, ମହାରାଷ୍ଟ୍ର ଏବଂ କର୍ଣ୍ଣାଟକରେ ବିଶେଷ ଭାବେ ବିକଶିତ ହୋଇଥିବା ଦେଖିବାକୁ ମିଳିବ । ପୂର୍ବରୁ ଏହି କ୍ଷେତ୍ର ବମ୍ବେ ରାଜ୍ୟ ଅଧୀନରେ ଥିଲା। ତେଣୁ  କେନ୍ଦ୍ରୀୟ ସମବାୟ ସମିତି ନିବନ୍ଧକ (ସିଆରସିଏସ)ଙ୍କ ଡିଜିଟାଲ ପୋର୍ଟାଲର ଶୁଭାରମ୍ଭ କାର୍ଯ୍ୟ ମହାରାଷ୍ଟ୍ରରୁ ଆରମ୍ଭ କରାଯିବାର ବିଶେଷ ପ୍ରାସଙ୍ଗିକତା ରହିଛି । ଶ୍ରୀ ଶାହା କହିଥିଲେ, ବିଭିନ୍ନ ବହୁମୁଖ ସମବାୟ ସମିତିକୁ ପରିଚାଳନା କରୁଥିବା କେନ୍ଦ୍ରୀୟ ନିବନ୍ଧକ (ସିଆରସିଏସ)ଙ୍କ କାର୍ଯ୍ୟ ଆଜି ଠାରୁ ସମ୍ପୂର୍ଣ୍ଣ ଡିଜିଟାଲ ହେଲା । ନୂଆ ଶାଖା ଖୋଲିବା, ଅନ୍ୟ ରାଜ୍ୟକୁ ସମ୍ପ୍ରସାରଣ କିମ୍ବା ଅଡିଟିଂ ଭଳି ସମବାୟ ସମିତିଗୁଡ଼ିକର ସବୁ କାର୍ଯ୍ୟ ଏବେ ଅନଲାଇନରେ ହେବ ।

କେନ୍ଦ୍ର ସମବାୟ ମନ୍ତ୍ରୀ କହିଥିଲେ, ଅନେକ ଚିନ୍ତା କରିବା ପରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ‘‘ସହକାର ସେ ସମୃଦ୍ଧି’’ ବିଚାର ଉପସ୍ଥାପନ କରିଥିଲେ । ଗତ ୯ ବର୍ଷ ମଧ୍ୟରେ ପ୍ରଧାନମନ୍ତ୍ରୀ ମୋଦୀ ଦେଶର କୋଟି କୋଟି ଗରିବ ଲୋକଙ୍କୁ ମୌଳିକ ସୁବିଧା ଯୋଗାଇ ଦେବା ଦିଗରେ କାର୍ଯ୍ୟ କରିଛନ୍ତି । ପ୍ରଧାନମନ୍ତ୍ରୀ ମୋଦୀ ଦେଶର ଗରିବ ଓ ବଞ୍ଚିତ ମାନଙ୍କୁ ଆବାସ, ବିଦ୍ୟୁତ ସଂଯୋଗ, ଶୁଦ୍ଧ ପାନୀୟ ଜଳ, ଗ୍ୟାସ ସିଲିଣ୍ଡର, ଶୌଚାଳୟ, ୫ ଲକ୍ଷ ଟଙ୍କା ପର୍ଯ୍ୟନ୍ତ ସ୍ୱାସ୍ଥ୍ୟ ବୀମା, ମୁଣ୍ଡ ପିଛା ମାସିକ ୫ କିଲୋଗ୍ରାମ ଲେଖାଏଁ ଖାଦ୍ୟଶସ୍ୟ ମାଗଣାରେ ଯୋଗାଇ ଦେଉଛନ୍ତି । ଦେଶର କୋଟି କୋଟି ଲୋକ ପୂର୍ବରୁ ବ୍ୟାଙ୍କ ସେବାରୁ ବଞ୍ଚିତ ଥିଲେ । ପ୍ରଧାନମନ୍ତ୍ରୀ ମୋଦୀ ସେମାନଙ୍କ ପାଇଁ ବ୍ୟାଙ୍କ ଏକାଉଣ୍ଟ ଖୋଲିବା ଜରିଆରେ ଗରିବ ଲୋକଙ୍କୁ ଦେଶର ଅର୍ଥବ୍ୟବସ୍ଥା ସହ ଯୋଡ଼ିପାରିଛନ୍ତି । ସେ କହିଥିଲେ, ଯଦି ଦେଶର ଗରିବ ଲୋକଙ୍କ ପାଖରେ ଏକ ଉଦ୍ୟୋଗ ଆରମ୍ଭ କରିବା ଲାଗି ପୁଞ୍ଜିର ଅଭାବ ରହିଛି ତା’ହେଲେ ସମବାୟ ଆନ୍ଦୋଳନ ହିଁ ଏକମାତ୍ର ମାର୍ଗ ଯାହା ଜରିଆରେ ଅନେକ ଲୋକ ଅଳ୍ପ ପୁଞ୍ଜି ସହିତ ଏକତ୍ରିତ ହୋଇ ଏକ ବଡ଼ ଉଦ୍ୟୋଗ ପ୍ରତିଷ୍ଠା କରିପାରିବେ।

ଶ୍ରୀ ଶାହା କହିଥିଲେ ଯେ, ‘‘ସହକାରସେ ସମୃଦ୍ଧି’’ର ଅର୍ଥ ହେଉଛି ଗରିବ ଲୋକଙ୍କ ଜୀବନରେ ସୁଧାର ଆଣିବା, ସେମାନଙ୍କୁ ଦେଶର ଆର୍ଥିକ ବିକାଶ ଯୋଗଦାନ ଦେବା ପାଇଁ ମଞ୍ଚ ଯୋଗାଇ ଦେବା ଏବଂ ସମବାୟ ଜରିଆରେ ସେମାନଙ୍କ ଜୀବନଧାରଣ ମାନରେ ସୁଧାର ଆଣିବା । ଏହି ଉଦ୍ଦେଶ୍ୟ ନେଇ ଶ୍ରୀ ମୋଦୀ ସମବାୟ ମନ୍ତ୍ରଣାଳୟ ଗଠନ କରିଥିବା ସେ କହିଥିଲେ । ଶ୍ରୀ ଶାହା କହିଥିଲେ, ଆଜି ଶୁଭାରମ୍ଭ କରାଯାଇଥିବା ପୋର୍ଟାଲ ଦ୍ୱାରା ଦେଶର ୧୫୫୫ ବହୁମୁଖୀ ସମବାୟ ସମିତି ଲାଭବାନ ହେବେ ଏବଂ ଏସବୁ ୧୫୫୫ ସମବାୟ ସମିତି ମଧ୍ୟରୁ କେବଳ ୪୨% ମହାରାଷ୍ଟ୍ରରେ ଅଛନ୍ତି । ଏହା ମହାରାଷ୍ଟ୍ରରେ ସମବାୟ ଆନ୍ଦୋଳନର ସାମର୍ଥ୍ୟକୁ ଦର୍ଶାଉଛି। ଅନୁରୂପ ଭାବେ ମୋଦୀ ସରକାର ସବୁ ରାଜ୍ୟର ସମବାୟ ସମିତି ନିବନ୍ଧକଙ୍କ କାର୍ଯ୍ୟାଳୟଗୁଡ଼ିକୁ କମ୍ପ୍ୟୁଟରୀକରଣ କରିବାକୁ ଯାଉଛନ୍ତି ଯାହାକି ଦେଶବ୍ୟାପୀ ରହିଥିବା ୮ ଲକ୍ଷ ସମବାୟ  ସମିତିଗୁଡ଼ିକର ଯୋଗାଯୋଗକୁ ସହଜ କରିବ ବୋଲି ସେ କହିଥିଲେ ।

କେନ୍ଦ୍ର ସ୍ୱରାଷ୍ଟ୍ର ଓ ସମବାୟ ମନ୍ତ୍ରୀ କହିଥିଲେ, ଆଧୁନିକତା, ପାରଦର୍ଶିତା ଓ ଉତ୍ତରଦାୟିତ୍ୱ ବିନା ଦେଶରେ ସମବାୟ ଆନ୍ଦୋଳନ ଆଗକୁ ବଢ଼ିପାରିବ ନାହିଁ । ସେ କହିଥିଲେ ଯେ, ଅଧିକ ସମବାୟ ପ୍ରତି ଗ୍ରହଣୀୟତା ବଢ଼ାଇବାକୁ  ହେଲେ ଉତ୍ତରଦାୟିତ୍ୱ ନିର୍ଦ୍ଧାରଣ କରିବାକୁ ହେବ ଏବଂ ପାରଦର୍ଶିତା ଆଣିବାକୁ ହେବ । ଅମୁଲ, ଇଫକୋ ଏବଂ କ୍ରିଭକୋ ଭଳି ସମବାୟର ଅନେକ ସଫଳ କାହାଣୀ ଭାରତ ସାରା ଦୁନିଆକୁ ଦେଖାଇଛି । ବର୍ତ୍ତମାନ ଏସବୁକୁ ଆଗେଇ ନେଇ ଆମକୁ ସମବାୟ ଆନ୍ଦୋଳନକୁ ଏକ ନୂଆ ଗତି ଦେବାକୁ ହେବ ।

ଶ୍ରୀ ଶାହା କହିଥିଲେ ଯେ ନିକଟରେ ବହୁମୁଖୀ ସମବାୟ ସମିତି ଆଇନରେ ସଂଶୋଧନ ଅଣାଯାଇଛି । ଏହି ଆଇନ ଅଧୀନରେ ଆମେ ନିର୍ବାଚନୀ ସଂସ୍କାର କାର୍ଯ୍ୟକାରୀ କରିଛୁ, ସମବାୟ ପ୍ରଶାସନ ପାଇଁ ନୂଆ ନିୟମ ନିର୍ଦ୍ଧାରଣ କରିଛୁ, ଆର୍ଥିକ ଶୃଙ୍ଖଳା ଓ ପାଣ୍ଠି ପାଇଁ ବ୍ୟବସ୍ଥା କରିଛୁ, ବ୍ୟବସାୟିକ ସୁଗମତା ପାଇଁ ବ୍ୟବସ୍ଥା କରିଛୁ, ନିର୍ବାଚନ ଆୟୋଗଙ୍କ ଭଳି ଏକ ନିରପେକ୍ଷ ସଂସ୍ଥା ସମବାୟ ନିର୍ବାଚନ ପାଇଁ କାର୍ଯ୍ୟ କରିବ, ପରିଷଦ ପରିଚାଳନା ପାଇଁ ନିୟମିରେ ପରିବର୍ତ୍ତନ କରାଯାଇଛି, ପାରଦର୍ଶିତା ଆଣିବା ଲାଗି ପରିଷଦ ନିର୍ଦ୍ଦେଶକ ଓ କର୍ମଚାରୀଙ୍କ ମଧ୍ୟରେ ଉତ୍ତରଦାୟିତ୍ୱ ନିର୍ଦ୍ଧାରଣ କରାଯାଇଛି । ବହୁମୁଖୀ ସମବାୟ ସମିତି ଆଇନ, ୨୦୨୨ ସମବାୟ ସମିତିଗୁଡ଼ିକର ଉତ୍ତରଦାୟିତ୍ୱ ନିର୍ଦ୍ଧାରଣ କରିବା ସହିତ ପ୍ରିୟାପ୍ରୀତି ତୋଷଣକୁ ସମାପ୍ତ କରିବ ଯାହାଫଳରେ ଯୁବ ପ୍ରତିଭା ସମବାୟ ଆନ୍ଦୋଳନରେ ସାମିଲ ହୋଇପାରିବେ ।

କେନ୍ଦ୍ର ମନ୍ତ୍ରୀ ଶ୍ରୀ ଶାହା କହିଥିଲେ ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱ ଏବଂ ନିରନ୍ତର ମାର୍ଗଦର୍ଶନ ଫଳରେ ପ୍ରାଥମିକ କୃଷି ସମବାୟ ସମିତିଗୁଡ଼ିକୁ ଅଧିକ ବ୍ୟବହାର୍ଯ୍ୟ କରିବା ଲାଗି ଅନେକ କାର୍ଯ୍ୟ କରାଯାଉଛି । ଆସନ୍ତା ୫ ବର୍ଷ ମଧ୍ୟରେ ଦେଶରେ ୩ ଲକ୍ଷ ନୂଆ ପ୍ରାଥମିକ କୃଷି ସମବାୟ ସମିତି ପ୍ରତିଷ୍ଠା କରି ମୋଦୀ ସରକାର ସମବାୟ ଆନ୍ଦୋଳନକୁ ପ୍ରତ୍ୟେକ ଗ୍ରାମରେ ପହଞ୍ଚାଇବାକୁ ନିଷ୍ପତ୍ତି ନେଇଛନ୍ତି । ଗତ ୭୦ ବର୍ଷ ମଧ୍ୟରେ ଦେଶରେ ୯୩ ହଜାର ପ୍ରାଥମିକ କୃଷି ସମବାୟ ସମିତି ନିର୍ମାଣ ହୋଇଥିବା ବେଳେ ଆସନ୍ତା ୫ ବର୍ଷ ମଧ୍ୟରେ ୩ ଲକ୍ଷ ନୂଆ ପ୍ରାଥମିକ କୃଷି ସମବାୟ ସମିତି ନିର୍ମାଣ କରାଯିବ । ମୋଦୀ ସରକାରଙ୍କ ଦ୍ୱାରା ଦେଶର ସବୁ ପ୍ରାଥମିକ କୃଷି ସମବାୟ ସମିତିର କମ୍ପ୍ୟୁଟରୀକରଣ କାମ ଶେଷ କରାଯାଇଛି ବୋଲି ଶ୍ରୀ ଶାହା କହିଥିଲେ। ପ୍ରାଥମିକ କୃଷି ସମବାୟ ସମିତିଗୁଡ଼ିକ ଏବେ ଜନ ସେବା କେନ୍ଦ୍ର (ସିଏସସି) ଭାବେ ପରିଣତ ହୋଇ ବିଭିନ୍ନ ପ୍ରକାର କାର୍ଯ୍ୟ କରିପାରିବେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ କେନ୍ଦ୍ର କ୍ୟାବିନେଟ ବିଶ୍ୱର ସର୍ବବୃହତ ଓ ବହୁମୁଖୀ ଭଣ୍ଡାରଣ ଯୋଜନାକୁ ମଞ୍ଜୁର କରିଛନ୍ତି । ବର୍ତ୍ତମାନ ଜିଇଏମ ପ୍ଲାଟଫର୍ମର ଲାଭ ମଧ୍ୟ ସମବାୟ ସଂସ୍ଥାଗୁଡ଼ିକୁ ମିଳୁଛି ।

ବର୍ତ୍ତମାନ ସୁଦ୍ଧା ୯୫% ଜାତୀୟ ସମବାୟ ଡେଟାବେସ ତିଆରି କାମ ଶେଷ ହୋଇଛି । ଆମେ ଏକ ନୂଆ ସମବାୟ ନୀତି ଆଣିବାକୁ ଯାଉଛୁ । ଆମେ ଏକ ସମବାୟ ବିଶ୍ୱବିଦ୍ୟାଳୟ ପ୍ରତିଷ୍ଠା କରିବାକୁ ଯାଉଛୁ ଯାହା ମାଧ୍ୟମରେ ସମବାୟର ବୈଷୟିକ ଶିକ୍ଷା ଏବଂ ଏହାର ସମସ୍ତ ବିଭାଗକୁ ଯୋଡ଼ାଯାଇପାରିବ । ସେ କହିଥିଲେ ଯେ ଶ୍ରୀ ମୋଦୀ ୩ଟି ନୂଆ ବହମୁଖି ସମବାୟ ସମିତି ଗଠନ କରିଛନ୍ତି । ଗୋଟିଏ ସମିତି ବହୁମୁଖି ଜୈବିକ ଉତ୍ପାଦ ବିକ୍ରି ପାଇଁ ପ୍ରତିଷ୍ଠା କରାଯାଇଛି ଯାହାକି ‘ଭାରତବ୍ରାଣ୍ଡ’ ନାମରେ ପ୍ରାକୃତିକ କୃଷି ଉତ୍ପାଦ ବିକ୍ରି କରୁଛି । ଏହାର ସମ୍ପୂର୍ଣ୍ଣ ଲାଭ ଚାଷୀଙ୍କ ଏକାଉଣ୍ଟକୁ ଯାଉଛି । ଏହି ୩ଟି ନୂଆ ବହମୁଖି ସମବାୟ ସମିତି ଦ୍ୱାରା ଦେଶର ୧୦ କୋଟି ଚାଷୀ ଲାଭବାନ ହେଉଛନ୍ତି ଏବଂ ଏଗୁଡ଼ିକ ଆଗାମୀ ଦିନରେ କୋଟି ଚାଷୀଙ୍କ ସମୃଦ୍ଧି ନିମନ୍ତେ ମାର୍ଗ ପ୍ରଶସ୍ତ କରିବ ।

କେନ୍ଦ୍ର ମନ୍ତ୍ରୀ ଶ୍ରୀ ଶାହା କହିଥିଲେ, ପୂର୍ବରୁ ସମବାୟ ସଂସ୍ଥାଗୁଡ଼ିକ ପ୍ରତି ବୈମାତୃକ ମନୋଭାବ ପୋଷଣ କରାଯାଉଥିଲା କିନ୍ତୁ ଏବେ ସମବାୟ ସଂସ୍ଥାଗୁଡ଼ିକୁ କର୍ପୋରେଟ୍‌ ସଂସ୍ଥା ଭଳି ସୁବିଧାସୁଯୋଗ ମିଳିପାରୁଛି । ଆୟକରରେ ରହିଥିବା ଦୋହରା ଟିକସ ବ୍ୟବସ୍ଥାକୁ ମଧ୍ୟ ଉଚ୍ଛେଦ କରାଯାଇଛି । ଅନେକ ବର୍ଷ ଧରି ପଡ଼ିରହିଥିବା ଚିନି କଳଗୁଡ଼ିକର ବିଭିନ୍ନ ସମସ୍ୟାକୁ ମୋଦୀ ସରକାର ସମାଧାନ କରିଛନ୍ତି ।  ଚାଷୀଙ୍କ ଲାଭ ଉପରେ ସରକାର ଟିକସ ଲାଗୁ କରି ପାରିବେ ନାହିଁ, ସମବାୟ କ୍ଷେତ୍ର ପାଇଁ ସରକାର ଏହି ନୀତି ଆପଣାଇଛନ୍ତି । ଅର୍ଥ ମନ୍ତ୍ରଣାଳୟ ଏହି ନିଷ୍ପତ୍ତିକୁ ଗ୍ରହଣ କରିବା ସମବାୟ କ୍ଷେତ୍ର ପାଇଁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ପୂର୍ବରୁ କେବର ସହରାଞ୍ଚଳ ସମବାୟ ବ୍ୟାଙ୍କକୁ ଗୃହ ଋଣ ପ୍ରଦାନ କରିବାର କ୍ଷମତା ଥିଲା ଏବେ ଗ୍ରାମୀଣ ସମବାୟ ବ୍ୟାଙ୍କଗୁଡ଼ିକୁ ଏ ସୁବିଧା ମିଳିଛି । ଏବେ ସହରାଞ୍ଚଳ ସମବାୟ ବ୍ୟାଙ୍କକୁ ଭ୍ରାମ୍ୟମାଣ ବ୍ୟାଙ୍କ ସେବା ଯୋଗାଇ ଦେବାର ଅନୁମତି ମିଳିଛି । ସରକାରୀ ବ୍ୟାଙ୍କ ଭଳି ସହରାଞ୍ଚଳ ସମବାୟ ବ୍ୟାଙ୍କକୁ ମଧ୍ୟ ନୂଆ ଶାଖା ଖୋଲିବା ଲାଗି ଅନୁମତି ପ୍ରଦାନ କରାଯିବା ସହିତ ଏକକାଳୀନ ସେଟଲମେଣ୍ଟ ଅଧିକାର ଦିଆଯାଇଛି ।

ଶ୍ରୀ ଅମିତ ଶାହ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଭାରତକୁ ୫ ଟ୍ରିଲିୟନ ଡଲାର ଅର୍ଥବ୍ୟବସ୍ଥା ଏବଂ ବିଶ୍ୱର ତୃତୀୟ ବୃହତ ଅର୍ଥବ୍ୟବସ୍ଥା ରୂପରେ ପରିଣତ କରିବାକୁ ଲକ୍ଷ୍ୟ ରଖିଛନ୍ତି । ସମବାୟ କ୍ଷେତ୍ର ଏ ଦିଗରେ ଯୋଗଦାନ ସେବା ପାଇଁ ଲକ୍ଷ୍ୟ ନିର୍ଦ୍ଧାରଣ କରିବା ଉଚିତ୍‌ । ଶ୍ରୀ ମୋଦୀଙ୍କର ‘‘ସହକାର୍‌ ସେ ସମୃଦ୍ଧି’’ ସଂକଳ୍ପକୁ ସାକାର କରିବା ଦିଗରେ, ସମବାୟ ମନ୍ତ୍ରଣାଳୟ ଏହି ଡିଜିଟାଲ ପୋର୍ଟାଲ ଶୁଭାରମ୍ଭ ସହିତ ଏକ ନୂଆ ଯାତ୍ରା ଆରମ୍ଭ କରିଥିବା ସେ କହିଥିଲେ ।

ନୂଆଦିଲ୍ଲୀ: ମହାରାଷ୍ଟ୍ରର ଶାହପୁରରେ ଘଟିଥିବା ଦୁଃଖଦ ଦୁର୍ଘଟଣାରେ ଜୀବନ ହାନି ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୋକବ୍ୟକ୍ତ କରିଛନ୍ତି।

ପ୍ରଧାନମନ୍ତ୍ରୀ ପିଏମଏନଆରଏଫରୁ ପ୍ରତି ମୃତକଙ୍କ ପରିବାରକୁ ୨ ଲକ୍ଷ ଟଙ୍କାର ଅନୁକମ୍ପାମୂଳକ ରାଶି ଏବଂ ଆହତଙ୍କ ପାଇଁ ୫୦ ହଜାର ଟଙ୍କା ଲେଖାଏ ସହାୟତା ପ୍ରଦାନ ନିମନ୍ତେ ଘୋଷଣା କରିଛନ୍ତି।

ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଟୁଇଟ୍ କରି କୁହାଯାଇଛି ଯେ, ‘ମହାରାଷ୍ଟ୍ରର ଶାହପୁରରେ ଘଟିଥିବା ଦୁଃଖଦ ଦୁର୍ଘଟଣାରେ ମର୍ମାହତ। ପ୍ରାଣ ହରାଇଥିବା ବ୍ୟକ୍ତିଙ୍କ ପରିବାରକୁ ମୋର ସମବେଦନା। ଆହତ ଶୀଘ୍ର ସୁସ୍ଥତା ପାଇଁ ପ୍ରାର୍ଥନା କରୁଛୁ। ଏନଡିଆରଏଫ୍ ଏବଂ ସ୍ଥାନୀୟ ପ୍ରଶାସନ ଦୁର୍ଘଟଣାସ୍ଥଳରେ କାର୍ଯ୍ୟ କରୁଛନ୍ତି ଏବଂ ପୀଡ଼ିତଙ୍କୁ ସମସ୍ତ ସହାୟତା ନିଶ୍ଚିତ କରିବା ଦିଗରେ ସବୁ ପ୍ରକାର ପଦକ୍ଷେପ ନିଆଯାଉଛି।’

ମୁମ୍ବାଇ: ସେତୁ ନିର୍ମାଣ ସମୟରେ ମହାରାଷ୍ଟ୍ରର ଥାନେରେ ଏକ ବଡ ଦୁର୍ଘଟଣା ହୋଇଛି। କ୍ରେନ୍ ଏବଂ ସ୍ଲାବ ପଡି ୧୭ ଜଣଙ୍କର ମୃତ୍ୟୁ ଘଟିଛି। ଏକ ଦୁର୍ଭାଗ୍ୟଜନକ ଦୁର୍ଘଟଣାରେ ଥାନାର ଶାହାପୁର ନିକଟରେ ଏକ ଗର୍ଡର ଲଞ୍ଚିଂ ମେସିନ୍ ଖସିଯିବା ପରେ ଅତି କମରେ ୧୭ ଜଣଙ୍କର ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଛନ୍ତି। ସୂଚନା ଅନୁଯାୟୀ, ସମୃଦ୍ଧି ଏକ୍ସପ୍ରେସ ରାଜପଥର ତୃତୀୟ ପର୍ଯ୍ୟାୟ ନିର୍ମାଣରେ ଏହି ମେସିନ୍ ବ୍ୟବହାର କରାଯାଉଥିଲା। ଏହି ଦୁର୍ଘଟଣାରେ ୪ ଜଣଙ୍କ ଆଘାତ ସମ୍ପର୍କରେ ମଧ୍ୟ ସୂଚନା ରହିଛି। ଅନେକ ଲୋକ ଏବେବି ପୋତି ହୋଇ ରହିଥିବା ଆଶଙ୍କା ରହିଛି। ଘଟଣାସ୍ଥଳରେ ଏନଡିଆରଏଫ ଟିମ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛି।

ସୂଚନା ପ୍ରଦାନ କରି ଏନଡିଆରଏଫ କହିଛି ଯେ, ସୁରକ୍ଷା ବ୍ୟବସ୍ଥା ଅଭାବରୁ ଏଠାରେ ଶ୍ରମିକମାନେ ପ୍ରାଣ ହରାଇଛନ୍ତି। ବର୍ତ୍ତମାନ ପର୍ଯ୍ୟନ୍ତ ପନ୍ଦରଟି ମୃତଦେହ ଶାହପୁର ଉପଜିଲ୍ଲା ଡାକ୍ତରଖାନାକୁ ଅଣାଯାଇଛି। ୩ ରୁ ୪ ଜଣ ଜଣ ଆହତ ହୋଇଛନ୍ତି। ମୃତକମାନଙ୍କ ବ୍ୟତୀତ ଅନେକ ଲୋକ ଆବର୍ଜନା ତଳେ ଫସିଥିବାର ଆଶଙ୍କା ରହିଛି। ଗର୍ଡର୍ ମେସିନ୍ କୁ ସଂଯୋଗ କରୁଥିବା କ୍ରେନ୍ ଏବଂ ସ୍ଲାବ୍ ୧୦୦ ଫୁଟ ଉଚ୍ଚତାରୁ ଖସିଯିବାରୁ ବଡ଼ ଦୁର୍ଘଟଣା ଘଟିଛି। ମୃତକଙ୍କ ମୃତଦେହ ସହିତ ଆହତମାନଙ୍କୁ ସ୍ଥାନୀୟ ଡାକ୍ତରଖାନାକୁ ନିଆଯାଇଛି।

ମୁମ୍ବାଇ: ମହାରାଷ୍ଟ୍ରର ବୁଲଢାନାରେ ଏକ ବଡ଼ ସଡ଼କ ଦୁର୍ଘଟଣା ଘଟିଛି। ଏହି ଦୁର୍ଘଟଣାରେ ଦୁଇଟି ବସ୍ ମଧ୍ୟରେ ମୁହାଁମୁହିଁ ଧକ୍କା ହୋଇଛି। ଏହି ଦୁର୍ଘଟଣାରେ ଏପର୍ଯ୍ୟନ୍ତ ୬ ଜଣଙ୍କର ମୃତ୍ୟୁ ହୋଇଥିବାବେଳେ ୨୦ ଜଣ ଗୁରୁତର ଆହତ ହୋଇଛନ୍ତି। ପୋଲିସର ସୂଚନାନୁସାରେ, ରାତି ପ୍ରାୟ ୨.୩୦ ସମୟରେ ମଲକାପୁରର ନାନ୍ଦୁର ନାକା ଫ୍ଲାଏ ଓଭର ନିକଟରେ ଏହି ଦୁର୍ଘଟଣା ଘଟିଛି। ଆହତମାନଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି ଯେଉଁଠାରେ ସେମାନେ ବର୍ତ୍ତମାନ ଚିକିତ୍ସିତ ହେଉଛନ୍ତି। ମୃତକଙ୍କ ସମ୍ପର୍କୀୟଙ୍କୁ ଏହି ଘଟଣା ସମ୍ପର୍କରେ ଅବଗତ କରାଯାଇଛି।

ମୁମ୍ବାଇ: ମହାରାଷ୍ଟ୍ରରେ ଅଜିତ ପାୱାରଙ୍କ ବିଦ୍ରୋହ ପରେ ବର୍ତ୍ତମାନ ବିଧାୟକଙ୍କ ପକ୍ଷ ବଦଳିବା ଖେଳ ଆରମ୍ଭ ହୋଇଛି। ଶରଦ ପାୱାର କ୍ୟାମ୍ପ ଏହାର ବିଦ୍ରୋହୀ ବିଧାୟକଙ୍କ ସହ ନିରନ୍ତର ଯୋଗାଯୋଗରେ ଅଛନ୍ତି ଏବଂ ସେମାନଙ୍କୁ ଶାନ୍ତ କରିବାକୁ ଉଦ୍ୟମ ଚାଲିଥିବାବେଳେ ଅଜିତ ପାୱାର ମଧ୍ୟ ଅବଶିଷ୍ଟ ବିଧାୟକମାନଙ୍କୁ କ୍ଷମତାକୁ ଆସିବାକୁ ଆମନ୍ତ୍ରଣ କରୁଛନ୍ତି। ତଥାପି, ଛୋଟ ପାୱାରଙ୍କ ହାତରେ ଅଧିକ ଶକ୍ତି ଦୃଶ୍ୟମାନ ହେଉଛି। ଏହି ସମୟରେ, ଶରଦ ପାୱାର କ୍ୟାମ୍ପର ଅନ୍ୟ ଜଣେ ବିଧାୟକ ପକ୍ଷ ପରିବର୍ତ୍ତନ କରିବାକୁ ସୂଚାଇ ଦେଇଛନ୍ତି। ବିଧାୟକ ରାଜେନ୍ଦ୍ର ଶିଙ୍ଗନେ କହିଛନ୍ତି ଯେ, ଯଦି ଅଜିତ ପାୱାର ବୁଲଢାଣା ଜିଲ୍ଲା ବ୍ୟାଙ୍କକୁ ସାହାଯ୍ୟ କରନ୍ତି, ତେବେ ମୁଁ ତାଙ୍କୁ ସମର୍ଥନ କରିପାରିବି।

ଶିଙ୍ଗନେଙ୍କ ବ୍ୟତୀତ ମକରନ୍ଦ ପାଟିଲ ମଧ୍ୟ ଜୁଲାଇ ୫ ତାରିଖରେ ଅନୁଷ୍ଠିତ ବୈଠକରେ ଶରଦ ପାୱାରଙ୍କ ସାଥିରେ ଥିଲେ, ସେ ଏବେ ଅଜିତ ପାୱାରଙ୍କ ସହ ଅଛନ୍ତି ବୋଲି ଘୋଷଣା କରିଛନ୍ତି। ଅର୍ଥାତ୍ ପୁତୁରା ଅଜିତ ପାୱାର କ୍ରମାଗତ ଭାବରେ ଦାଦାଙ୍କ ପରିବାରରେ ଫାଟ ସୃଷ୍ଟି କରୁଛନ୍ତି। ଏମାନଙ୍କ ବ୍ୟତୀତ ଏନସିପି ନେତା କିରଣ ଲାହମେଟେ ମଧ୍ୟ ଶରଦ ପାୱାରଙ୍କ ସଭାରେ ହାଜର ହୋଇଥିଲେ, କିନ୍ତୁ ସେ ମଧ୍ୟ ଅଜିତ ପାୱାରଙ୍କୁ ଭେଟିଛନ୍ତି। ଯାହା ପରେ ବିଶ୍ୱାସ କରାଯାଏ ଯେ ଅଜିତ ପାୱାର ଏହି ଡିଲକୁ ନଷ୍ଟ କରିଛନ୍ତି ଏବଂ ସେ ମଧ୍ୟ ଏହି ବିଧାୟକମାନଙ୍କୁ ନିଜ ପକ୍ଷକୁ ଟାଣି ଆଣିବେ।

ସେହିଭଳି ସମସ୍ତ ବିଧାୟକଙ୍କୁ ମନାଇବା ଏବଂ ସେମାନଙ୍କୁ ନିଜ ଆଡକୁ ଟାଣିବା ପାଇଁ ସମସ୍ତ ପ୍ରୟାସ କରାଯାଉଛି। ନାଶିକର ଦେବଲାଲିର ବିଧାୟକ ସରୋଜ ଅହିରେ ଏବେ ବି ଡାକ୍ତରଖାନାରେ ଅଛନ୍ତି, କିନ୍ତୁ ଏପର୍ଯ୍ୟନ୍ତ ସେ ନିଜ ଆଭିମୁଖ୍ୟ ସ୍ପଷ୍ଟ କରି ନାହାଁନ୍ତି। ସୁପ୍ରିୟା ସୁଲେ ତାଙ୍କୁ ଭେଟିଥିବାବେଳେ ଛଗନ ଭୁଜବଲ ମଧ୍ୟ ତାଙ୍କ ଅବସ୍ଥା ବିଷୟରେ ଜାଣିବା ପାଇଁ ପହଞ୍ଚିଥିଲେ।

ସେପଟେ ରାଷ୍ଟ୍ରବାଦୀ କଂଗ୍ରେସ ପାର୍ଟି (ଏନସିପି) ମୁଖ୍ୟ ଶରଦ ପାୱାର ବିଧାୟକଙ୍କ ପକ୍ଷ ବଦଳାଇବାକୁ ନେଇ ସିଧାସଳଖ ପ୍ରଧାନମନ୍ତ୍ରୀ ମୋଦୀଙ୍କୁ ଟାର୍ଗେଟ କରିଛନ୍ତି ଏବଂ ଏନସିପି ନେତାଙ୍କ ‘ଦୁର୍ନୀତି’ ସମ୍ପର୍କରେ ପ୍ରଧାନମନ୍ତ୍ରୀଙ୍କୁ ମନେ ପକାଇ ଦେଇଛନ୍ତି। ନାଶିକ୍ ଜିଲ୍ଲାର ୟେବଲା ଠାରେ ଏକ ରାଲିକୁ ସମ୍ବୋଧିତ କରି ପାୱାର କହିଛନ୍ତି ଜେ, “ପ୍ରଧାନମନ୍ତ୍ରୀ ମୋଦୀଙ୍କର ସମସ୍ତ ସରକାରୀ ଯନ୍ତ୍ରପାତି ଅଛି। ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରି ଦଣ୍ଡିତ କରିବା ଉଚିତ୍ ବୋଲି ସେ ଦାବି କରିଛନ୍ତି।”

ମୁମ୍ବାଇ: ମହାରାଷ୍ଟ୍ରର ଧୁଲେରେ ଏକ ବଡ଼ ଦୁର୍ଘଟଣାର ଖବର ଆସିଛି। ମିଳିଥିବା ସୂଚନା ଅନୁଯାୟୀ, ମୁମ୍ବାଇ-ଆଗ୍ରା ରାଜପଥରେ ବ୍ରେକ୍ ଫେଲ ହେତୁ ଏକ ଟ୍ରକ୍ ଢାବା ଭିତରକୁ ପସିଯାଇଥିଲା। ଆଜି ସକାଳେ ଘଟିଥିବା ଏହି ଦୁର୍ଘଟଣାରେ ଅତି କମରେ ୯ ଜଣଙ୍କର ମୃତ୍ୟୁ ହୋଇଥିବାବେଳେ ୨୦ ରୁ ଅଧିକ ଲୋକ ଆହତ ହୋଇଥିବା କୁହାଯାଉଛି। ସମସ୍ତ ଆହତଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି। ପୋଲିସର ସୂଚନାନୁସାରେ ମୃତ୍ୟୁ ସଂଖ୍ୟା ବଢିପାରେ।

ନୂଆଦିଲ୍ଲୀ: ରାଜ୍ୟସଭା ସଦସ୍ୟ କପିଲ ସିବଲ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ବରିଷ୍ଠ ବରିଷ୍ଠ କଂଗ୍ରେସ ନେତା ସମାଲୋଚନା କରିଛନ୍ତି। ରାଷ୍ଟ୍ରବାଦୀ କଂଗ୍ରେସ ପାର୍ଟି (ଏନସିପି) ନେତା ଅଜିତ ପାୱାର ମହାରାଷ୍ଟ୍ର ସରକାରରେ ଯୋଗଦେବାକୁ ନେଇ ସେ କଟାକ୍ଷ କରି କହିଛନ୍ତି ଯେ, ବୋଧହୁଏ ଏହି ‘ଗଣତନ୍ତ୍ରର ଜନନୀ’ ସେ (ମୋଦୀ) ଆମେରିକା ସଂସଦରେ ଉଲ୍ଲେଖ କରିଛନ୍ତି।

ଏକ ବଡ ରାଜନୈତିକ ଘଟଣାକ୍ରମରେ ବରିଷ୍ଠ ରାଷ୍ଟ୍ରବାଦୀ କଂଗ୍ରେସ ପାର୍ଟି (ଏନସିପି) ନେତା ଅଜିତ ପାୱାର ଆଜି ଏକନାଥ ସିନ୍ଦେ ନେତୃତ୍ୱାଧୀନ ମହାରାଷ୍ଟ୍ର ସରକାରରେ ଉପମୁଖ୍ୟମନ୍ତ୍ରୀ ଭାବରେ ଯୋଗ ଦେଇଛନ୍ତି। ରାଜ୍ୟ ଭବନରେ ଆୟୋଜିତ ଏକ କାର୍ଯ୍ୟକ୍ରମରେ ରାଜ୍ୟପାଳ ତାଙ୍କୁ ଉପ-ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଥିବାବେଳେ ଅନ୍ୟ ଆଠଜଣ ଏନସିପି ନେତା ସରକାରରେ ମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି।

ଏକ ଟୁଇଟ୍‌ରେ ସିବଲ ଅନ୍ୟ ଏନସିପି ନେତାଙ୍କ ସହ ଅଜିତ ପାୱାରଙ୍କ ଶପଥ ଗ୍ରହଣ ବିଷୟରେ କହିଥଲେ ଯେ, ମୁଁ ଭାବୁଛି ଏହା ହେଉଛି ଗଣତନ୍ତ୍ରର ମାତା ମୋଦୀ ଜି ଆମେରିକାର କଂଗ୍ରେସକୁ ଦେଇଥିବା ସମ୍ବୋଧନରେ ଉଲ୍ଲେଖ କରିଥିଲେ। ମୋଦୀ ଗତ ମାସରେ କହିଥିଲେ ଯେ, ଗଣତାନ୍ତ୍ରିକ ଭାବନାର ବିକାଶରେ ଭାରତ ଗଣତନ୍ତ୍ରର ଜନନୀ ଅଟେ।

ମୁମ୍ବାଇ: ମହାରାଷ୍ଟ୍ରର ବଳିଷ୍ଠ ନେତା ଶରଦ ପାୱାର, ଯିଏକି ନିଜର ରାଜନୈତିକ ନିଷ୍ପତ୍ତିରେ ଭାରତୀୟ ରାଜନୀତିର ବଡ ବଡ ନେତାମାନଙ୍କୁ ପରାସ୍ତ କରିଥିଲେ, ଏବେ ପୁତୁରା ଅଜିତ ପାୱାର ତାଙ୍କ ଶୈଳୀରେ ଜବାବ ଦେଇଛନ୍ତି। ଏବଂ ଏପରି ଏକ ଜବାବ ଦେଇଛନ୍ତି ଯେ, ସୋନିଆ ଗାନ୍ଧୀଙ୍କ ବିରୁଦ୍ଧରେ ବିଦ୍ରୋହ କରି ଏନସିପି ଗଠନ କରିଥିବା ଶରଦ ପାୱାରଙ୍କ ଦଳ ଏବେ ଭାଙ୍ଗି ଯାଇଛି, ଏବେ ତାଙ୍କର ରାଜନୈତିକ ଶକ୍ତିର ସମାପ୍ତି ମଧ୍ୟ ଦେଖାଯାଉଛି।

ବର୍ତ୍ତମାନ ଅଜିତ ପାୱାର ଏକନାଥ ସିନ୍ଦେଙ୍କ ସରକାରରେ ଉପମୁଖ୍ୟମନ୍ତ୍ରୀ ହୋଇଛନ୍ତି ଏବଂ ଏନସିପିର ଆହୁରି ୯ ଜଣ ବିଧାୟକ ମଧ୍ୟ କ୍ୟାବିନେଟ ମନ୍ତ୍ରୀ ହୋଇଛନ୍ତି। ଏଭଳି ପରିସ୍ଥିତିରେ ଏନସିପିର ଭବିଷ୍ୟତ କ’ଣ ହେବ ଏବଂ ଶରଦ ପାୱାର ଏହି ପାର୍ଟିକୁ ପୁଣିଥରେ ଠିଆ କରାଇ ପାରିବେ କି ନାହିଁ, ତାହା ଏବେ ଦେଖିବା ବାକି ରହିଛି।

ମୁମ୍ବାଇ: ମହାରାଷ୍ଟ୍ରରେ ଆଜି ଇଡି ଏକ ବଡ କାର୍ଯ୍ୟାନୁଷ୍ଠାନ ଗ୍ରହଣ କରିଛି। କୁହାଯାଉଛି ଯେ ଇଡି ମୁମ୍ବାଇର ଅନେକ ସ୍ଥାନରେ ଚଢାଉ କରିଛି। ଉଦ୍ଧବ ଠାକରେଙ୍କ ପୁଅ ଆଦିତ୍ୟ ଠାକରେଙ୍କ ଘନିଷ୍ଠ ସହଯୋଗୀ ସୁରଜ ଚହ୍ଵାନଙ୍କ ବ୍ୟତୀତ ସଞ୍ଜୟ ରାଉତଙ୍କ ଘନିଷ୍ଠ ସହଯୋଗୀ ସୁଜିତ ପାଟକରଙ୍କ ଉପରେ ଇଡି ଚଢାଉ କରିଥିବା ସୂଚନା ସାମ୍ନାକୁ ଆସିଛି। ତଥାପି ନାମଗୁଡ଼ିକ ଏପର୍ଯ୍ୟନ୍ତ ଇଡି ଦ୍ୱାରା ନିଶ୍ଚିତ ହୋଇନାହିଁ।

କୋଭିଡ ସମୟରେ, ଲାଇଫଲାଇନ କମ୍ପାନୀ ଅଧୀନରେ ହୋଇଥିବା ଦୁର୍ନୀତିକୁ ନେଇ ଇଡି ଏକ ମାମଲା ରୁଜୁ କରିଥିଲା। ଆଦିତ୍ୟ ଏବଂ ରାଉତଙ୍କ ୧୦ ଟି ସ୍ଥାନରେ ଇଡିର ଚଢାଉ ଚାଲିଛି। ମୁମ୍ବାଇ, ପୁଣେ ସମେତ ଅନେକ ସହରରେ ଚଢାଉ ଜାରି ରହିଛି।

ମୁମ୍ବାଇ: ଶିବସେନା (ଉଦ୍ଧବ ବାଲ ଠାକରେ) ନେତା ସଞ୍ଜୟ ରାଉତ ମଙ୍ଗଳବାର ଦାବି କରିଛନ୍ତି ଯେ, ଯଦି ଆଜି ମହାରାଷ୍ଟ୍ରରେ ନିର୍ବାଚନ ହୁଏ ତେବେ ମହା ବିକାଶ ଅଘାଡି (MVA) ଅତି କମରେ ୪୦ ଟି ଲୋକସଭା ଆସନ ଏବଂ ୧୮୦ ରୁ ୧୮୫ ଟି ବିଧାନସଭା ଆସନ ପାଇବ। ସୂଚନାଯୋଗ୍ୟ ଯେ, ଏମଭିଏମ୍‌ରେ ଶିବସେନା (ୟୁବିଟି) ଏବଂ କଂଗ୍ରେସ ଏବଂ ଏନସିପି ମଧ୍ୟ ଅଛନ୍ତି।

ଏଠାରେ ସାମ୍ବାଦିକମାନଙ୍କ ସହ କଥାବାର୍ତ୍ତା କରି ରାଉତ ଦାବି କରିଛନ୍ତି ଯେ, ଭାରତୀୟ ଜନତା ପାର୍ଟି ଜାତୀୟ ସ୍ତରରେ ଅତି କମରେ ୧୧୦ ଟି ଆସନ (ଲୋକସଭା) ହରାଇବ। ସେ କହିଛନ୍ତି ଯେ, “ଏହା ପଦ୍ମର ଋତୁ ନୁହେଁ। ମୁଁ ଆଜି ବଜାରରେ କୌଣସି ପଦ୍ମ ଦେଖୁନାହିଁ। ବଜାରରେ ଆହୁରି ଅନେକ ପ୍ରକାରର ଫୁଲ ଅଛି ଏବଂ ଶୀଘ୍ର ଆପଣ ସେଗୁଡ଼ିକ ମଧ୍ୟରୁ ଅନେକ ଦେଖିବେ।

ଏନସିପି ନେତା ଅଜିତ ପାୱାରଙ୍କ ବିଷୟରେ ହୋଇଥିବା କଳ୍ପନାଜଳ୍ପନା ଉପରେ ରାଉତ କହିଛନ୍ତି ଯେ, ଦଳରୁ ଅଲଗା ହେବାର ଖବର ମିଥ୍ୟା ବୋଲି ସାମ୍ବାଦିକମାନଙ୍କୁ ସ୍ପଷ୍ଟ କରିଛନ୍ତି।

ମୁମ୍ବାଇ: ମହାରାଷ୍ଟ୍ରର ଅକୋଲା ଜିଲ୍ଲାରେ ଏକ ବଡ଼ ଦୁର୍ଘଟଣା ଘଟିଛି। ବାସ୍ତବରେ ରବିବାର ସନ୍ଧ୍ୟାରେ ବାବା ଜୀ ମହାରାଜ ମନ୍ଦିର ସମ୍ମୁଖରେ ପ୍ରସାଦ ବଣ୍ଟନ ଆରମ୍ଭ ହୋଇଥିଲା। କିନ୍ତୁ ଏହି ସମୟ ମଧ୍ୟରେ ପ୍ରବଳ ଝଡ ପବନ ଓ ବର୍ଷା ଯୋଗୁଁ ଏକ ବିରାଟ ନିମ୍ବ ଗଛ ଟିଣ ଘର ଉପରେ ପଡ଼ିଗଲା। ଅନେକ ଭକ୍ତ ଏହି ଟିଣ ଘର ତଳେ ଠିଆ ହୋଇଥିଲେ। ସେମାନଙ୍କ ମଧ୍ୟରୁ ଅନେକ ଏହାର ତଳେ ଦବିହୋଇ ରହିଯାଇଥିଲେ।

ସୂଚନା ଅନୁଯାୟୀ, ୩୫ ରୁ ୪୦ ଭକ୍ତଙ୍କୁ ଗଛ ତଳେ ଦବି ଯାଇଥିଲେ। ଯେଉଁଥିରେ ଏପର୍ଯ୍ୟନ୍ତ ୭ ଜଣଙ୍କର ମୃତ୍ୟୁ ହୋଇଥିବା ବେଳେ ୨୩ ଜଣ ଆହତ ହୋଇଛନ୍ତି। ଯାହାର ଚିକିତ୍ସା ଅକୋଲା ମେଡିକାଲ କଲେଜରେ ଚାଲିଛି। ତେବେ ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ସ୍ଥାନୀୟ ଲୋକ ଏବଂ ବାଲାପୁର ପୋଲିସ ଘଟଣାସ୍ଥଳକୁ ଯାଇ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଟିଣ ଘରେ ତଳେ ପୋତି ହୋଇଥିବା ଲୋକଙ୍କୁ ଉଦ୍ଧାର କାର୍ଯ୍ୟ ଜାରି ରହିଛି।

ସ୍ଥାନୀୟ ହିନ୍ଦୁ ମୁସଲମାନ ସମସ୍ତ ଧର୍ମର ଲୋକମାନେ ଗଛ କାଟିଥିଲେ। ପୋତି ହୋଇ ରହିଥିବା ଲୋକଙ୍କୁ ଗ୍ୟାସ କଟର ସାହାଯ୍ୟରେ ଟିଣ ଘରୁ ବାହାର କରାଯାଇଥିଲା। ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ଜିଲ୍ଲାପାଳ, ଏସପି ଘଟଣାସ୍ଥଳରେ ପହଞ୍ଚିଛନ୍ତି। ଏହି ଘଟଣାରେ ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଗଭୀର ଦୁଃଖ ପ୍ରକାଶ କରିଛନ୍ତି।

ମୃତକଙ୍କ ପ୍ରତ୍ୟେକ ପରିବାରକୁ ୪ ଲକ୍ଷ ଟଙ୍କା ସହାୟତା କରିବାକୁ ମଧ୍ୟ ମୁଖ୍ୟମନ୍ତ୍ରୀ ଘୋଷଣା କରିଛନ୍ତି। ଏଥିସହ ସମସ୍ତ ଆହତଙ୍କ ଉପଯୁକ୍ତ ଚିକିତ୍ସା ସରକାରୀ ଖର୍ଚ୍ଚରେ କରାଯିବା ଉଚିତ ବୋଲି ମଧ୍ୟ ନିର୍ଦ୍ଦେଶ ଦିଆଯାଇଛି। ଏହି ପରିପ୍ରେକ୍ଷୀରେ ମୁଖ୍ୟମନ୍ତ୍ରୀ ଜିଲ୍ଲା ପ୍ରଶାସନଠାରୁ ସୂଚନା ନେଇଛନ୍ତି।