ଭୁବନେଶ୍ବର: ଲକଡାଉନ୍ ଏବଂ କରୋନା ଭୁତାଣୁ ସଂକ୍ରମଣର ଦ୍ଵିତୀୟ ଲହରୀ ସତ୍ତ୍ୱେ ଭାରତୀୟ ରେଳବାଇ ସମଗ୍ର ଦେଶରେ ଅତ୍ୟାବଶ୍ୟକ ସାମଗ୍ରୀ ଯୋଗାଣ ଓ ପରିବହନକୁ ସୁନିଶ୍ଚିତ କରିଛି। ଭାରତୀୟ ରେଳବାଇ ପେଟ୍ରୋଲିୟମ ଉତ୍ପାଦ, କୋଇଲା ଇତ୍ୟାଦି ବ୍ୟତୀତ ଖାଦ୍ୟ ଶସ୍ୟ, ଫଳ ଏବଂ ପନିପରିବା, ଦୁଗ୍ଧଜାତ ଦ୍ରବ୍ୟ, ଖାଇବା ତେଲ, ଚିନି ଏବଂ ଲୁଣ, ଚିକିତ୍ସା ଉପକରଣ ଏବଂ ଔଷଧ, ପିପି କିଟ୍ ଏବଂ ଅନ୍ୟାନ୍ୟ ଖାଦ୍ୟ ସାମଗ୍ରୀ ଇତ୍ୟାଦି କ୍ରମାଗତ ଭାବେ ପରିବହନ କରିଆସୁଅଛି। ଦେଶର ବିଭିନ୍ନ ସ୍ଥାନରେ ରୋଗୀଙ୍କ ଜୀବନ ରକ୍ଷା ପାଇଁ ତରଳ ମେଡିକାଲ ଅମ୍ଳଜାନ (ଏଲଏମଓ) ପରିବହନକୁ ବର୍ତ୍ତମାନ ପ୍ରାଥମିକତା ଦେଉଛି।
ତରଳ ମେଡିକାଲ ଅମ୍ଳଜାନ, ଖାଦ୍ୟ ଶସ୍ୟ ଏବଂ ଅନ୍ୟାନ୍ୟ ଜରୁରୀ ଦ୍ରବ୍ୟର ଗୁରୁତ୍ୱକୁ ଦୃଷ୍ଟିରେ ରଖି ପୂର୍ବ ତଟ ରେଳପଥ ନିରବଛିନ୍ନଭାବେ ବିଭିନ୍ନ ଗନ୍ତବ୍ୟ ସ୍ଥାନକୁ ଶୀଘ୍ର ପରିବହନ କରି ନିରନ୍ତର ଯୋଗାଣ ସୁନିଶ୍ଚିତ କରିବା ପାଇଁ ଏହାକୁ ଏକ ଆହ୍ୱାନ ଭାବରେ ଗ୍ରହଣ କରିଛି। କୋଇଲା, ସାର ଏବଂ ପେଟ୍ରୋଲିୟମ ଉତ୍ପାଦ ପରି ଦ୍ରବ୍ୟ ମଧ୍ୟ ଏହାର ପରିସୀମା ମଧ୍ୟରୁ ଦେଶର ବିଭିନ୍ନ ଗନ୍ତବ୍ୟସ୍ଥଳକୁ ପରିବହନ କରାଯାଇଛି।
ପୂର୍ବ ତଟ ରେଳପଥର କୀର୍ତ୍ତିମାନ ଯୋଦ୍ଧା ଯଥା ଲୋକୋ-ପାଇଲଟ୍, ଗାର୍ଡ, ଷ୍ଟେସନ୍ ମ୍ୟାନେଜର୍, ଗୁଡ଼ସ କ୍ଲର୍କସ୍, ଏସି ସହାୟକ କର୍ମଚାରୀ, ଟ୍ରେନ୍ ଟିକେଟ୍ ଯାଞ୍ଚ କର୍ମଚାରୀ, ସିଗନାଲ୍, ଇଲେକ୍ଟ୍ରିକାଲ୍, ମେକାନିକାଲ୍, ଇଞ୍ଜିନିୟରିଂ ଭଳି ସୁରକ୍ଷା ବର୍ଗର କର୍ମଚାରୀମାନେ ଦେଶର ବିଭିନ୍ନ ଅଞ୍ଚଳରେ ଲୋକ ମାନଙ୍କୁ ଆବଶ୍ୟକୀୟ ସାମଗ୍ରୀ ଯୋଗାଣ ସୁନିଶ୍ଚିତ କରିବା ପାଇଁ ଦିନରାତି କଠିନ ପରିଶ୍ରମ କରୁଛନ୍ତି। ପୂର୍ବ ତଟ ରେଳ ବିଭାଗର ସ୍ୱାସ୍ଥ୍ୟ ବିଭାଗ, ଅନ ବୋର୍ଡ କର୍ମଚାରୀ ଏବଂ ସୁରକ୍ଷା ବିଭାଗର କୀର୍ତ୍ତିମାନ ଯୋଦ୍ଧାମାନେ ସଂକ୍ରମଣର ବିପଦ ଜାଣିଥିଲେ ମଧ୍ୟ ମହାମାରୀ ପରିସ୍ଥିତିରେ ସିଧାସଳଖ ଜନସାଧାରଣଙ୍କ ସହ ପ୍ରତ୍ୟକ୍ଷ ଭାବେ ସଂସ୍ପର୍ଶରେ ଆସି ଦେଶର ସେବା କରୁଛନ୍ତି।
ଏହି ଯୋଦ୍ଧାମାନଙ୍କ ସୁରକ୍ଷା ପାଇଁ ରେଳବାଇ ପକ୍ଷରୁ ପର୍ଯ୍ୟାପ୍ତ ପଦକ୍ଷେପ ନିଆଯାଇଛି। ସାମାଜିକ ଦୂରତା ବଜାୟ ରଖିବା, ମାସ୍କକୁ ସଠିକ୍ ଭାବରେ ବ୍ୟବହାର କରିବା, ବାରମ୍ବାର ହାତକୁ ପରିଷ୍କାର/ଧୋଇବା ଏବଂ ଆବଶ୍ୟକ ସ୍ଥଳେ ପିପିଇ ବ୍ୟବହାର କରିବା ପାଇଁ ସେମାନେ ସଚେତନତା ଅଭିଯାନ ମାଧ୍ୟମରେ ପ୍ରତ୍ୟକ୍ଷ ଭାବରେ ଜନସାଧାରଣ ବିଶେଷ ଭାବେ ଯାତ୍ରୀ ଓ ରେଳ ବ୍ୟବହାରକାରୀ ମାନଙ୍କ ସହିତ ଜଡିତ ରହୁଛନ୍ତି। ସେମାନଙ୍କର ନିଜ କର୍ତ୍ତବ୍ୟ ବ୍ୟତୀତ, ଏହି ଯୋଦ୍ଧାମାନେ ଲୋକଙ୍କୁ ନିରାପଦରେ ରହିବାକୁ ଏବଂ ସମସ୍ତ ପ୍ରୋଟୋକଲ୍ ଅନୁସରଣ କରିବାକୁ ଉତ୍ସାହିତ କରୁଛନ୍ତି।
ପୁରୀର ଏସି ମେକାନିକ ଧନଞ୍ଜୟ ପ୍ରସାଦ ସ୍ପଷ୍ଟ କରିଛନ୍ତି ଯେ ସେ ଭାରତୀୟ ରେଳର ଏକ ଅଂଶ ହୋଇଥିବାରୁ ସେ ନିଜକୁ ଗର୍ବିତ ଅନୁଭବ କରୁଛନ୍ତି ଏବଂ ଏଥିପାଇଁ ସେ ଖୁସି ଅଛନ୍ତି। ନିଜ ଜୀବନକୁ ବିପଦରେ ପକାଇ ସେ ଟ୍ରେନରେ ନିଜର ସେବା କରୁଛନ୍ତି ଯାହା ଦ୍ୱାରା ଯାତ୍ରୀମାନେ ଆରାମରେ ଯାତ୍ରା କରିପାରିବେ। ଯଦିଓ ଏବେ କୋଭିଡ୍ ସଂକ୍ରମଣର ଦ୍ୱିତୀୟ ତରଙ୍ଗ ଅଛି ଏବଂ ଟ୍ରେନ୍ ଗୁଡିକ ଏକ ବନ୍ଦ ସ୍ଥାନ ଅଟେ, ସେ ରାଷ୍ଟ୍ରର ସେବା କରିବା ଏବଂ ଲୋକଙ୍କୁ ସେମାନଙ୍କ ଗନ୍ତବ୍ୟ ସ୍ଥଳରେ ପହଞ୍ଚାଇବାରେ ସାହାଯ୍ୟ କରିବା ପାଇଁ ଏକ ଆହ୍ୱାନ ଭାବରେ ଗ୍ରହଣ କରିଛନ୍ତି।
ମହାମାରୀ କୋଭିଡ ଅବଧି ସମୟରେ ରେଳବାଇ ମାଧ୍ୟମରେ ସେମାନଙ୍କ କର୍ତ୍ତବ୍ୟ ସମ୍ପାଦନ ତଥା ଜନସାଧାରଣଙ୍କ ସେବାରେ ସେମାନଙ୍କର ଅଭିଜ୍ଞତା ବର୍ଣ୍ଣନା କରିବାବେଳେ ଭୁବନେଶ୍ୱର ନୂଆଦିଲ୍ଲୀ ରାଜଧାନୀ ବିଶେଷ ଟ୍ରେନର ଟ୍ରେନ୍ ଅଧୀକ୍ଷକ ପି କେ ନାୟକ ଏବଂ କୌଶିକ ସାହା କହିଛନ୍ତି ଯେ ସେମାନେ ଭାରତୀୟ ରେଳ ସେବାରେ ଗର୍ବିତ ଅନୁଭବ କରୁଛନ୍ତି। ସଂକ୍ରମଣର ବିପଦ ଥିଲେ ମଧ୍ୟ ନିର୍ଦ୍ଦେଶନାମା ଅନୁଯାୟୀ ସେମାନେ ସମସ୍ତ ସତର୍କତା ଅବଲମ୍ବନ କରୁଛନ୍ତି। ପରିବାର ସଦସ୍ୟ ଏବଂ ସହକର୍ମୀମାନଙ୍କ ସହଯୋଗ ସେମାନଙ୍କୁ ସେବା କରିବାକୁ ଉତ୍ସାହିତ କରେ। ସେମାନଙ୍କ ମତରେ, କର୍ତ୍ତବ୍ୟ ପ୍ରଥମେ ଆସେ।
ରେଳ ସୁରକ୍ଷା ବଳ (ଆରପିଏଫ) କର୍ମଚାରୀମାନେ ଭାରତୀୟ ରେଳ ସେବା କରିବା ଏହି ପରିସ୍ଥିତିକୁ ଏକ ଆହ୍ୱାନ ଭାବରେ ନିଜ କର୍ତ୍ତବ୍ୟ ପାଳନ କରୁଛନ୍ତି। ଏହି ମହାମାରୀ ସମୟରେ ସେମାନେ ଅଧିକ ସଚେତନ ହୋଇ ସେମାନଙ୍କର କାର୍ଯ୍ୟ ସମ୍ପାଦନ କରୁଛନ୍ତି। ନିକଟରେ ଖୋର୍ଦ୍ଧା ରୋଡରେ ଥିବା ଆରପିଏଫ୍ କର୍ମଚାରୀମାନେ ଜଣେ ବୃଦ୍ଧା ମହିଳା ଯାତ୍ରୀଙ୍କୁ ସାହାଯ୍ୟ କରିଥିଲେ, ଯେ କି ଟ୍ରେନରେ ଯାତ୍ରା ସମୟରେ ତାଙ୍କର ସ୍ୱାମୀଙ୍କୁ ହରାଇଥିଲେ। ସେମାନେ ଟ୍ରେନ କମ୍ପାର୍ଟମେଣ୍ଟରୁ ମୃତଦେହକୁ ବାହାର କରିବା, ରାଜ୍ୟ ପୋଲିସର ଉଚ୍ଚ ପଦାଧିକାରୀଙ୍କ ସହାୟତାରେ ଶବ ବ୍ୟବଚ୍ଛେଦ ପାଇଁ ବ୍ୟବସ୍ଥା କରିବା ଭଳି ସମସ୍ତ ଆବଶ୍ୟକୀୟ ସହାୟତା ପ୍ରଦାନ କରିଥିଲେ। ଏପରିକି ସେମାନେ ଶବଦାହ ପାଇଁ ସମସ୍ତ ପ୍ରକାର ସହାୟତା କରିଥିଲେ।
